سايلاۋ ارقىلى تاعايىندالعان اۋىل اكىمدەرىنە ەندى قانداي وكىلەتتىكتەر بەرىلمەك

استانا. قازاقپارات - 97 پايىزدان استام اۋىل اكىمدەرى سايلاۋ ارقىلى تاعايىندالدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ۇلتتىق ەكونوميكا ۆيتسە-ءمينيسترى باۋىرجان وماربەكوۆ ايتتى.

- مەملەكەت باسشىسىنىڭ تاپسىرماسىنا سايكەس، ەلدە اۋىلدىق وكرۋگ اكىمدەرىن تىكەلەي سايلاۋ جۇيەسى ەنگىزىلدى. 2021-2024 -جىلدارى 2641 اكىم سايلاندى. ولاردىڭ 70 پايىزدان استامى بۇل لاۋازىمعا العاش رەت كەلدى. جالپى العاندا، 97 پايىزدان استام اۋىل اكىمدەرى سايلاۋ ارقىلى تاعايىندالدى، - دەدى باۋىرجان وماربەكوۆ.

بۇدان بولەك، ۆيتسە-مينيستر پرەزيدەنت جانىنداعى مەملەكەتتىك باسقارۋ اكادەمياسى مەن «امانات» پارتياسى ۇلتتىق ەكونوميكا مينيسترلىگىنىڭ قولداۋىمەن قالالار، اۋىلدار مەن كەنتتەر اكىمدەرىن قايتا دايارلاۋ باعدارلاماسىن ازىرلەگەنىن ايتتى.

- باعدارلامانىڭ نەگىزگى ماقساتى - جەرگىلىكتى ءوزىن-ءوزى باسقارۋ ماسەلەلەرىن ءتيىمدى شەشۋ، اكىمدەردىڭ كاسىبي جانە باسقارۋشىلىق قۇزىرەتتىلىگىن ارتتىرۋ ارقىلى وڭىرلەردىڭ تۇراقتى الەۋمەتتىك- ەكونوميكالىق دامۋىن قامتاماسىز ەتۋ. وقۋ قورىتىندىسى بويىنشا قاتىسۋشىلار اۋىلدىق وكرۋگتەردىڭ ەكونوميكالىق دامۋىنىڭ باعدارلامالارىن ازىرلەيدى. قازىرگى ۋاقىتتا باعدارلاما اياسىندا 17 وڭىردەن 1815 اۋىل اكىمى ءبىلىم الىپ جاتىر، - دەدى ول.

تاياۋدا بۋرابايدا وتكەن ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقايەۆ بيىلدان باستاپ بارلىق اۋدان اكىمدەرىن حالىق تىكەلەي سايلايتىنىن ايتقان ەدى.

اۋىل اكىمدەرىنە قانداي وكىلەتتىكتەر بەرىلمەك. 
ورتالىق كوممۋنيكاتسيالار قىزمەتىندەگى بريفينگتە ۇلتتىق ەكونوميكا ۆيتسە-ءمينيسترى باۋىرجان وماربەكوۆ اۋىلدىق وكرۋگ اكىمدەرىنىڭ وكىلەتتىكتەرىن كەڭەيتۋ ءۇشىن قانداي شارالار ۇسىنىلىپ وتىرعان ايتتى.

ۆيتسە-مينيستر اتاعان شارالار مىنالار:

- اكىمدەرگە ازاماتتىق قىزمەتشىلەردىڭ ەڭبەكاقى تولەۋ جۇيەسى بويىنشا جۇمىسشىلاردى ەڭبەك شارتى نەگىزىندە جالداۋ قۇقىعىن بەرۋ؛

- ارنايى تەحنيكا مەن اۋىل شارۋاشىلىعى ماشينالارىن ساتىپ الۋعا رۇقسات بەرۋ، ولاردى حالىققا اقىلى نەگىزدە قىزمەت كورسەتۋ ءۇشىن پايدالانۋ؛

- اكىمدەر مەن ولاردىڭ اپپاراتتارىنىڭ وكىلەتتىكتەرىن كەڭەيتۋ؛

- قوعامدىق ورىنداردى اباتتاندىرۋ، بالالار ويىن الاڭدارىن پايدالانۋعا باقىلاۋ جۇرگىزۋ، اقىلى قىزمەتتەر ۇسىنۋ جانە باسقالارى.

- بۇل جاڭاشىلدىقتار ءماجىلىس دەپۋتاتتارىمەن قوسىمشا تالقىلانىپ، زاڭنامالىق باستامالار اياسىندا جۇزەگە اسىرىلاتىن بولادى، - دەدى ول.

سونىمەن قاتار باۋىرجان وماربەكوۆ اۋىل بيۋدجەتىن ارتتىرۋ ءۇشىن زاڭدى جانە جەكە تۇلعالاردىڭ مۇلىك سالىعىنىڭ ءبىر بولىگىن اۋدارۋ، ۋ رەسۋرستارىن پايدالانعانى ءۇشىن تولەم، بەلگىلى ءبىر قىزمەت تۇرلەرىمەن اينالىسۋ قۇقىعى ءۇشىن ليتسەنزيالىق الىم، ليتسەنزيالار مەن رۇقساتتاردى پايدالانعانى ءۇشىن تولەم سىندى كەيبىر كىرىس كوزدەرىن بەرۋ جوسپارلانىپ وتىرعانىن ايتتى.