«سارىارقا» گاز قۇبىرى رەسەي گاز قۇبىرىمەن قوسىلۋى مۇمكىن

  «سارىارقا» گاز قۇبىرىن رەسەي گاز قۇبىرىمەن قوسۋ مۇمكىندىگى قاراستىرىلىپ جاتىر. بۇل تۋرالى ەنەرگەتيكا مينيسترلىگىنەن ءمالىم ەتتى، دەپ حابارلايدى Kazinform.

«2022 -جىلى «سارىارقا» ماگيسترالدىق گاز قۇبىرىنىڭ 2,3-كەزەگىنىڭ قۇرىلىسى» تەحنيكالىق- ەكونوميكالىق نەگىزدەمەسى جاسالعان. «سارىارقا» ماگيسترالدىق گاز قۇبىرى «بەينەۋ- بوزوي- شىمكەنت» گاز قۇبىرىنان گاز الاتىنىن، ونىڭ الدىڭعى 2022-2023 -جىلدارداعى قىسقى كەزەڭدە 106 پايىز جۇكتەلگەنىن ەسكەرە وتىرىپ، جوبانى ىسكە اسىرۋ «بەينەۋ- بوزوي- شىمكەنت» ماگيسترالدىق گاز قۇبىرىنىڭ 2- جەلىسىنىڭ قۇرىلىسى اياقتالعاننان كەيىن مۇمكىن بولادى. قازىرگى ۋاقىتتا «بەينەۋ- بوزوي- شىمكەنت» گاز قۇبىرىنىڭ 2- جەلىسىنىڭ قۇرىلىسى» تەحنيكالىق- ەكونوميكالىق نەگىزدەمەسى ازىرلەنىپ جاتىر. 2024 -جىلدىڭ 2-توقسانىندا اياقتالادى. جوبانى 2026 -جىلى اياقتاۋ جوسپارلانعان»، - دەپ اتاپ وتەدى مينيسترلىكتەن اگەنتتىكتىڭ رەسمي ساۋالىنا وراي.

وسى ورايدا مينيسترلىك «QazaqGaz» ۇ ك» ا ق «سارىارقا» ماگيسترالدىق گاز قۇبىرى 4-كەزەگىنىڭ قۇرىلىسىنىڭ تەحنيكالىق- ەكونوميكالىق نەگىزدەمەسىن تۇزەتۋ بويىنشا كورپوراتيۆتىك راسىمدەردى باستاعانىن اتاپ وتەدى. تۇزەتۋ اياسىندا گاز قۇبىرىنىڭ وتكىزۋ قابىلەتىن ساعاتىنا 606 مىڭ تەكشە مەتردەن 801 مىڭ تەكشە مەترگە دەيىن ۇلعايتۋ ءۇشىن 2 كومپرەسسورلىق ستانسا سالۋ قاراستىرىلادى.

«بالاما نۇسقا رەتىندە «سارىارقا» ماگيسترالدىق گاز قۇبىرىن رەسەي فەدەراتسياسىنىڭ گاز قۇبىرىمەن قوسۋ مۇمكىندىگى قاراستىرىلىپ جاتىر. «گازپروم» جاق ەلىمىزدىڭ سولتۇستىك- شىعىس ايماقتارىن گازداندىرۋ جوباسىنىڭ الدىن الا تەحنيكالىق- ەكونوميكالىق نەگىزدەمەسىن ازىرلەۋدە. جوعارىدا ايتىلعانداردى ەسكەرە وتىرىپ، تەن جانە باستاپقى مالىمەتتەردى العاننان كەيىن (گاز باعاسى، گاز قۇبىرلارىنىڭ باعىتتارى جانە ت. ب. ) گازداندىرۋدىڭ وڭتايلى نۇسقاسى ازىرلەنەتىن بولادى» ، - دەدى ۆەدومستۆودان.