سالماق تۇسىرەتىن ءدارى ينفاركت پەن ينسۋلت قاۋپىن ازايتادى

артық салмақ
فوتو زدوروۆوە-پيتانيە. ر ف سايتىنان الىندى

استانا. KAZINFORM - تەرى استىنا سالىناتىن پرەپارات ادامدى ءوزىن توق جانە جاقسى سەزىندىرەدى. سوندىقتان اشتىق سەزىمىن بولدىرمايدى، ادام تاماقتى از جەيدى. بۇل ءدارى سالماق تۇسىرۋگە عانا ەمەس، جۇرەكتىڭ جۇمىسى مەن ينسۋلت قاۋپىن دە ازايتاتىنىن عالىمدار دالەلدەدى.

سەمىزدىكتىڭ بيولوگياسىن وزگەرتەتىن، كوپتەگەن ادامدارعا پايدالى بولاتىن دارىلەر توبى انىقتالدى. سەمىزدىككە قارسى قولدانىلاتىن پرەپاراتتار قاتارى تاعى ءبىر دارىمەن تولىققانىن BBC News جازدى. بريتاندىق سايتتىڭ ماتەريالىنا سۇيەنگەن Aikyn.kz جاڭا ءدارىنىڭ اسەر ەتۋ جولىن تۇسىندىرەدى.

ءبىراق Ozempic قولدانعاندا تەرىنىڭ سوزىلعىشتىعى جويىلادى.

قازىرگى قولدانىستاعى ءدارى-دارمەكتەردى وندىرۋشىلەر قارجىلاندىرعان زەرتتەۋ ناتيجەسىنە سايكەس، ادامدار جاڭا ءدارىنىڭ كومەگىمەن ايتارلىقتاي سالماق جوعالتپاسا دا، جۇرەك سوعىسى مەن ينسۋلت قاۋپىن ازايتۋى مۇمكىن. ماماندار ۇلتتىق دەنساۋلىق ساقتاۋ قىزمەتى (NHS) ۇسىنعان تابەتتى باساتىن Wegovy جانە Ozempic برەندتەرىمەن ساتىلاتىن دارىلىك زات سەماگليۋتيدتى زەرتتەدى.

ولار اپتا سايىن تەرى استىنا سالىناتىن ءدارى ميلليونداعان ەرەسەكتەردىڭ جۇرەك-قان تامىرلارىنىڭ جۇمىسىن جاقسارتاتىنىن انىقتاعان. سوڭعى ناتيجەلەر ءالى جۋرنالداردا جاريالانباسا دا كونفەرەنتسيالاردا تالقىلانعان.

جۇمىستى باسقارعان پروفەسسور دجون دينفيلد سەماگليۋتيد قانداعى قانتقا، قان قىسىمىنا نەمەسە قابىنۋعا وڭ اسەر ەتۋى مۇمكىن ەكەنىن، سونىمەن قاتار جۇرەك بۇلشىق ەتى مەن قان تامىرلارىنا تىكەلەي اسەر ەتەتىنىن ايتادى.

رەاليتي-شوۋ جۇلدىزى كيم كارداشيان دا سالماق تۇسىرۋگە Ozempic قولداندى دەگەن قاۋەسەتتەر بار.

لوندون ۋنيۆەرسيتەتىنىڭ كوللەدجى (UCL) 41-44 جاستاعى 17604 ادامدى قامتىعان زەرتتەۋ سەماگليۋتيدتىڭ جۇرەككە پايداسىن كورسەتكەن. Novo Nordisk قارجىلاندىراتىن Select زەرتتەۋىنىڭ دەرەكتەرى دە ادامنىڭ باستاپقى سالماعىنا نەمەسە قانشا سالماق تۇسىرگەنىنە قاراماستان، اعزاعا وڭ اسەر ەتەتىنىن كورسەتكەن.

