سانكت-پەتەربۋرگتە ترامپتىڭ ارنايى وكىلى پۋتينمەن كەزدەستى
استانا. KAZINFORM - سانكت-پەتەربۋرگتە ا ق ش پرەزيدەنتىنىڭ ارنايى وكىلى ستيۆ ۋيتكوفف رەسەي پرەزيدەنتى ۆلاديمير پۋتينمەن كەزدەستى، وندا ولار ۋكرايناعا قاتىستى ماسەلەنى تالقىلادى.
رەسەي باسشىسىمەن كەزدەسۋدەن بۇرىن ا ق ش اكىمشىلىگىنىڭ وكىلى رەسەيدىڭ شەتەلدەرمەن ينۆەستيتسيالىق-ەكونوميكالىق ىنتىماقتاستىق جونىندەگى پرەزيدەنتتىڭ ارنايى وكىلى جانە رەسەي تىكەلەي ينۆەستيتسيالار قورىنىڭ باسشىسى كيريل دميتريەۆپەن كەلىسسوزدەر جۇرگىزدى.
اق ءۇيدىڭ باسپا ءسوز حاتشىسى كارولين لەۆيتت بۇل كەزدەسۋگە تۇسىنىكتەمە بەرە وتىرىپ، ۋيتكوففتىڭ رەسەيگە ساپارى ۋكرايناداعى اتىستى توقتاتۋعا جانە اقىرىندا بەيبىت كەلىسىمگە جەتۋگە باعىتتالعان تاعى ءبىر قادام ەكەنىن اتاپ ءوتتى. ول ۋيتكوففتىڭ كرەملمەن جانە ۆلاديمير پۋتينمەن تىكەلەي بايلانىس ورناتۋ ءۇشىن رەسەيدە بولعانىن راستادى.
رەسەي پرەزيدەنتىنىڭ باسپا ءسوز حاتشىسى دميتري پەسكوۆ پۋتين مەن ۋيتكوففتىڭ كەزدەسۋ قورىتىندىسى بويىنشا ا ق ش جانە رەسەي باسشىلارىنىڭ تەلەفون ارقىلى سويلەسۋى تەوريالىق تۇرعىدان مۇمكىن ەكەنىن ايتتى.
ەسكە سالساق، ستيۆ ۋيتكوفف سانكت-پەتەربۋرگكە باردى.
بۇعان دەيىن ول 13-ناۋرىزدا ماسكەۋدە بولعان، سول كەزدە ۋيتكوفف رەسەيدىڭ جوعارى لاۋازىمدى شەنەۋنىكتەرىمەن، سونداي-اق پرەزيدەنتپەن كەزدەستى. رەسەي پرەزيدەنتىنىڭ باسپا ءسوز حاتشىسى دميتري پەسكوۆ ستيۆ ۋيتكوففتىڭ رەسەي تاراپىنا ۋكراينا بويىنشا قوسىمشا اقپارات بەرگەنىن، ال رەسەي پرەزيدەنتى ۋيتكوفف ارقىلى ا ق ش- تاعى ارىپتەسىنە اقپارات پەن قوسىمشا سيگنالدار جولداعانىن حابارلاعان ەدى.
اقپان ايىندا ۋيتكوفف رەسەيدە ەسىرتكى كونترابانداسى ءۇشىن سوتتالعان امەريكالىق مارك فوگەلدى ايىرباستاۋ تۋرالى كەلىسسوزدەر جۇرگىزۋ ءۇشىن باردى، سودان كەيىن ەر-ريادتاعى رەسەي - ا ق ش جوعارى دەڭگەيدەگى كەلىسسوزدەرگە قاتىستى.
