ساياسات نۇربەك: ءبىرىڭعاي ۋاقىت بەلدەۋىنە كوشۋ - دەنساۋلىققا دا باعىتتالعان قادام

الماتى. KAZINFORM — الماتىدا «ءبىرىڭعاي ۋاقىت بەلدەۋى: عىلىمي اسپەكتىلەر» اتتى وتكەن دوڭگەلەك ۇستەلدە عالىمدار مەن ساراپشىلار ۋاقىتشا وزگەرىستەردىڭ ازاماتتاردىڭ دەنساۋلىعىنا اسەرىنە قاتىستى ماسەلەنى تالقىلادى.

عىلىم جانە جوعارى ءبىلىم ءمينيسترى ساياسات نۇربەك دوڭگەلەك ۇستەل بارىسىندا حالىقتىڭ دەنساۋلىعى مەن پسيحيكالىق جاي-كۇيىن جاقسارتۋ ءۇشىن ءبىرىڭعاي ۋاقىتقا كوشۋدىڭ ماڭىزىن اتاپ ءوتتى.

ءمينيستردىڭ ايتۋىنشا، كۇيزەلىسكە جانە اقپاراتتىڭ ۇلكەن اعىنىنا تولى قازىرگى تاڭدا ادام ميى ۇنەمى دەمالماي جۇرە المايدى. اقپاراتتىڭ شامادان تىس كەلۋى، بيولوگيالىق ىرعاقتار مەن ناقتى ۋاقىتتىڭ سايكەس كەلمەۋى كوگنيتيۆتى قابىلەتتەرگە جانە جالپى دەنساۋلىققا كەرى اسەر ەتەدى.

- قازاقستان ءبىرىڭعاي ۋاقىت بەلدەۋىنە اۋىسا وتىرىپ، تابيعي كۇنگە نەگىزدەلگەن دۇرىس بيولوگيالىق ىرعاققا قايتا ورالدى. بۇل رەجيمدى وزگەرتۋ عانا ەمەس، اقىل-وي بەلسەندىلىگىن قالپىنا كەلتىرۋ، زەيىنىن جانە جالپى ءال-اۋقاتىن جاقسارتۋ مۇمكىندىگى، - دەپ اتاپ ءوتتى ساياسات نۇربەك.

مينيستر عىلىمي زەرتتەۋلەر بيولوگيالىق ىرعاقتاردى تابيعي ۋاقىتپەن ۇيلەستىرۋ ۇيقىنىڭ ساپاسىن جاقسارۋىنا، كۇيزەلىس دەڭگەيىنىڭ تومەندەۋىنە جانە تانىمدىق قابىلەتتەردىڭ جوعارىلاۋىنا ىقپال ەتەتىندىگىن اتاپ ءوتتى.

ءبىرىڭعاي ۋاقىت بەلدەۋىنە كوشۋ - بۇل ىڭعايلىلىققا عانا ەمەس، دەنساۋلىققا دا باعىتتالعان قادام، بۇل اسىرەسە ادام رەسۋرستارى ءجيى شەكتەن تىس جۇمىس ىستەيتىن قازىرگى الەمدە وتە ماڭىزدى.

وسىعان دەيىن، عىلىم جانە جوعارى ءبىلىم مينيسترلىگى زەرتتەۋ الگوريتمىن تۇسىندىرگەن ەدى.

بۇدان بۇرىن حابارلانعانداي، بيىل قاراشا ايىندا قازاقستاندا ءبىرىڭعاي ۋاقىت بەلدەۋىنىڭ ادامدارعا اسەرى زەرتتەلەتىنى ءمالىم بولدى.

ۋاقىت بەلدەۋىن زەرتتەۋگە شامامەن 160 ميلليون تەڭگە جۇمسالماق.