زەرتتەۋدىڭ تۇساۋكەسەرى يتاليادا وتكەن ەۋروپالىق سەمىزدىك ماسەلەلەرىنە بايلانىستى كونگرەستە (ECO) ءوتتى. بايانداما جاساعان پروفەسسور دينفيلد قورىتىندىلاردىڭ «ماڭىزدى كلينيكالىق ءمانى» بار ەكەنىن ايتقان.

ول 1990 -جىلدارداعى ستاتيندەر دەپ اتالاتىن حولەستەرينمەن كۇرەسەتىن تابلەتكالاردى ەنگىزۋ سياقتى بۇل دا وتە ماڭىزدى جاڭالىق بولعانىن ايتتى.

«ءبىز سەمىزدىكتىڭ بيولوگياسىن وزگەرتەتىن جانە كوپتەگەن ادامدارعا پايدالى بولاتىن دارىلەر كلاسى بار ەكەنىن انىقتادىق. بۇل كارديولوگيا تاجىريبەسىن وزگەرتكەن ۇلكەن جەتىستىك بولدى. ەندى بىزدە قارتايۋدان بولاتىن كوپتەگەن سوزىلمالى اۋرۋلاردى ەمدەيتىن دارىلەردىڭ توبى بار»، - دەيدى ول.

Wegovy پرەپاراتى دۇرىس ديەتا مەن جاتتىعۋلاردى الماستىرا المايدى.

Wegovy پرەپاراتى گولليۆۋدتىڭ «ارىقتاۋ ينەكسياسى» دەپ اتالاتىن قانت ديابەتىنە قارسى قولدانىلاتىن Ozempic دارىسىنە ۇقساس ينگرەديەنتتەن تۇرادى. دەگەنمەن ساراپشىلار بۇل پرەپاراتتار سالماقتى جىلدام تۇسىرۋگە ارنالماعان، دۇرىس ديەتا مەن جاتتىعۋلاردى الماستىرا المايتىنىن جانە تەك دارىگەردىڭ باقىلاۋىمەن قولدانىلۋى ءتيىس پرەپاراتتار ەكەنىن ەسكەرتەدى.

جالپى، جاناما اسەرلەرگە جۇرەك اينۋى نەمەسە اسقازاننىڭ بۇزىلۋى، كەبۋلەر جانە گاز جاتادى. زەرتتەۋلەر كورسەتكەندەي، ادامدار ەمدەۋدى توقتاتقاننان كەيىن قايتادان سالماق قوسۋى مۇمكىن.

سەماگليۋتيد GLP-1 گورمونىن يميتاتسيالايدى، بۇل ادامدارعا توقتىق سەزىمىن ءبىلدىرىپ، اشتىق سەزىمىن ازايتادى. ونى ارتىق سالماقپەن نەمەسە سەمىزدىكپەن اۋىراتىن ناۋقاستارعا دارىگەر تاعايىنداۋى كەرەك، سودان كەيىن پاتسيەنتتەر الدىن الا ءدارى قۇيىلعان ارنايى قالامساپتاردى پايدالانىپ، اپتاسىنا ءبىر رەت ينەكسيا جاسايدى.

Wegovy ارنايى قالامساپتارمەن تەرى استىنا اپتاسىنا ءبىر رەت ينەكسيا جاساۋ ارقىلى ەگىلەدى.

پروفەسسور دينفيلد: «ارتىق سالماقپەن نەمەسە سەمىزدىكپەن ءومىر سۇرەتىن كوپتەگەن ادامدار سالماعىن جاقسارتۋ ءۇشىن كۇرەسىپ جاتىر، سوندىقتان تەك وسى پرەپاراتتار ماڭىزدى كلينيكالىق مۇمكىندىكتەر ۇسىنادى. ءبىراق بۇل ولاردىڭ نەگىزگى مەديتسينالىق ماسەلەلەرىن جاقسارتاتىن دارىلەر. بۇل شىنىمەن دە وتە قىزىقتى»، - دەدى BBC Radio-4-تىڭ Today باعدارلاماسىنا بەرگەن سۇحباتىندا.

سوڭعى جاڭالىقتار