ۋساما بەن لادەننىڭ ۇلى فرانسيادان دەپورتاتسيالاندى
پاريج. kazinform - فرانسيا ۇكىمەتى «ءال-قايدا» حالىقارالىق لاڭكەستىك ۇيىمىنىڭ بۇرىنعى جەتەكشىسى ۋساما بەن لادەننىڭ ۇلى ومارعا ەلگە كىرۋگە رەسمي تۇردە تىيىم سالدى. بۇل تۋرالى فرانسيانىڭ ىشكى ىستەر ءمينيسترى بريۋنو رەتايو X- تەگى پاراقشاسىندا حابارلادى.
ءمينيستردىڭ ايتۋىنشا، ومار بەن لادەن بىرنەشە جىلدان بەرى فرانسيانىڭ سولتۇستىگىندەگى ورن دەپارتامەنتىندە ايەلىمەن (بريتان ازاماتى) بىرگە تۇرعان. الايدا فرانسۋز ۇكىمەتى بىلتىر الەۋمەتتىك جەلىدە تەرروريزمدى ناسيحاتتايتىن پىكىرلەرىن جاريالاعان سوڭ ونى رەسپۋبليكادان شىعارۋ تۋرالى شەشىم قابىلداۋدى تالاپ ەتكەن. سوت بۇل ءوتىنىشتى زاڭدى دەپ تاپقاننان كەيىن ۇكىمەت وماردىڭ فرانسيادان كەتۋىن قامتاماسىز ەتتى.
- ومار بەن لادەننىڭ فرانسياعا كىرۋىنە اكىمشىلىك تىيىم سالۋ تۋرالى شەشىمنىڭ ارقاسىندا ول قانداي دا ءبىر سەبەپتەرمەن ەلگە ورالا المايدى، - دەدى رەتايو.
اقپارات ءۇشىن، ۋساما بەن لادەن 2001-جىلى 11-قىركۇيەكتە نيۋ-يوركتەگى قوس مۇنارالار جارىلعان لاڭكەستىك ارەكەتتى ءوز موينىنا العان «ءال-كايدا» حالىقارالىق لاڭكەستىك ۇيىمىنىڭ نەگىزىن قالاۋشى جانە بۇرىنعى جەتەكشىسى.
«فرانسۋزدىق «Parisen» گازەتى ومار بەن لادەننىڭ قازىر كاتاردا ەكەنىن، ول ەلدەن شىعارۋ تۋرالى شەشىمگە قارسى اپەللياتسيالىق شاعىم تۇسىرگەنىن، ءبىراق جۇما كۇنى فرانسۋز سوتى ونى قابىلداماعانىن حابارلادى» دەپ جازادى Euronews.
ومار بەن لادەن تاعىلعان ايىپتاردى جوققا شىعاردى.
جەرگىلىكتى Le Publicateur Libre گازەتىنىڭ حابارلاۋىنشا، داۋلى تۆيتتەردەگى پوستتى بەن لادەن 2023-جىلى 2-مامىردا، اكەسىنىڭ تۋعان كۇنىندە جاريالاعان.
ومار ونىڭ اتىنان بەيتانىس ادام جازعانىن العا تارتتى.
- باسقا ەلدەن بوتەن بىرەۋلەر مەنىڭ اتىمدى پايدالانىپ Twitter اككاۋنتىمنىڭ قۇپيا پارولىن بۇزا العان. بۇل مەنىڭ سوزدەرىم ەمەس. مەن بۇل تۋرالى Twitter- گە حابارلادىم جانە ءبىر اپتادان كەيىن اككاۋنت توقتاتىلدى. مەن تەرروريزم مەن زورلىق-زومبىلىقتى شىن جۇرەكتەن قارالايتىنىمدى ادامدارعا ايتقىم كەلەدى، - دەدى ول جۋرناليستەرگە.
ا ق ش ۇكىمەتىنىڭ رەسمي نۇسقاسى بويىنشا، بەن لادەن 2011-جىلى 2-مامىردا پاكىستاننىڭ سولتۇستىك-باتىسىنداعى اببوتاباد قالاسىنداعى ۆيللادا ارنايى وپەراتسيا كەزىندە كوزى جويىلعان.
بۇل اقپاراتتى «ءال-قايدا» دا راستاعان.
