ساراپتاما: قازاقستاندا ءتىس سالدىرۋ قانشا تۇرادى؟
استانا. قازاقپارات - دەنساۋلىعىنا ءمان بەرەتىن ادامداردىڭ وزەكتى ماسەلەلەرىنىڭ ءبىرى - ءتىس ساۋلىعى. قازاقستاندا ءتىس سالدىرۋعا قانشا اقشا كەتەدى؟ ستوماتولوگيالىق قىزمەتتەر نەلىكتەن قىمبات تۇرادى؟ ەلىمىزدە كىمدەر ءتىسىن تەگىن ەمدەتە الادى؟ تولىعىراق تومەندەگى ماتەريالدا.
يمپلانت ءتىس سالدىرۋ ماسەلەسى تۋىنداماس ءۇشىن ءتىستى جۇلىپ تاستايتىن جاعدايعا جەتكىزبەۋ ماڭىزدى. ەگەر ءتىسىڭىز اۋىرىپ، دارىگەرگە بارساڭىز جانە ول ءتىستى جۇلۋ كەرەگىن ايتسا، نە ىستەۋ كەرەك؟ ستوماتولوگتاردىڭ ساراپتامالىق قاۋىمداستىعى رەسپۋبليكالىق قوعامدىق بىرلەستىگىنىڭ پرەزيدەنتى، مەديتسينا عىلىمدارىنىڭ كانديداتى جانە 36 جىلدىق تاجىريبەسى بار ستوماتولوگ مەيرام راگانين وسى جانە باسقا دا ماڭىزدى سۇراقتارعا جاۋاپ بەردى.
ستوماتولوگ ءتىستى جۇلۋ كەرەگىن ايتسا، نە ىستەۋ كەرەك؟
ستوماتولوگ مەيرام راگانين دارىگەر قانداي جاعدايدا ءتىستى جۇلۋ كەرەگىن ايتاتىنىن ءتۇسىندىردى.
«ستوماتولوگيادا كەز كەلگەن مەديتسينالىق سالاداعى سەكىلدى ءتىستى ءساتتى ەمدەۋ مۇمكىندىگى وتە از دياگنوزدار بار. مىسالى، تىسجەگى بولعان كەزدە ەشكىم ءتىستى جۇلمايدى، پەريودونتيتتە دە ءتىستى ەمدەۋگە تىرىسىپ، تاعى ءبىراز ۋاقىت تۇرۋعا مۇمكىندىك بەرۋگە بولادى. ال پەريوستيت كەزىندە ءتىستى مىندەتتى تۇردە جۇلىپ تاستاۋ كەرەك. سوزىلمالى پەريودونتيت كەزىندە ادەتتە ءتىستى ەمدەۋگە جانە ونى ساقتاپ قالۋعا مۇمكىندىك وتە از، بۇل جەردە ناۋقاستىڭ قالاۋىنا جانە قىمبات ەمدى تولەۋگە دايىن بولۋىنا بايلانىستى. الايدا دارىگەر ول ءتىس ەمدەگەننەن كەيىن قانشا ۋاقىت تۇراتىنىن ناقتى ايتا المايدى»، - دەيدى مامان.
دارىگەر جىل سايىن ستوماتولوگ مامانعا قارالىپ تۇرۋعا كەڭەس بەردى.
«ستوماتولوگ ءتىستى جۇلۋعا كەڭەس بەرسە، ول بۇل سوزىلمالى جۇقپانىڭ وشاعى اعزادا ەكەنىن جانە ول ءتىستى ەمدەسە دە، ونى تولىقتاي جويا المايتىنىن تۇسىنەدى. ويتكەنى ينفەكتسيانىڭ اعزاعا ءتىس كانالدارى ارقىلى اعزا تىنىنە تۇسكەنىنە دارىگەر كىنالى ەمەس. سوندىقتان ەگەر دارىگەر ءتىستى جۇلۋعا كەڭەس بەرسە، بۇل جاعدايدا بۇل ەڭ ءساتتى ەم بولعانى.
