ساۋدا ۇستەمەسىن اسىرىپ قوسقان كاسىپكەرلەر جاۋاپكەرشىلىككە تارتىلدى

استانا. KAZINFORM - جىل باسىنان الەۋمەتتىك ماڭىزى بار ازىق-تۇلىككە قاتىستى ساۋدا ۇستەمەسىنىڭ مولشەرىن بۇزعانى ءۇشىن 1470 اكىمشىلىك شارا قابىلداندى. بۇل تۋرالى ساۋدا جانە ينتەگراتسيا مينيسترلىگىنەن ءمالىم بولدى.

- جىل باسىنان بەرى مينيسترلىكتىڭ اۋماقتىق دەپارتامەنتتەرى ق ر اكىمشىلىك قۇقىق بۇزۋشىلىق تۋرالى كودەكسىنىڭ 204-4-بابى بويىنشا كاسىپكەرلىك سۋبەكتىلەرىنە قاتىستى الەۋمەتتىك ماڭىزى بار ازىق-تۇلىككە ساۋدا ۇستەمەسىنىڭ مولشەرىن بۇزعانى ءۇشىن قازاقستان رەسپۋبليكاسىنىڭ زاڭناماسىنا سايكەس، 1470 اكىمشىلىك شارا قابىلدادى (2024 -جىلى 1055 اكىمشىلىك شارا). ونىڭ ىشىندە كاسىپكەرلىك سۋبەكتىلەرى زاڭدى قايتالاپ بۇزعانى ءۇشىن 242 اكىمشىلىك شارا قابىلدادى، ياعني كاسىپكەرلەرگە ساۋدا ۇستەمەسىنىڭ رۇقسات ەتىلگەن مولشەرىن ساقتاماعانى ءۇشىن ايىپپۇل سالىندى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

سونىمەن قاتار، الەۋمەتتىك ماڭىزى بار ازىق-تۇلىككە شەكتى ساۋدا ۇستەمەسىنىڭ ساقتالۋىنا مەملەكەتتىك باقىلاۋدى كۇشەيتۋ ماقساتىندا جاۋاپكەرشىلىكتى قاتاڭداتۋ بويىنشا قولدانىستاعى زاڭناماعا تۇزەتۋلەر ازىرلەندى.

- اتاپ ايتقاندا، ەسكەرتۋ اكىمشىلىك ايىپپۇلمەن اۋىستىرىلدى. بۇل تۇزەتۋ وسى جىلدىڭ 13- ناۋرىزىندا كۇشىنە ەنگەن. ەندى شەكتى ساۋدا ۇستەمەسىن ساقتاماعانى ءۇشىن شاعىن كاسىپكەرلىك سۋبەكتىلەرىنە - 5، ورتا كاسىپكەرلىككە - 35 جانە ءىرى كاسىپكەرلىككە 150 ايلىق ەسەپتىك كورسەتكىش قاراستىرىلعان. ءبىر جىل ىشىندە قايتا بۇزىلعان جاعدايدا شاعىن - 10، ورتا - 70 جانە ءىرى كاسىپكەرلىك 300 ايلىق ەسەپتىك كورسەتكىش سوماسىندا ايىپپۇل تولەيدى، - دەپ اتالىپ وتكەن ۆەدومستۆو اقپاراتىندا.

بۇعان دەيىن ەلىمىزدەگى دۇكەن سورەلەرىندەگى ازىق-تۇلىكتىڭ نەشە پايىزى وتاندىق وندىرۋشىلەرگە تيەسىلى بولۋى كەرەك ەكەنىن جازعان ەدىك.

اۆتور

رۋسلان عابباسوۆ