سارا نازاربايەۆا ۇلتتىق گوسپيتالدە ەم الىپ جاتىر
الماتى. KAZINFORM - بۇل تۋرالى قازاقستان پرەزيدەنتىنىڭ ءىس باسقارماسى مەديتسينالىق ورتالىعىنىڭ ۇلتتىق گوسپيتالى اگەنتتىك ساۋالىنا بەرگەن جاۋابىندا حابارلادى.
مەكەمە ديرەكتورى اسحات برالوۆتىڭ جاۋابىنا سايكەس، ناۋقاس مەديتسينالىق كومەك كورسەتۋدىڭ بەكىتىلگەن ستاندارتتارىنا سايكەس جانە بىلىكتى مامانداردىڭ باقىلاۋىمەن ەم الىپ جاتىر.
سونداي-اق اسحات برالوۆ قازاقستان رەسپۋبليكاسىنىڭ قولدانىستاعى زاڭناماسىنا سايكەس، پاتسيەنتتىڭ دياگنوزىنا، دەنساۋلىق جاعدايىنا، ەمدەۋ ادىستەرى مەن ناتيجەلەرىنە قاتىستى مالىمەتتەر دارىگەرلىك قۇپياعا جاتاتىنىن اتاپ ءوتتى.
- مۇنداي دەرەكتەرگە تەك پاتسيەنتتىڭ كەلىسىمىمەن نەمەسە زاڭدا كوزدەلگەن وزگە دە نەگىزدەر نەگىزىندە قول جەتكىزۋگە بولادى. سونداي-اق مەديتسينالىق ەتيكا جانە كاسىبي جاۋاپكەرشىلىك قاعيداتتارىنا سايكەس مەديتسينالىق ۇيىمدار دەربەس مەديتسينالىق دەرەكتەرمەن جۇمىس ىستەۋ كەزىندە قۇپيالىلىق رەجيمىن قاتاڭ ساقتاۋعا مىندەتتى. اقپاراتتى جاريا ەتپەۋ تۋرالى شەشىم ونىڭ جەكە ومىرىنە، جەكە ءومىرىن قۇرمەتتەۋگە جانە ەمدەۋ پروتسەسىنە ىقتيمال ارالاسۋدان قورعاۋعا زاڭدى قۇقىقتارىن قامتاماسىز ەتۋ ماقساتىندا پاتسيەنتتىڭ مۇددەسى ءۇشىن عانا قابىلداندى، - دەدى مەديتسينالىق مەكەمە ديرەكتورى.
ەسكە سالايىق، بۇعان دەيىن ب ا ق- تا نۇرسۇلتان نازاربايەۆتىڭ جارى سارا الپىس قىزىنىڭ ومىردەن وزعانى تۋرالى اقپارات تاراعان بولاتىن. تۇڭعىش پرەزيدەنتتىڭ باسپا ءسوز حاتشىسى ايدوس ۇكىباي بۇل دەرەكتىڭ شىندىققا جاناسپايتىنىن حابارلادى.
