سادىر جاپاروۆ چولپون-اتادا ق ر سىرتقى ىستەر مينيسترلىگىنىڭ باسشىسىمەن كەزدەستى
استانا. KAZINFORM - قازاقستان رەسپۋبليكاسى پرەمەر-ءمينيسترىنىڭ ورىنباسارى -سىرتقى ىستەر ءمينيسترى مۇرات نۇرتىلەۋ قىرعىز تاراپىنىڭ شاقىرۋىمەن قىرعىز رەسپۋبليكاسىنا رەسمي ساپارمەن باردى، دەپ حابارلايدى Kazinform اگەنتتىگىنىڭ ءتىلشىسى.
قىرعىز رەسپۋبليكاسى پرەزيدەنتى باسپا ءسوز قىزمەتىنىڭ حابارلاۋىنشا، ساپار بارىسىندا مۇرات نۇرتىلەۋ چولپون-اتادا قىرعىزستان پرەزيدەنتى سادىر جاپاروۆپەن كەزدەسىپ، وندا ەكىجاقتى قىزىعۋشىلىق تۋدىراتىن بارلىق سالاداعى قازاق-قىرعىز ەكىجاقتى ىنتىماقتاستىعىنىڭ وزەكتى ماسەلەلەرى، اسىرەسە ەلدەر اراسىنداعى باسىم جوبالاردى ىسكە اسىرۋ، ونىڭ ىشىندە قامبار-اتا گ ە س-1 قۇرىلىسىن سالۋ ماسەلەلەرى تالقىلاندى.
ءوز كەزەگىندە مۇرات نۇرتىلەۋ قازاقستان پرەزيدەنتى قاسىم-جومارت توقايەۆتىڭ سادىر جاپاروۆقا سالەمى مەن ىزگى تىلەگىن جەتكىزدى. ول سونداي-اق مەملەكەت باسشىلارى العا قويعان مىندەتتەردى جۇزەگە اسىرۋ ءۇشىن بار كۇش-جىگەرىن سالۋعا دايىن ەكەنىن ايتتى.
قىرعىزستان پرەزيدەنتى مەملەكەتارالىق قاتىناستاردىڭ دايەكتى كەڭەيۋىنە، ولاردى پراكتيكالىق مازمۇنمەن تولتىرۋعا ىقپال ەتەتىن بارلىق دەڭگەيدەگى ساياسي ديالوگتىڭ قارقىندى تەرەڭدەۋىن اتاپ ءوتتى. سونداي-اق جاپاروۆ قازاقستان سىرتقى ىستەر مينيسترلىگى باسشىسىنىڭ رەسمي ساپارى باۋىرلاستىق قارىم-قاتىناستاردى ودان ءارى نىعايتۋعا، اسىرەسە قازاقستان پرەزيدەنتىنىڭ قىرعىزستانعا الداعى رەسمي ساپارىنا دايىندىق اياسىندا ماڭىزدى ىنتالاندىرۋ بولاتىنىنا سەنىم ءبىلدىردى.
ەسكە سالا كەتەيىك، بۇعان دەيىن قىرعىزستان حالىقارالىق ينتەرنەت-ترافيككە مونوپوليا ەنگىزگەنىن حابارلاعان ەدىك.
