ساتيرا ساڭلاعى وسپانحاننىڭ ءازىل ولەڭدەرى
استانا. قازاقپارات - ساتيرا ساڭلاعى وسپانحان اۋباكىروۆتىڭ ءبىر توپ ءازىل ولەڭدەرىن نازارلارىڭىزعا ۇسىنامىز.
باستىقتار جانە ولاردىڭ ايەلدەرى
ەلدىڭ اتى ەل ەمەس پە،
كەيدە كول، كەيدە ءشول ەمەس پە؟
ەل بولعان سوڭ ەل ىشىندە،
وسەك-اياڭ كوپ ەمەس پە؟
سونداي وسەك ءورىپ ءجۇر
مىنا ءبىزدىڭ قاستەكتە.
جۇرت شىندىقتى وسەك دەيدى،
شىندىقتى ايتقان كىسىنى
«وسەكشى» دەپ ەسەپتەيدى.
الايدا، بۇلاي دەسەك تە.
ال، ەندى مىناۋ وسەك پە؟
مىسالى:
مايلىبايەۆ دەرەكتىر،
ايەلى مارۋا كادر ءبولىمى.
سوندا دەرەكتىر نە دەپ تۇر؟
«شىعار» دەسە، شىعارادى،
«قابىلدا» دەسە، قابىلدايدى.
دەرەكتىرىڭ ءۇشىن
مۇنداي مامان تابىلمايدى.
بۇل - ءبىر دەڭىز.
(قۇداي ساقتاسىن وسەك دەپ جۇرمەڭىز).
سوسىن:
ءوزىڭنىڭ دوسىڭ،
زووتەحنيك ءابىلقاسىم
وي، كەرەمەت پىسىق كىسى.
ايتىسىپ ءجۇرىپ (ءتۇسىپ ءتىسى)،
بۇل دا شارۋاسىن تىندىردى.
فاريدا دەيتىن جۇبايى،
ورتالىق قويمانىڭ قۇدايى.
ەت، ءسۇت، قانت، شاي ۇيىنە،
اعىلىپ جاتادى ۇدايى.
(ءاي، دەگەنمەن بىلەدى-اۋ،
پايدالى جەردى بۇ بايى).
قوش دەڭىز:
ەمەگەن دەيتىن باس بۇعالتىر،
ەمەگەننىڭ ايەلى،
«قۇرىلىس بولىمىندە جاس بۇعالتىر.
تۇرا المايسىز قوشتاماي،
قۇداي ەكەۋىن قوسقانى-اي!..
ءبىرىنىڭ كەمىسىن ءبىرى جاپپاي ما،
ايتەۋىر..، ەبىن تاپپاي ما؟
وسىندايىن بىلمەسە،
حالىق بوسقا داتتاي ما؟
سوسىن ينجەنەر كوشەكوۆ،
مۇنىڭ دا باسى شاقشا بوپ،
ايتەۋىر ايەلىنە ورىن تاپتى،
«جۇرتتان قالمايمىن» - دەپ ءجۇرىپ.
شاپقىلاپ ءجۇرىپ ورىنداپتى.
قاۋكەن دەگەن ءبىر پىسىق،
باستىقتارمەن جۇلقىسىپ.
بۇ دا ورىننان ءدام ەتتى،
ءسۇيتىپ ءجۇرىپ اقىرى
بۇ دا ايەلىن ءداۋ ەتتى.
ەكەۋى دە اگرونوم،
تۇرا المايسىڭ قوشتاماي
قۇداي ەكەۋىن قوسقانى-اي!..
تاعى بىرنەشە باستىقتىڭ
ايەلدەرى بوس ەكەن.
الداعى جىلى دەرەكتىردىڭ
شۇعىلداناتىنى وسى ەكەن.
وسەك، وسەك دەسەك تە،
ال، ەندى وسى وسەك پە؟
كورىپ ءجۇرمىز كوبىمىز.
سەنبەسەڭىز وسىعان،
كەلىڭىز دە كورىڭىز.
*** ***
كۇيەۋ:
- مىناۋ ءىستى بۇيتەر ەك،
اناۋ ءىستى سۇيتەر ەك.
كەشكە دەيىن جالپيىپ،
وتىراسىڭ جۇيكەلەپ.
ايەلى:
- مازا بەرشى-ەي، كۇيگەلەك،
اناۋ ءشوپتى جىي بولەك.
ۇزاق كۇنگە جاتاسىڭ،
كوزىڭە شىبىن ۇيمەلەپ،
كۇيەۋى:
- جيساڭ ءوزىڭ جىي بولەك،
ايتتىم ماعان تيمە دەپ.
وسەك دەسە، شىركىن-اي،
كىرەر مە ەدىڭ كيمەلەپ!
ايەلى:
- تاعى ۇتقىزدىڭ سەركەنى،
جات ەندى يلەپ كورپەنى.
تاۋدى ۇيىنە تاسىپ ءجۇر،
ەلدىڭ سەندەي ەركەگى.
كۇيەۋى:
- ۋا، كەمپەس اقىرىن،
بۇل ءسوزىڭنىڭ اتى كىم؟
بەرمەسىڭدى الادى
كوردىڭ بە، ەلدىڭ قاتىنىن!
ايەلى:
- ساپىلداپ قال شەشەنىم،
دۇرىس بولسىن ەسەبىڭ.
ءبارىن سالدىڭ كارتاعا،
قالدى جالعىز ەسەگىڭ.
كۇيەۋى:
- تارت ءاي، بايقۇس ءتىلىڭدى،
نە دۇنيەڭ ءبۇلىندى؟
سەنى دە سالام كارتاعا،
تولەگەمىن قۇنىڭدى.
ايەلى:
- شىعىپ پا ەدى تيىنىڭ،
ءوتتى ماعان كۇيىگىڭ.
ورتا جولدا ولمەپ پە ەدى،
بىزگە اپارعان سيىرىڭ؟!
كۇيەۋى:
- وي، كوگەرگىر كوسەگەڭ،
قيقۋلادىڭ كەشەدەن.
قوناق وتىر ۇيات قوي،
نەتكەن ءوزىڭ ەسەك-ەڭ؟!
مەن:
- وۋ، كىدىرشى تۋىسقان،
جامان عوي ءسوز قۋىسقان.
ايتىسام دەپ جەڭگەيمەن،
قالاسىڭ عوي جۇمىستان.
ايەلى:
- ءاي، قايىنىم، قايىنىم،
قايتەم ايتىپ ايىبىن!
«مال تابادى» كارتامەن،
بۇل وتىرعان جايىنىڭ.
ساۋىنشى ەم مەن فەرمەدە،
سۋرەتىم تۇر كورمەدە.
جىبەرمەدى قىزعانىپ،
مىنا نادان كورمەگە.
كەشە مىناۋ ماس ەدى،
بىلاي دەدى كاسەنگە:
وسى ءبىزدىڭ قۇيقاباي،
«كاك سوباكا نا سەنە».
مەن:
- بارماسا ءوزى جۇمىسقا،
ءسىزدى ۇستاسا قۋىستا.
ەندەشە سول كاسەندى،
بۇلاي دەۋى دۇرىس پا؟!
