سالىق رەفورماسىنىڭ ينفلياتسياعا اسەرى: تابىسى تومەن جانداردىڭ ءومىرى قيىنداي ما - مينيستر جاۋابى
استانا. KAZINFORM – ق ر پرەمەر-ءمينيسترىنىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين جاڭا سالىق كودەكسى قابىلدانعان سوڭ ينفلياتسيا كۇشەيسە، مەملەكەت الەۋمەتتىك وسال توپتاعى ازاماتتارعا قالاي كومەك كورسەتەتىنىن ايتىپ بەردى.
«اتامەكەن» ق ر ۇلتتىق كاسىپكەرلەر پالاتاسىندا وتكەن باسپا ءسوز ءماسليحاتىندا ب ا ق وكىلدەرى قۇرىلىس سالۋشىلارعا ق ق س ەنگىزىلگەن سوڭ تۇرعىن ءۇي باعاسى شارىقتاپ، الەۋمەتتىك وسال توپتاعى ازاماتتاردىڭ ءومىر ءسۇرۋى قيىنداپ كەتپەي مە دەپ سۇرادى.
- ءبىز بۇل سالانى زەرتتەدىك. 2001-جىلى قۇرىلىسشىلارعا كوپتەگەن جەڭىلدىكتەر بەردىك. ءبىراق سودان بەرى تۇرعىن ءۇي شارشى مەترىنىڭ باعاسى جۇزدەگەن پايىزعا ءوستى. باعانىڭ وسۋىنەن جەڭىلدىكتەر قۇتقارمايتىنىنا كوزىمىز جەتتى. ونداي بولسا، ءبىز ولارعا جەڭىلدىكتەردى نە ءۇشىن بەرگەن بولامىز؟ ونسىز دا باعا وسەدى ەكەن، ەڭ بولماسا سالىق سالىپ، بۇل سالادان پايدا كورەيىك. تۇسكەن قارجىنى الەۋمەتتىك وسال توپتارعا جۇمسايىق، - دەدى ول.
سونداي-اق مينيستر قاجەت بولعان جاعدايدا تابىسى تومەن جاندارعا مەملەكەتتىك قولداۋ دا ارتاتىنىن ايتتى.
- الەۋمەتتىك وسال توپتارعا جانە تابىسى بيۋدجەتكە بايلانىستى بارلىق ادامدارعا كەلەتىن بولساق، ينفلياتسيا ارتسا يندەكستەۋ شارالارى قاراستىرىلعان. ءبىز ول سومانى اتاعانبىز، ول كەمى 800 ميلليارد تەڭگە شاماسىندا بولادى. ءبىز جوعارىدا ايتقان توپتاعى ادامداردى قولداۋ ءۇشىن بۇل سومانى بولۋگە دايىنبىز. قاجەت بولعان جاعدايدا اتاۋلى الەۋمەتتىك كومەك مولشەرىن ۇلعايتامىز. باعا كوتەرىلسە، تۇرعىن ءۇي قورىن مولايتامىز. بۇل رەفورما سونداي مۇمكىندىك بەرىپ وتىر. سوندىقتان ولارعا بۇل وزگەرىس اۋىرتپالىق سالمايدى، - دەدى سەرىك جۇمانعارين.
ايتا كەتەيىك، كەشە مەملەكەت باسشىسى جاڭا سالىق كودەكسىنە قول قويدى.
