ساتبايەۆ اكىمدىگىنىڭ 80 ميلليون تەڭگەگە ءتۇسىرىلىپ جاتقان سەريالى داۋعا قالدى
جەزقازعان. KAZINFORM - ساتبايەۆ قالاسى اكىمدىگىنىڭ تاپسىرىسىمەن ءتۇسىرىلىپ جاتقان الەۋمەتتىك سەريال قوعامدا داۋ تۋعىزدى. قالا بيۋدجەتىنەن 78,5 ميلليون تەڭگە بولىنگەن بۇل جوباعا قاتىستى سىبايلاس جەمقورلىققا قارسى قىزمەت تەكسەرۋ جۇرگىزىپ جاتىر.
سەريال تۇسىرۋگە قوماقتى قارجى بولىنگەنى جونىندەگى اقپارات تانىمال تەلەگرام-ارنادا جاريالانعان سوڭ ءورشي ءتۇستى. قالا اكىمدىگى جوبا نەگىزىنەن تاربيەلىك سيپاتتا ەكەنىن ايتىپ، قارجىلاندىرۋدى پرەزيدەنتتىڭ كرەاتيۆتى يندۋستريانى دامىتۋ جونىندەگى تاپسىرماسىمەن بايلانىستىردى.
«مەملەكەت باسشىسى كرەاتيۆتى يندۋستريانى ينكليۋزيۆتى ەكونوميكانىڭ ماڭىزدى باعىتى رەتىندە اتادى. وسى ورايدا، ءبىز 10 بولىمنەن تۇراتىن «نە كەرەك؟» اتتى الەۋمەتتىك ۆەب-سەريالدى ىسكە اسىردىق. جوبانىڭ ماقساتى - جاستاردى ناشاقورلىق، تارتىپسىزدىك پەن تۇرمىستىق زورلىق-زومبىلىقتان ساقتاندىرۋ ءارى قالانىڭ جاس ازاماتتارىنىڭ الەۋەتىن كورسەتۋ»، - دەپ مالىمدەدى ساتبايەۆ قالاسى اكىمدىگىنىڭ ىشكى ساياسات ءبولىمى.
الايدا جوبانىڭ ورىنداۋشىسى رەتىندە وبلىستىق ءماسليحات دەپۋتاتىنا تيەسىلى كومپانيا تاڭدالۋى كۇمان تۋدىردى. بۇل رەتتە اكىمدىك مەملەكەتتىك ساتىپ الۋ زاڭناماسى تولىق ساقتالعانىن ايتىپ اقتالدى.
«تەحنيكالىق جانە شىعارماشىلىق مۇمكىندىكتەرگە سۇيەنە وتىرىپ، جەرگىلىكتى تالانتتاردى قولداۋ ءۇشىن كەلىسىمشارت «ErNarMedia» ج ش س-مەن تىكەلەي جاسالدى. بۇل شەشىم ىشكى اۋديت پەن مونوپولياعا قارسى ورگاننىڭ كەلىسىمىمەن، ق ر «مەملەكەتتىك ساتىپ الۋ تۋرالى» زاڭىنىڭ 16-بابى، 3-تارماعى، 2-تارماقشاسىنا سايكەس قابىلداندى»،- دەپ ناقتىلادى ىشكى ساياسات ءبولىمى.
اكىمدىكتىڭ مالىمەتىنشە، سەريال بيۋدجەتىنىڭ باسىم بولىگى كاسىبي اكتەرلەردىڭ ەڭبەكاقىسىنا جانە جوعارى ساپالى تەحنيكانى (4ك كامەرا، جارىق، دىبىس، پوستپروداكشن) جالعا الۋعا جۇمسالعان. قازىردىڭ وزىندە العاشقى ءۇش ءبولىم ءتۇسىرىلىپ، ەكەۋى YouTube جەلىسىندە جۇكتەلگەن. قالعان بولىمدەر اپتا سايىن جاريالانادى. ونلاين-كورسەتىلىم اياقتالعان سوڭ سەريال «Ulytau» جانە «Aqsham» تەلەارنالارىنا ۇسىنىلادى.
«جوبا تەك كرەاتيۆتى ەكونوميكانى قولداۋ عانا ەمەس، سونىمەن قاتار ءوڭىردىڭ الەۋمەتتىك پروبلەمالارىن اشىق كورسەتىپ، جاستار اراسىندا وڭ قۇندىلىقتاردى ناسيحاتتاۋعا باعىتتالعان»، - دەدى اكىمدىكتەگىلەر.
اتالعان جاعدايعا بايلانىستى سىبايلاس جەمقورلىققا قارسى ءىس-قيمىل اگەنتتىگىنىڭ ۇلىتاۋ وبلىسى بويىنشا دەپارتامەنتى تۇسىنىكتەمە بەردى. ۆەدومستۆو وكىلدەرى جوبا بويىنشا ءوتىنىش تۇسكەنىن راستاپ، ماتەريالدار تەرگەلىپ جاتقانىن حابارلادى.
«سىبايلاس جەمقورلىققا قارسى ءىس-قيمىل اگەنتتىگىنىڭ ۇلىتاۋ وبلىسى بويىنشا دەپارتامەنتىنە وسى جوباعا قاتىستى ءوتىنىش كەلىپ ءتۇستى. قۇجاتتار باسەكەلەستىكتى قورعاۋ جانە دامىتۋ اگەنتتىگىنىڭ وڭىرلىك دەپارتامەنتىنە ساراپتاما جاساۋ ءۇشىن جىبەرىلدى. قازىرگى تاڭدا ماتەريالدار پوليتسيا دەپارتامەنتىنە جولداندى. تەرگەۋ جۇرگىزىلىپ جاتىر، ازىرگە ناقتى تۇسىنىكتەمە بەرە المايمىز»، - دەلىنگەن انتيكور مالىمدەمەسىندە.
ايتا كەتەيىك، بۇعان دەيىن ۇلىتاۋ وبلىسىندا سىبايلاس جەمقورلىق كۇدىگىمەن وبلىستىق سوت القاسىنىڭ ءتوراعاسى ۇستالعان بولاتىن.
اۆتور
ايزادا اگيلبايەۆا
