«سامۇرىق-قازىنا» باسشىلارى قانداي كولىك ءمىنىپ ءجۇر
استانا. KAZINFORM - «سامۇرىق-قازىنا» اكسيونەرلىك قوعامى باسشىلاردى كولىكپەن قامتاماسىز ەتۋگە جىلىنا 100 ميلليون تەڭگە جۇمسايدى.
كورپوراتسيانىڭ الەۋمەتتىك ساياسات، كورپوراتيۆتىك باسقارۋ جانە اكىمشىلىك قامتاماسىز ەتۋ دەپارتامەنتى Kazinform ساۋالىنا وسىنداي مالىمەتپەن جاۋاپ بەردى.
ماسەلە قايدان شىقتى؟
بۇگىن «سامۇرىق-قازىنا» اكسيونەرلىك قوعامىنىڭ ساتىپ الۋ ساياساتىنا جاۋاپتى باسشىلارى باسپا ءسوز ءماسليحاتىن وتكىزىپ، ەۋروپا قايتا قۇرۋ جانە دامۋ بانكىنىڭ ستاندارتىنا نەگىزدەلگەن ساتىپ الۋ جۇيەسى وتاندىق وندىرۋشىلەردى قالاي قولداپ جاتقانى تۋرالى مالىمەت ۇسىنعان.
Kazinform ءتىلشىسى قاراپايىم قازاقستاندىقتار ۋتيلالىم، كولىكتى العاشقى تىركەۋ، كەدەندىك راسىمدەۋ تولەمدەرىن تولەۋ ارقىلى وتاندىق اۆتووندىرىسكە قالاي قولداۋ كورسەتىپ وتىرعانىن ەسكەرىپ، قوردىڭ بۇل باعىتتا قانداي ساياسات ۇستاناتىنىن سۇرادى.
ناقتى ايتساق: «سامۇرىق-قازىنا» قورىنىڭ مەنشىگىندە نەشە قىزمەتتىك كولىك بار؟ ونىڭ نەشە پايىزى قازاقستاندا قۇراستىرىلعان؟» - دەگەن سۇراقتار قويىلدى. قوردىڭ ساتىپ الۋ ساياساتىنا جاۋاپتى باسشىلاردىڭ ەشبىرى بۇل سۇراققا سول ساتتە جاۋاپ بەرە الماي، كەيىن جازباشا مالىمەت ۇسىنۋعا ۋادە بەردى.
6 كولىك جالداۋعا جىلىنا 100 ميلليون تەڭگە
جاۋاپتا ايتىلعان اقپاراتقا سەنسەك، قور COVID-19 پاندەمياسى كەزىندەگى ۇنەمدەۋ شارالارىنان كەيىن قىزمەتتىك كولىكتەن تۇگەل باس تارتقان. ونىڭ ورنىنا كولىكتى سىرتتان جالعا الىپ پايدالانادى.
- قور جالعا الىپ وتىرعان اۆتوكولىكتەردىڭ ورتاشا «جاسى» - 5- 6 جىل. 2024 -جىلى جۇرگىزۋشىلەرى بار 6 اۆتوكولىكتى جالعا الۋ ءۇشىن قور 98,5 ميلليون تەڭگە (قوسىلعان قۇن سالىعىن قوسا العاندا) جۇمسادى. 2025 -جىلى جۇرگىزۋشىلەرى بار 6 اۆتوكولىكتى جالعا الۋعا 105 ميلليون تەڭگە (ق ق س قوسا العاندا) جۇمساۋ جوسپارلانىپ وتىر، - دەپ جازىلعان مالىمەتتە.
جاۋاپتاعى مالىمەت بويىنشا جالعا الىنىپ وتىرعان 6 كولىكتىڭ بىرەۋىن - قوردىڭ باسقارما ءتوراعاسى (نۇرلان جاقىپوۆ - رەد.)، ەكەۋىن - قوردىڭ تاۋەلسىز ديرەكتورلارى مىنەدى. ايتا كەتۋ كەرەك، قوردىڭ رەسمي سايتىنداعى مالىمەتتە تاۋەلسىز ديرەكتورلاردىڭ سانى تورتەۋ - ۆونگ حەن فاين، جامىشيەۆ بولات بيداحمەت ۇلى، سۋتەرا لۋكا، مۇحاممەد ءجاميل ءال راماحي.
- قالعان 3 كولىك - كەزەكشى كولىك رەتىندە شارۋاشىلىق قىزمەت كورسەتۋگە ارنالعان، - دەپ جازادى قور دەپارتامەنتىنىڭ ماماندارى.
رەسمي جاۋاپتا جالعا الىنىپ وتىرعان كولىكتىڭ ماركالارى دا كورسەتىلگەن. الايدا قاي باسشى سونىڭ قايسىسىن تىزگىندەيتىنى ناقتىلانباعان. ولار:
Mercedes-Benz
Toyota Camry
Hyundai Sonata
ەسكە سالساق، 2024 -جىلعى بيۋدجەتتىڭ اتقارىلۋىن تالقىلاۋعا ارنالعان وتىرىستا ءماجىلىس دەپۋتاتى ءادىل جۇبانوۆ «سامۇرىق-قازىنا» اكتسيونەرلىك قوعامى تاۋارلار مەن قىزمەتتەردىڭ 60 پايىزىن ءبىر كوزدەن ساتىپ العانىن كەلتىرىپ، قوردى تاراتىپ جىبەرۋدى ۇسىنعان بولاتىن.
اۆتور
ەسىمجان ناقتىباي
