ساۋدا ۆيتسە-ءمينيسترى: رەسەي بىزگە تيەسىلى نارىقتاردى جاۋلاي باستادى

استانا. KAZINFORM - ماجىلىستە قازاقستاننىڭ اۋىل شارۋاشىلىعىنداعى ەكسپورت الەۋەتىنە ارنالعان دوڭگەلەك ۇستەل ءوتىپ جاتىر. جيىندا ساۋدا جانە ينتەگراتسيا ۆيتسە-ءمينيسترى جانەل كۇشىكوۆا رەسەي ەكى اراداعى كەلىسىمدەردى ساقتاي بەرمەيتىنىن ايتتى. 

- قازاقستان ەتىنە دەگەن كورشى ەلدەردىڭ سۇرانىسى جوعارى ەكەنىن كورىپ وتىرمىز. مىسالى، ورتالىق ازيادا حالىق سانىنىڭ وسۋىنە بايلانىستى سۇرانىس سيىر ەتىنە 21 پايىز، قۇتىداعى سۋعا 24 پايىز، وسىمدىك مايىنا 32 پايىز، قانتقا 6,4 ەسە، كارتوپقا 58 پايىز ارتقان. سونداي-اق، اۋعانستانعا ەكسپورت كولەمىن ۇلعايتساق دەگەن جوسپارىمىز بار، - دەگەن ۆيتسە-مينيستر قىتاي نارىعىنىڭ الەۋەتىن ءالى دە يگەرە ءتۇسۋ كەرەكتىگىنە توقتالدى.

ونىڭ سوزىنشە، قازاقستاننىڭ اۋىل شارۋاشىلىعىنداعى ەكسپورتتىق الەۋەتىن تولىق ىسكە اسىرۋدا كەيبىر ماسەلەلەر بار.

- ارينە، جوعارىدا ايتىلعان مۇمكىندىكتەرمەن بىرگە قاتەرلەر دە بار. نەگىزگى قاتەر سالاداعى ءىرى ەكسپورتتاۋشى ەلدەردەن قىسىم بايقالىپ وتىر. مىسالى، رەسەي فەدەراتسياسى سانكسيا شەكتەۋلەرىنە بايلانىستى قازاقستانعا تيەسىلى بولىپ ەسەپتەلگەن نارىقتارعا كوبىرەك شىعىپ جاتىر. بۇل تۇستا، ارينە، بىزگە باسەكەلەسۋ كەرەك. ءبىراق، اۋىل شارۋاشىلىعى تاۋارىنىڭ باستى ەرەكشەلىگى ۆەتەريناريا، فيتوسانيتاريا سياقتى باعىتتارداعى كەلىسىمدەر ەكىجاقتىڭ ماقۇلداۋى بويىنشا قابىلداناتىنىندا. ايتپەسە قولدا بار كەلىسىمدەر ءسوز جۇزىندە ءوز تاۋارلارىمىزدى كوزدەگەن نارىقتارىمىزعا جەتكىزۋگە مۇمكىندىك بەرەدى، - دەدى ول.

اتالعان جيىندا قازاقستاننىڭ قىتايعا ەكسپورتتايتىن اۋىل شارۋاشىلىعى داقىلدارىنىڭ كولەمى ارتاتىنى ايتىلدى.

اۆتور

ەسىمجان ناقتىباي