ەگەر ادام تىستەرىن ساقتاپ قالعىسى كەلسە، ەڭ الدىمەن اۋىز قۋىسى گيگيەناسىن ساقتاۋ كەرەك جانە جىل سايىن ستوماتولوگ دارىگەرگە قارالىپ تۇرۋ كەرەك. ءتىستىڭ اۋىرعانىن جانە ونىڭ بۇزىلا باستاعانىن كۇتپەڭىز»، - دەپ كەڭەس بەردى مەديتسينا عىلىمدارىنىڭ كانديداتى.
قازاقستاندىقتار ءتىس سالدىرۋعا قانشا اقشا جۇمساپ ءجۇر؟
بۇل سۇراققا جاۋاپ الۋ ءۇشىن يمپلانت ءتىس سالدىرعان بىرنەشە كەيىپكەرمەن سويلەستىك.
اقەركە 37 جاس (الماتى قالاسى): مەن بىلتىر 4 يمپلانت ءتىس سالدىردىم. جازدىڭ باسىندا باستاپ، قىسقا تامان اياقتادىق. ءار تىسكە 200 مىڭ تەڭگەدەن سۇرادى، سوندا 4 ءتىس 800 مىڭ تەڭگەگە شىقتى. ءبىرىنشى يمپلانتتىڭ ءوزىن سالىپ، سودان كەيىن التى اي كۇتەدى. سەبەبى ول قىزىل ەتكە ورنىعۋ كەرەك. ەشقانداي تەرىس اسەر بەرمەي مە، جاعا ما، جوق پا، باقىلايدى. سودان سوڭ ۇستىنە كورونكاسىن، ياعني ءتىستى سالىپ بەرەدى.
مارجان، 53 جاس (الماتى قالاسى): مەن 2019 -جىلى ءتىس سالدىرتتىم. 6 يمپلانت ءتىس قوندىرۋعا 1500000 تەڭگە كەتتى. قازىر باعا ودان دا قىمبات شىعار.
نۇرسۇلۋ، 30 جاس (اقتوبە قالاسى): مەن بيىل 2 يمپلانت ءتىس سالدىرتتىم. ءبىر ءتىس شامامەن 250 مىڭ تەڭگە، الايدا باسقا تىستەرىمدى ەمدەۋ كەرەك بولدى، ال كەيبىر تىسكە كورونكا سالۋ قاجەت بولدى. وسىلايشا، بارلىعى 700 مىڭ تەڭگە كەتتى. مەن دەكرەتتەگى انامىن، قولىمدا بىردەن تولەيتىن ونداي سوما جوق. سوندىقتان نەسيە راسىمدەپ، جاساتتىم.
الماتى قالاسىندا يمپلانت ءتىس سالۋ 90000 تەڭگەدەن باستالىپ، 400000 تەڭگەگە دەيىن بارادى.
يمپلانت سالدىرار الدىندا باسقا تىستەر ساۋ بولۋى كەرەك، تىسجەگى بولماۋى كەرەك. ءتىس ەتى قابىنعان بولسا، الدىمەن سونى ەمدەيدى. سودان كەيىن عانا يمپلانت سالۋعا كىرىسەدى. ياعني تەك يمپلانت قۇنىنان بولەك، باسقا تىستەردى ەمدەتۋگە جانە ستوماتولوگ قىزمەتىنە تولەۋىڭىز قاجەت.
مەيرام راگانين يمپلانت تىستەردىڭ باعاسى ونىڭ شىققان جىلىنا جانە دايىندالۋ تەحنولوگياسىنا بايلانىستى ءارتۇرلى بولاتىنىن ايتتى.
«يمپلانت تىستەردىڭ باعاسى ءارتۇرلى. ارزان، ورتاشا جانە پرەميۋم كلاستاعى قىمبات تۇرلەرى بار. بۇل يمپلانتتاردىڭ شىققان ۋاقىتىنا جانە دايىندالۋ تەحنولوگياسىنا بايلانىستى. سوڭعى شىققان يمپلانتتار جانە ولارعا ارنالعان ماتەريالدار قىمبات كەلەدى. دايىندالۋ تەحنولوگياسىنىڭ ساپاسى قانشالىقتى جوعارى بولسا، يمپلانتتىڭ ءتۇسىپ قالۋ قاۋپى سونشالىقتى تومەن بولادى.
