سادىر جاپاروۆ قىرعىزستاندىقتاردى «ماناس» ەپوسى كۇنىمەن قۇتتىقتادى

قىرعىز رەسپۋبليكاسىنىڭ پرەزيدەنتى سادىر جاپاروۆ بۇگىن قىرعىزستاندىقتاردى «ماناس» ەپوسى كۇنىمەن قۇتتىقتادى. Kazinform بۇل تۋرالى كابار اگەنتتىگىنە سىلتەمە جاساپ حابارلايدى.

«قۇرمەتتى قىرعىزستاندىقتار! بۇگىن ۇرپاقتان ۇرپاققا بەرىلىپ، اكەسى ۇلىنا ايتىپ بەرىپ، ونداعان عاسىر بويى حالقىمىزدىڭ جۇرەگىندە ساقتالعان ۇلى «ماناس» ەپوسى كۇنى. «ماناس» ەپوسى - قىرعىز حالقىنىڭ ۇلتتىق ماقتانىشى، رۋحاني مۇراسى، الەمدەگى ۇلتتىق پوەزيا جاۋھارى، حالىق كوپتەگەن عاسىر بويى قاستەرلەپ كەلە جاتقان جولباسشى! ەگەر القىزىل تۋىمىز، ەلتاڭبا مەن ءانۇران مەملەكەتتىڭ سيمۆولى بولسا، «ماناس» ەپوسى - ۇلت بىرلىگى سيمۆولى. قىرعىز حالقىنىڭ عاسىرلاردان جەتكەن ۇلىلىعى مەن بىرلىگى «ماناس» ەپوسىندا سيپاتتالعان. وسى ۇلى بىرلىكتە كوپۇلتتى قىرعىزستاننىڭ ۇلتتىق يدەولوگياسى جاتىر»، دەپ اتاپ ءوتتى قىرعىز پرەزيدەنتى.

سونداي- اق ول «ماناس» ەپوسىن تانىتۋ ءۇشىن قانداي ءىس- شارالار اتقارىلعانىنا توقتالدى.

«2022 -جىلدىڭ 22 -ساۋىرىندە مەن «ماناس» ەپوسى تريلوگياسىن («ماناس»، «سەمەتەي»، «سەيتەك» ەپوستارى) - قىرعىز حالقىنىڭ باعا جەتپەس رۋحاني مۇراسىن جان- جاقتى زەرتتەۋ جانە تانىتۋ بويىنشا قوسىمشا ءىس- شارالار تۋرالى» جارلىققا قول قويدىم. سودان كەيىن كوپ ۇزاماي، 2022 -جىلدىڭ 28 -قىركۇيەگىندە «ماناس» ەپوسىن تانىتۋ جانە عىلىمي زەرتتەۋ ءۇشىن قاجەت كەشەندى جاعدايلار قۇرۋ تۋرالى جارلىقپەن «ماناس جانە شىڭعىس ايتماتوۆ اتىنداعى ۇلتتىق اكادەميا» مەملەكەتتىك مەكەمەسى «ماناس ۇلتتىق اكادەمياسىنا» اينالدى. مەن بۇل قادامدار «ماناس» ەپوسىن كەشەندى زەرتتەۋگە سەپتىگىن تيگىزەتىنىنە سەنىمدىمىن»، - دەپ اتاپ ءوتتى سادىر جاپاروۆ.

اۆتور

بالنۇر قوجاگەلدى