كورەيانىڭ Samsung كومپانياسى قازاقستاندا كىر جۋاتىن ماشينە، تەلەديدار شىعارۋى مۇمكىن

استانا. KAZINFORM - قازىر ونەركاسىپ جانە قۇرىلىس مينيسترلىگى اتالعان كومپانيامەن كەلىسسوز جۇرگىزىپ جاتىر. بۇل تۋرالى ۆەدومستۆو باسشىسى قانات شارلاپايەۆ ءمالىم ەتتى.

«ەلىمىزدە تۇرمىستىق تەحنيكا ءوندىرىسى 3,8 ەسە ءوستى. ايتار بولساق، الماتى قالاسىندا Xiaomi تەلەديدار قۇراستىرىپ- شىعارۋ زاۋىتى ىسكە قوسىلدى. تۇركىستاندا كوممەرتسيالىق توڭازىتقىش قۇراستىرۋدى جوسپارلاپ وتىرمىز. سونىمەن قاتار وڭتۇستىك كورەيانىڭ Samsung Electronics جانە قىتايدىڭ HKC كومپانيالارىمەن كەلىسسوز ءجۇرىپ جاتىر»، - دەدى قانات شارلاپايەۆ ۇكىمەت وتىرىسىندا.

ۇكىمەت وتىرىسىنان كەيىن وتكەن باق وكىلدەرى Samsung كومپانياسىمەن جۇرگىزىلىپ جاتقان كەلىسسوزدى تارقاتىپ ايتىپ بەرۋىن سۇرادى.

«Samsung كومپانياسى تاراپىنان قىزىعۋشىلىق بار، ءبىراق كەلىسىمنىڭ قاشان اياقتالاتىنى بەلگىسىز. ەگەر ءبىزدىڭ جوسپار ورىندالسا، ءبىز دە Samsung تۇرمىستىق تەحنيكاسىن شىعاراتىن بولامىز، ناقتى ايتقاندا تەلەديدار، كىر جۋۋ ماشينەسى دەگەندەي. كومپانيا بىزگە كەلۋى ءۇشىن قۇقىقتىق-نورماتيۆتىك قۇجاتتاردى وزگەرتۋىمىز قاجەت»، - دەپ جاۋاپ بەردى ۆەدومستۆو باسشىسى.

بۇعان دەيىن قانات شارلاپايەۆ ۋتيل الىمىنا قارسى پەتيتسياعا قاتىستى قورقىتىپ جاتقان ادامداردىڭ بارىن ايتقان ەدى.

اۆتور
داۋلەت ىزتىلەۋ