ماتەريالدار باعاسىنا يمپلانتولوگ- ستوماتولوگ دارىگەردىڭ باعاسى قوسىلادى. بۇل سالادا ەندى جۇمىس ىستەپ باستاعاندار ازىراق باعا سۇراۋى مۇمكىن. ال ەڭبەك ءوتىلى جوعارى مامانداردىڭ جۇمىسى مەن ءبىلىمى قىمباتىراق تۇرادى.
الايدا يمپلانت ءتىستىڭ اۋىز قۋىسىندا تۇرۋ ۋاقىتى - ورتاشا ەسەپپەن 10 جىل. بۇل ۋاقىت اۋىز قۋىسى گيگيەناسىنا جانە جالپى ناۋقاستىڭ دەنساۋلىعىنا بايلانىستى وزگەرۋى مۇمكىن»، - دەيدى ستوماتولوگ.
نەلىكتەن ستوماتولوگيالىق قىزمەتتەر قىمبات تۇرادى؟
ستوماتولوگتاردىڭ ساراپتامالىق قاۋىمداستىعىنىڭ پرەزيدەنتى مەيرام راگانين ستوماتولوگيالىق قىزمەتتەردىڭ باعاسىنا مىنالار كىرەتىنىن ايتتى:
ماتەريال باعاسى. كەز كەلگەن جاقسى مەديتسينالىق ماتەريالدار مەن دارىلەر نارىقتا قىمبات تۇرادى. ستوماتولوگ ءوز جۇمىسى ءۇشىن ءارقاشان ەڭ جاقسىسىن الۋعا تىرىسادى. سەبەبى ول ءوز ەمى ءۇشىن گارانتيا بەرگىسى كەلەدى؛
ستوماتولوگ دارىگەردىڭ ءبىلىمى مەن داعدىلارىنىڭ ءوز باعاسى بار جانە ول ارزان تۇرمايدى. ستوماتولوگيالىق ۋنيۆەرسيتەتتەردەگى ستۋدەنتتەردىڭ وقۋىنىڭ باعاسىنان باستاساق بولادى. وعان ينتەرناتۋرا، ماگيستراتۋرا قوسىلادى. جاڭا ادىستەردى ۇيرەنۋ، قوسىمشا سەمينارلار مەن كونفەرەنتسيالارعا قاتىسۋ قاجەت. ولار دا ارزان تۇرمايدى. الايدا ولار ءبىلىمىڭدى ارتتىرۋ ءۇشىن قاجەت؛
كوممۋنالدى قىزمەتتەر، عيماراتتى جالعا الۋ، ورتا جانە كىشى مەديتسينا قىزمەتكەرلەرى، بۋحگالتەر، زاڭگەر، باسشىعا جالاقى. كلينيكا ۇلكەن بولعان سايىن اكىمشىلىك قىزمەتتەر مەن جارناماعا شىعىندار دا كوپ بولادى؛
سانيتارلىق-گيگيەنالىق نورمالاردىڭ تالاپتارىن ساقتاۋ ۇلكەن شىعىندى قاجەت ەتەدى. بۇل وتە ماڭىزدى شىعىندار؛
جاڭا قۇرىلعىلار، جاڭا قۇرالدار، جاڭا ماتەريالدار ساتىپ الۋ. ولار نارىقتا جىل سايىن قىمباتتاپ جاتىر.
قازاقستاندا ءتىس سالۋ (يمپلانت) قىزمەتىن تەگىن نەمەسە جەڭىلدىكپەن الا الاتىندار بار ما؟
مەديتسينالىق كومەكتى ۇيىمداستىرۋ دەپارتامەنتى بالالار مەن ەرەسەكتەر ءتىسىنىڭ يمپلانتاتسياسى، پروتەزدەۋ اقىلى تۇردە عانا جاسالاتىنىن ايتتى.
قازاقستاندا كىمدەر ءتىسىن تەگىن ەمدەتە الادى؟
ق ر دەنساۋلىق ساقتاۋ مينيسترلىگىنىڭ مەديتسينالىق كومەكتى ۇيىمداستىرۋ دەپارتامەنتى كىمدەر جوسپارلى جانە شۇعىل ستوماتولوگيالىق كومەك الا الاتىنىن اتادى.
