سارىاعاشتا مۇگەدەكتىگى بار بالانى ەدەندە سۇيرەگەن قىزمەتكەرگە قاتىستى قىلمىستىق ءىس قوزعالدى
تۇركىستان. KAZINFORM - جەتكىنشەك داۋن سيندرومىمەن ناۋقاستانعان.
الەۋمەتتىك جەلىدە تاراعان اقپاراتقا سۇيەنسەك، جەكەمەنشىك ورتالىقتا تاربيەلەنىپ جاتقان ەر بالانى ارت-تەراپيەۆت ەدەندە اياعىنان سۇيرەگەن.
سونداي-اق، بۇرىشقا تۇرعىزىپ، فيزيكالىق كۇش قولدانعان. مەكەمە قىزمەتكەرىنىڭ بۇل ارەكەتى ۆيدەو ارقىلى كوپشىلىككە تاراپ كەتتى.
ال، تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى اتالعان فاكتىگە قاتىستى ق ر ق ك-نىڭ 140-بابى «كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ» بويىنشا قىلمىستىق ءىس قوزعالعاندىعىن مالىمدەدى.
- وقيعاعا قاتىسۋشىلار پوليتسياعا جەتكىزىلىپ، ونىڭ ىشىندە زاڭدى وكىلدەرىنىڭ قاتىسۋىمەن جاۋاپتار الىندى. قازىرگى ۋاقىتتا بارلىق ءمان-جايلاردى انىقتاۋعا باعىتتالعان قاجەتتى ءىس-شارالار جۇرگىزىلۋدە، ناتيجەسى بويىنشا ءتيىستى شەشىم قابىلداناتىن بولادى.
سونداي-اق بۇعان دەيىن پوليتسياعا وسى فاكت بويىنشا ەشكىم ارىز-شاعىم تۇسىرمەگەنى انىقتالدى. ءىس تۇركىستان وبلىسى پوليتسيا دەپارتامەنتى باسشىلىعىنىڭ باقىلاۋىندا، - دەلىنگەن اقپاراتتا.
