ساحناداعى 70 جىل: بۇگىن - اسانالى ءاشىموۆتىڭ تۋعان كۇنى
بۇگىن - ابىز تۇلعا اسانالى ءاشىموۆتىڭ تۋعان كۇنى. كوزى تىرىسىندە- اق اڭىز ادامعا اينالعان ساحنا ساڭلاعى «Бүгін LIVE» باعدارلاماسىنا ونلاين بايلانىسقا شىعىپ، سۇحبات بەردى.
- 88 دەگەن وڭاي جاس ەمەس. تۋعان كۇنىممەن حالقىم، دوستارىم قۇتتىقتاپ جاتىر، راقمەت. تۋعان كۇنىڭىز دەپ قۇتتىقتاپ جاتقان حالقىما ريزامىن. تاڭ اتقالى تەلەفونعا تىنىشتىق جوق، - دەدى اكتەر.
ونەردىڭ اقسۇيەگى بۇعان دەيىنگى سۇحباتتارىنىڭ بىرىندە اباي مەن كەنەسارىنىڭ رولىن سومداعىسى كەلەتىنىن ايتقان ەدى. اكتەر توقسانعا تاياسا دا كينوعا تۇسۋگە ءالى دە دايىن ەكەنىن ايتادى.
- ونەر جولىنا كەلگەننەن كەيىن ءومىرىمىز سوڭىنا دەيىن ونەرمەن ءوتتى عوي. سوندىقتان جاقسى ماتەريالدار بولسا، جاقسى رەجيسسۋرا بولسا، مەن كينوعا تۇسۋگە ءار ۋاقىتتا دايىنمىن، - دەيدى ول.
اسانالى ءاشىموۆ العاشىندا اكتەر بولۋدى قالاماعان ەكەن. ءتىپتى ارمان قۋىپ الماتىعا كەلگەندە دە الدىمەن اۋىل شارۋاشىلىعى ينستيتۋتىنا وقۋعا تاپسىرىپتى.
- اۋىلدىڭ بالاسى بولعان سوڭ، باسىندا سول اۋىل شارۋاشىلىعى ينستيتۋتىنا كەلگەنمىن. اكتەرلىك دەگەن ءتىپتى ويدا دا جوق ەدى. اسقار توقپانوۆ ماسكەۋدەن وقۋىن ءبىتىرىپ كەلىپ، سول جىلى كونسەرۆاتوريا جانىنان ءبىر بولىمشە اشتى. كەزدەيسوق سول بولىمشەگە تاپ بولدىق. بۇل ويلاماعان جەردەن بولدى. ايتەۋىر وقۋعا ءتۇسىپ، ءبىر وقۋدى وقۋعا تۋرا كەلدى. اتا-انام ايتقان سوڭ، الماتىدا قالۋ كەرەك بولدى. سولاي تاعدىر مەنى وسى جولعا ايداپ كەلدى. بۇل سالاعا كەلگەنىمە وكىنبەيمىن. ءبىراق باسىندا ونشا قۇلىقتى بولمادىم. ماحابباتپەن كەلگەن جوقپىن. ءبىراق قازىر ماحابباتپەن كەتىپ بارا جاتىرمىز عوي. ونەردى سىيلاپ، ونەردىڭ ۇلى ەكەنىن ءتۇسىنىپ، قازىر سونىڭ سوڭىندا ءجۇرمىز، - دەيدى ونەر يەسى.
70 جىلعا جۋىق عۇمىرىن ونەر سالاسىنا ارناعان اكتەر قازاق كينوسىنىڭ بۇگىنى مەن بولاشاعىنا باعا بەردى.
- قازىر زامان وزگەردى. ءبىز ءارقاشان وپتيميستپىز. جاقسى جاعدايلار بولاتىن شىعار دەگەن ۇمىتتەمىن. قازىر تالپىنىپ كەلە جاتقان جاستار بار. ءبىر جوعارى، ءبىر تومەن تۇسەتىن ۋاقىت بولادى عوي. ونەر دەگەن - سول. سوندىقتان مەن كەلەشەك جاستارعا سەنەمىن. قازىر ونەر وزگەرىپ، العا قاراي تالپىنىپ، ىزدەنىپ كەلە جاتقان كەز عوي. سوندىقتان قازىرگى جاستار بۇرىنعى ۇلىلار سالىپ كەتكەن داڭعىل جولدى قۋىپ، سونى نەگىزگە الا وتىرىپ وسسە، ونسە ءبارى جاقسى بولادى. مەن سوعان تىلەكتەسپىن. جاستار وتكەنىن، تاريحىن ۇمىتپاۋ كەرەك. ونەردىڭ ۇلكەن جولى بار ەكەنىن ەستەن شىعارماۋلارى قاجەت. سوندا كوپ نارسە ورىندالادى، - دەيدى قازاق كينوسىنىڭ الىپ تۇلعاسى.
ونەر ابىزى بۇگىنگە دەيىن «قىز جىبەك»، «اتاماننىڭ اقىرى»، «ترانس ءسىبىر جۇردەك پويىزى»، «ءان قاناتى»، «جاۋشى»، «نان ءدامى»، «قازاقى وقيعا»، «ءسىز كىمسىز، ك. مىرزا؟» جانە «بۇلعارلار تۋرالى بايان» فيلمدەرى ارقىلى قالىڭ كورەرمەننىڭ جۇرەگىنە جول تاپقان. ءول وزى تۇسكەن تۋىندىلاردى ءبولىپ-جارمايتىنىن ايتادى. دەسە دە، جۇرەگىنە جاقىن جوبالارىن دا ءتىزىپ بەردى.
- مەنىڭ 5 بالام بولدى. 5 بالامنىڭ ءارقايسىسىن دا بىردەي جاقسى كورەمىن. سوندىقتان مەنىڭ ىشتەن تۋعان شىعارمالارىمنىڭ بارىنە دە كۇشىم، جۇيكەم جۇمسالدى. سوندىقتان مىناۋ جاقسى، مىناۋ جامان دەپ ايتا المايمىن. ءبىراق سونىڭ ىشىندە ىرىكتەلىپ، حالىقتىڭ الدىنا كوپ بارعان - «قىز جىبەكتەگى» بەكەجان، «اتاماننىڭ اقىرىنداعى» شاديار. ءوزىم تۇسكەن فيلمدەردەن العا شىققانى دا سول - «قىز جىبەك»، «اتاماننىڭ اقىرى»، «ترانس ءسىبىر جۇردەك پويىزى» عوي. مەنىڭ تريلوگيام - وسىلار، - دەيدى اڭىز ادام.
ايتا كەتەيىك، بىرنەشە كۇن بۇرىن قىزىلوردادا اسانالى ءاشىموۆتىڭ قاتىسۋىمەن حالىقارالىق تەاترلار فەستيۆالى وتكەن ەدى.
اۆتور
ارۋجان ماحمۋت