ەلىمىزدە جوسپارلى ستوماتولوگيالىق كومەكتى 18 جاسقا دەيىنگى بالالار مەن جۇكتى ايەلدەر الا الادى.
مىنا ساناتتاعى ادامدار مەديتسينالىق كورسەتىلىمدەرى بويىنشا شۇعىل جانە جوسپارلى كومەك الادى:
1. 18 جاسقا دەيىنگى بالالار؛
2. جۇكتى ايەلدەر؛
3. ۇلى وتان سوعىسىنىڭ ارداگەرلەرى؛
4. 1، 2، 3-توپتاعى مۇگەدەكتىگى بار ادامدار؛
5. «التىن القا»، «كۇمىس القا» القالارىمەن ناگرادتالعان كوپبالالى انالار؛
6. اتاۋلى الەۋمەتتىك كومەك الۋشىلار؛
7. جاسى بويىنشا زەينەتكەرلەر؛
8. ينفەكسيالىق، الەۋمەتتىك ءمانى بار اۋرۋلارمەن جانە اينالاسىنداعىلار ءۇشىن قاۋىپ توندىرەتىن اۋرۋلارمەن اۋىراتىن ناۋقاستار؛
9. مۇگەدەكتىگى بار بالاعا كۇتىم جاساۋدى جۇزەگە اسىراتىن جۇمىس ىستەمەيتىن ادامدار؛
10. بالا كەزىنەن ءبىرىنشى توپتاعى مۇگەدەكتىگى بار بالاعا كۇتىم جاساۋدى جۇزەگە اسىراتىن جۇمىس ىستەمەيتىن ادامدار.
شۇعىل ستوماتولوگيالىق كومەك امبۋلاتوريالىق دەڭگەيدە كونسۋلتاتسيالىق-دياگنوستيكالىق كومەك تۇرىندە جانە ستاتسيونارلىق دەڭگەيلەردە كورسەتىلۋى مۇمكىن.
شۇعىل ستوماتولوگيالىق كومەككە نە كىرەدى؟
اسقىنعان ءتىس جەگىسىن ەمدەۋ؛
پۋلپيتتى ەمدەۋ؛
پەريودونتيتتى ەمدەۋ؛
الۆەوليتتى ەمدەۋ؛
نيەۆرالگيانى ەمدەۋ؛
نيەۆريتتى ەمدەۋ؛
ستوماتيتتىڭ ءجىتى تۇرلەرىن ەمدەۋ؛
اۋىر ءتىستى جۇلۋ؛
ابستسەستى اشۋ؛
ودونتوگەندى كيستانى جۇلۋ؛
شىعىپ كەتكەن جوعارعى تومەنگى جاق بۋىنىن ورنىنا كەلتىرۋ؛
قاتەرسىز ىسىكتەردى جانە ءەپۋليستى (جەرگىلىكتى تىتىركەندىرۋشى فاكتورلاردىڭ سالدارىنان تۋىندايتىن ىسىك تارىزدەس وسىندىلەردى) جۇلۋ.
قازاقستاندا ستوماتولوگيالىق قىزمەتتەردىڭ باعاسى باقىلانا ما؟
مەديتسينالىق كومەكتى ۇيىمداستىرۋ دەپارتامەنتىنىڭ مالىمەتىنشە، مەملەكەتتىك مەديتسينالىق ۇيىمدار مەديتسينالىق كورسەتىلگەن قىزمەتتەرگە ارنالعان باعا پرەيسكۋرانتىن «مەملەكەتتىك مۇلىك تۋرالى» قازاقستان رەسپۋبليكاسىنىڭ 2011 -جىلعى 1-ناۋرىزداعى № 413-IV زاڭىنا جانە قازاقستان رەسپۋبليكاسىنىڭ 2015 -جىلعى 29-قازانداعى №375-V كاسىپكەرلىك كودەكسىنە سايكەس ازىرلەيدى. ال مەملەكەتتىك ەمەس مەديتسينالىق ۇيىمدار باعا پرەيسكۋرانتىن جارعىلىق قىزمەتىنە سايكەس ازىرلەيدى.
