سارايشىق قالاشىعىنان ادام سۇيەكتەرى مەن كۇمىس مونەتالار تابىلدى

اتىراۋ وبلىسىنداعى سارايشىق قالاشىعىنىڭ ورنىندا ارحەولوگيالىق قازبا جۇمىسى جالعاسىپ جاتىر. جاقىندا ورتاعاسىرلىق تاريحي قالاشىقتىڭ ورنىنان ادام سۇيەكتەرى، كۇمىس، قولا مونەتالار مەن باسقا دا ءتۇرلى جادىگەر تابىلدى، دەپ حابارلايدى Kazinform.

اتىراۋ وبلىستىق تاريحي-ولكەتانۋ مۋزەيىنىڭ ەكسپەديتسيا توبى سارايشىق قالاشىعىنىڭ ورنىندا ارحەولوگيالىق قازبا جۇمىسىن 4-قىركۇيەكتە باستاعان.

وسى كەزگە دەيىن 3 مىڭ شارشى مەتر اۋماقتىقتىڭ ۇستىنگى بولىگى اشىلعان.

«قازبا كەزىندە كوپتەگەن كورحانا انىقتالدى. كۇيدىرىلگەن كىرپىشتەن تۇرعىزىلعان كورحانالاردىڭ كولەمى - 2,5-3 مەتر. ونىڭ بيىكتىگى 3 تەن 12 قاباتقا دەيىن ساقتالعان. كورحانالار تازارتىلىپ، 2 - جانە 8- جەرلەۋ ورنىنان تابىلعان ادام سۇيەكتەرىنە انتروپولوگيالىق زەرتتەۋ جۇمىستارى باستالدى. ادام سۇيەكتەرىنە انتروپولوگيالىق زەرتتەۋدى ءا. مارعۇلان اتىنداعى ارحەولوگيا ينستيتۋتى فيزيكالىق انتروپولوگيا زەرتحاناسىنىڭ مەڭگەرۋشىسى ر. جانۇزاق جۇرگىزىپ جاتىر» دەپ حابارلادى اتالعان مۋزەيدەن.

مۇندا ورتاعاسىرلىق ۇيلەردىڭ ورنى انىقتالعان. قازىر 1200 شارشى مەتر اۋماعى تازارتىلعان.

ورتاعاسىرلىق 10عا جۋىق تۇرعىن ءۇيدىڭ بولمەلەرىندە پەش، تاندىر ورنى، سۋفا (ى س پ ا) ورىندارى ساقتالعان.

«قازبا جۇمىستارى كەزىندە ورتا عاسىرعا جاتاتىن 100 گە كۇمىس، 50 گە جۋىق مىس مونەتا تابىلدى. قىشتان جاسالعان قۇمىرا، شاينەك، كوزە، تۇبەك، ىدىس قاقپاقتارى، بىرنەشە سىرلى ىدىستىڭ بولىكتەرى، شارۋاشىلىق ماقساتتا قولدانىلعان شىراعدان تۇرلەرى، قۇبىر، شىعىر، سفەراكونۋس، اۋ باتىرمالارى، ۇرشىق باسى، سۇيەكتەن جاسالعان شۇمەك، اسىق تابىلىپ وتىر. قولا اينا مەن ونىڭ بولىكتەرى، شىنىدان جاسالعان مونشاق تۇرلەرى دە بار» دەيدى مۋزەي قىزمەتكەرلەرى.

ەسكە سالا كەتەلىك، بۇدان بۇرىن اتىراۋ وبلىسىندا ەجەلگى قورعاننان التىننان جاسالعان اشەكەيلەر تابىلعانىن حابارلاعان ەدىك.