ساياسات نۇربەك تالاپكەرلەر اراسىندا زاڭگەر ماماندىعىنا نەگە سۇرانىس جوعارى ەكەنىن ءتۇسىندىردى

 استانا. KAZINFORM - كوپ اتا-انا بالالارىن «قۇقىق» ماماندىعىنا باعىتتاپ جاتىر.

بۇل تۋرالى بۇگىن سەناتتا زاڭ ءبىلىمىنىڭ ساپاسىن ارتتىرۋ تاقىرىبىنداعى عىلىمي- پراكتيكالىق كونفەرەنتسيادا قر عىلىم جانە جوعارى ءبىلىم ءمينيسترى ساياسات نۇربەك ايتتى.

«2000-جىلدارى گۋمانيتارلىق ماماندىقتارعا سۇرانىس جوعارى بولدى. بىرنەشە جوعارى وقۋ ورنى ليتسەنزيانى الىپ، «قۇقىق» باعىتىندا مامانداردى دايارلاۋعا كىرىستى. ياعني وسى ماماندىقتاردى دايارلاۋ وڭاي دەپ سانادى. سەبەبى بۇل ماماندىققا ءتۇرلى زەرتحانالار قۇرۋ قاجەت بولمادى. قازىر قازاقستاندا 36 مىڭنان استام ءبىلىم الۋشى 59 جوعارى وقۋ ورىنىندا وقىپ جاتىر. كەيىنگى 3-4 جىلدا 13 جوعارى ورنىنىڭ ليتسەنزياسىن قايتارىپ الىپ، ولاردىڭ «قۇقىق» ماماندىعى بويىنشا وقىتۋىن شەكتەدىك. سەبەبى ولاردا ءبىلىم ساپاسى تومەن بولدى. اتاپ ايتقاندا، بۇل باعىتتاعى جۇمىس جالعاسادى. قازىر ءتيىستى ساراپتامانى جاساپ جاتىرمىز»، - دەدى س. نۇربەك.

ونىڭ ايتۋىنشا، اتالعان 36 مىڭ ادامنىڭ 34,5 مىڭى باكالاۆرياتتا وقىپ جاتىر.

«بۇل نەنى بىلدىرەدى؟ دەمەك، زەرتتەۋشى فورمات ءالى دە ءالسىز. ماگيستراتۋرا، دوكتورانتۋرا اياسىندا زەرتتەۋ جاساپ جاتقان ادامدار بۇل سالادا وتە از، 5 پايىز شاماسىندا. زاڭگەرلىك ماماندىققا تۇسەتىن تالاپكەرلەرگە ۇ ب ت اياسىندا شەكتى بالدى كوتەرۋدى پىسىقتاپ جاتىرمىز. بۇل قادام ساپانى كوتەرۋ ءۇشىن جاسالادى. كەيىنگى جىلدارى تالاپكەرلەر سانى 12 پايىزعا ارتقان، ياعني ءالى دە وسى سالاعا سۇرانىس جوعارى. كاسىپتىك باعدار بويىنشا جۇمىستار ناشار بولعاندىقتان، ءالى كۇنگە دەيىن كوپ اتا-انا بالالارىن زاڭگەرلىك ماماندىققا باعىتتاپ جاتىر. ولار «زاڭگەر بولساڭ، جۇمىسسىز قالمايسىڭ» دەگەن پايىمدا ءجۇر. جالپى، ستۋدەنتتەردىڭ 97 پايىزى اقىلى تۇردە ءبىلىم الىپ جاتىر. تالاپكەرلەر اراسىندا سۇرانىس جوعارى بولعاندىقتان، جوعارى وقۋ ورىندارى ولاردى اقىلى بولىمگە قۋانا قابىلداپ جاتىر»، - دەدى مينيستر.

ونىڭ سوزىنە قاراعاندا، مەملەكەتتىك تاپسىرىس تۇلەكتەردى جۇمىسقا ورنالاستىرۋ جاعىنان كورسەتكىشى جوعارى ۋنيۆەرسيتتەرگە بولىنەدى.