ستوماتولوگيالىق كومەكتى مەملەكەتتىك ەمحانالاردان دا، ءال م س ق- پەن شارت جاساسقان جەكەمەنشىك ستوماتولوگيالىق كلينيكالاردان دا الۋعا بولادى، وزەكتى تىزبەسىن قوردىڭ رەسمي سايتىنان تابۋعا بولادى.
جاقسى ستوماتولوگتى نەمەسە كلينيكانى قالاي تاڭدايمىز؟
مەيرام راگانين كلينيكانى ەمەس، ءوز دارىگەرىڭىزدى تابۋعا كەڭەس بەردى.
«ءارقاشان ءوز دارىگەرىڭىزدى ىزدەۋ كەرەك. كلينيكالاردى تاڭداۋدىڭ قاجەتى جوق، ول جاقتا دارىگەرلەر مەن مەديتسينا قىزمەتكەرلەرى ءجيى اۋىسىپ تۇرادى. كەيدە ۇزاق ۋاقىتتى الاتىن ەمدى ءبىر دارىگەر باستاپ، ەكىنشىسى اياقتايدى. بۇل دۇرىس ەمەس. دارىگەر ۇلكەن، ورتاشا، كىشكەنتاي كلينيكادا نەمەسە ءوز كابينەتىندە جۇمىس ىستەۋى مۇمكىن. ناۋقاستار اركەز جاقسى دارىگەردىڭ ارتىنان جۇرەدى. مۇنداي دارىگەردى جارناما ارقىلى تاپپايسىز. ادەتتە، ولار جارنامامەن اينالىسپايدى: ولارعا ادامدار ءبىر-بىرىنەن ەستىپ كەلەدى.
%100 ەمدى ۋادە ەتەتىن جارنامالىق روليكتەرگە سەنۋدىڭ قاجەتى جوق. ونىڭ بارلىعى ماركەتينگتىك ادىستەر. ەڭ ءساتتى ەم %85 دان %95 عا دەيىنگى مۇمكىندىكتى قۇرايدى. وكىنىشكە قاراي، ستوماتولوگتار نارىق شارتتارى بويىنشا جۇمىس ىستەيدى، ال كەيبىر ستوماتولوگتار بيزنەس ادىستەرىن قولدانۋعا ءماجبۇر. ءبىراق مەنىڭ ويىمشا، بۇل دۇرىس ەمەس ءتاسىل»، - دەدى ستوماتولوگ.
ستوماتولوگيالىق قىزمەتكە كوڭىلىڭىز تولماسا، قايدا شاعىمدانا الاسىز؟
ستوماتولوگيالىق پروتسەدۋرالاردى ورىنداماس بۇرىن مامان الدىمەن پرەپاراتتارعا اللەرگيالىق رەاكسيانىڭ بار/جوعىن كورسەتەتىن اناليز ناتيجەسىن سۇراۋى قاجەت. پرەپاراتقا اللەرگيا بار بولىپ شىقسا، ول ءتىپتى ناۋقاستىڭ ولىمىنە اكەلۋى مۇمكىن. كەيدە ادامدار ساپاسىز قىزمەتكە تاپ بولىپ جاتادى. مۇنداي كەزدە ق ر د س م مەديتسينالىق جانە فارماتسيەۆتيكالىق باقىلاۋ كوميتەتىنە شاعىمدانا الاسىز.
ەسكە سالايىق، بۇعان دەيىن اتىراۋدا ساپاسىز قىزمەت كورسەتكەن ءتىس ەمحاناسىنىڭ ءىسى سوتتا قارالدى.
ەم جۇرگىزىلگەننەن كەيىن ءتىسىنىڭ اۋىرعانى باسىلماي، ناۋقاس ءتىس ەمحاناسىنىڭ دارىگەرىنە قايتادان بارعان. دارىگەر ءتىستى قاراماي، ونى ءتىسى ىسكەن جاعدايدا قايتا كەلەتىنىن ايتىپ، كەرى قايتارىپ جىبەرگەن. كەيىن ناۋقاس بەتتىڭ ىرىڭدەۋى سالدارىنان وتا جاساتىپ، ۇزاق ۋاقىت ەم العان.
Massaget.kz
