سامارقاندا 7 توننا پالاۋ پىسىرىلمەك

تاشكەنت. قازاقپارات - 1-3-تامىز ارالىعىندا قالادا «سامارقاند پالاۋى» (سامارقاند وشي) فەستيۆالى وتەدى. بۇل تۋرالى SputnikUzbekistan اقپارات اگەنتتىگى وبلىستىق تۋريزم باسقارماسىنىڭ باسشىسى جۋرابەك سۇيىنوۆكە سىلتەمە جاساپ حابارلادى.

فەستيۆال باعدارلاماسىندا 200 دەن استام اسپاز اراسىنداعى بايقاۋلار، پالاۋدىڭ 20 دان استام ءتۇرىن دايىنداۋ، اسپازدىق بويىنشا ساباقتار، ءتۇرلى ەلدەردىڭ ۇلتتىق تاعامدارىن كورسەتۋ، قولونەر بۇيىمدارى مەن شىعىس تاتتىلەرىنىڭ كورمەلەرى، مادەني- ويىن- ساۋىق شارالارى بار.

فەستيۆالدىڭ باستى وقيعاسى «ماڭگىلىك قالا» ساياباعىندا 7 توننا سامارقاند پالاۋىن دايىنداۋ پروتسەسى بولماق.

ەسكە سالا كەتەيىك، 2023 -جىلى ءانديجان وبلىسى يزبوسكان اۋدانى گۇلستان تۇرعىن ءۇي الابىندا 8 توننا پالاۋ ءپىسىرىلدى. 8-جەلتوقساندا اتاپ وتىلەتىن وزبەكستاننىڭ كونستيتۋتسيا مەرەكەسىنە ارنالعان بۇل جاۋاپتى جۇمىسقا 40 اسپاز جۇمىلدىرىلعان.