«سامۇرىق-قازىنانى» تاراتايىق - ءماجىلىس دەپۋتاتى

استانا. قازاقپارات  - 2024 -جىلعى بيۋدجەتتىڭ اتقارىلۋىن تالقىلاۋعا ارنالعان وتىرىستا ءماجىلىس دەپۋتاتى ءادىل جۇبانوۆ «سامۇرىق- قازىنا اكسيونەرلىك قوعامىن تاراتىپ جىبەرۋدى ۇسىندى.

- كۆازيمەملەكەتتىك سەكتور مەملەكەتتىك ساتىپ الۋ شارالارىنىڭ 60 پايىزىن ءبىر كوزدەن عانا وتكىزگەن. سونشالىق اسىعىس قيمىلدايتىنداي قانداي توتەنشە جاعداي، ۇرىس، سوعىس بولىپ جاتىر؟ سونى تۇسىنبەيمىن. كەمشىلىكتى انىقتاعان ەكەنسىزدەر. ءبىراق ۇسىنىستارىڭىزدى كورىپ وتىرعان جوقپىن. «سامۇرىق-قازىنا» تاپسىرىستىڭ 60 پايىزىن ءبىر كوزگە، «بايتەرەك» 50 پايىزىن ءبىر كوزگە وتكىزگەن. بۇل، ويلاپ قاراساڭىز، بۇكىل ەلدىڭ ۇلتتىق قازىناسىن، بايلىعىن ۇرلاۋعا جەڭىل بولسىن دەپ ءبىر قولعا اكەلىپ بەرگەن. مىناۋ دەگەنىڭ بارىپ تۇرعان ۇرلىق قوي. اي مەن كۇننىڭ امانىندا، تىم-تىرىس، بەيبىت زاماندا 60 پايىز، 50 پايىز ءبىر كوزدەن ساتىپ الۋ دەگەن، مەنىڭشە، ەشبىر زاڭعا كەلمەيدى، - دەگەن ءماجىلىس دەپۋتاتى «سامۇرىق-قازىنا» قورىن تاراتىپ جىبەرۋدى ۇسىندى.

ءادىل جۇبانوۆ «سامۇرىق-قازىنا» اكسيونەرلىك قوعامىن تاراتىپ جىبەرۋدى ۇسىندى.

- جالپى مەن «سامۇرىق-قازىنانىڭ» بولۋىنا قارسىمىن. بۇرىننان ايتىپ كەلە جاتىرمىن، تاراتىلۋ كەرەك. ونداعى ءار مەكەمە باسەكەلى ورتاعا بەرىلىپ، ءوز كۇنىن ءوزى كورۋ كەرەك. جوعارى اۋديتورلىق پالاتانىڭ وسىعان بايلانىستى ۇستانىمى قانداي، - دەپ سۇرادى ول.

جوعارى اۋديتورلىق پالاتا مۇشەسى نۇرلان نۇرجانوۆ ناقتى ۆەدومستۆونىڭ ۇسىنىستارى اۋديت تولىق اياقتالعاننان كەيىن جاريالاناتىنىن ەسكە سالدى.

- تاپسىرىستىڭ 60 پايىزىن ءبىر كوزگە بەرۋ ماسەلەسىنە كەلسەك، بىلتىر دا كوتەرگەنبىز. بيىل دا كوتەرىپ وتىرمىز. ءبىزدى الاڭداتىپ وتىرعان ماسەلەنىڭ ءوزى دە وسى. شىلدە نەمەسە تامىز ايىندا قورعا جۇرگىزىلىپ جاتقان اۋديت اياقتالۋ كەرەك. بارلىق ۇسىنىسىمىز بەن شەشىمدەرىمىزدى سول كەزدە ايتامىز، - دەپ قۇتىلدى جوعارى اۋديتورلىق پالاتا مۇشەسى.

سونداي-اق، ول ۇكىمەت بىلتىر بيۋدجەتتىڭ شىعىس بولىگىن 13 رەت وزگەرتكەنىن اتاپ ءوتتى.

اۆتور

ەسىمجان ناقتىباي