ساۋدا مينيسترلىگى ترامپتىڭ جاڭا باج سالىعىنا قاتىستى مالىمدەمە جاسادى
استانا. KAZINFORM - قازاقستان رەسپۋبليكاسى ساۋدا جانە ينتەگراتسيا مينيسترلىگىنىڭ ا ق ش- تىڭ ءبىرقاتار تاۋارعا جاڭا كەدەندىك باجدار ەنگىزۋىنە قاتىستى مالىمدەمەسى جاريالاندى.
- ا ق ش تاراپىنان قابىلدانعان جاڭا ساۋدا شارالارىن الدىن الا تالداۋ ناتيجەسىندە، قازاقستاننان ا ق ش- قا ەكسپورتتالاتىن تاۋارلارىنىڭ ەلەۋلى بولىگىنە قوسىمشا تاريفتەردىڭ اسەرى بولمايتىنى انىقتالدى. ويتكەنى ولار ا ق ش اكىمشىلىگىنىڭ نورماتيۆتىك اكتىلەرىندە كوزدەلگەن ەرەكشەلىكتەر تىزىمىنە ەنگىزىلگەن، - دەپ جازىلعان حابارلامادا.
قازاقستان رەسپۋبليكاسىنىڭ ۇلتتىق ستاتيستيكا بيۋروسىنىڭ مالىمەتتەرى بويىنشا، 2024-جىلدىڭ ناتيجەسى بويىنشا قازاقستان مەن ا ق ش اراسىنداعى تاۋار اينالىمى 4,2 ميلليارد ا ق ش دوللارىن قۇرادى، بۇل وتكەن جىلمەن سالىستىرعاندا %4 عا ارتىق (4,1 ميلليارد ا ق ش دوللارى). قازاقستاننىڭ ا ق ش- قا ەكسپورت كولەمى 2024-جىلى %30,6 عا ارتىپ، 2,0 ميلليارد ا ق ش دوللارىن قۇرادى. ا ق ش- تان قازاقستانعا يمپورت كولەمى 2,2 ميلليارد ا ق ش دوللارى بولدى.
- قازاقستاننىڭ ا ق ش- قا ەكسپورت قۇرىلىمىندا نەگىزگى ورىن الاتىن تاۋارلار - شيكى مۇناي، ۋران، كۇمىس، فەرروسپلاۆتار جانە باسقا دا تاۋارلار. بۇل ساناتتاعى ونىمدەر ا ق ش پرەزيدەنتىنىڭ «تاۋارلار ساۋداسىنداعى ماڭىزدى جانە تۇراقتى تاپشىلىقتى جويۋ ماقساتىندا ءوزارا تاريفتەر ارقىلى يمپورتتى رەتتەۋ تۋرالى» جارلىعى بويىنشا ەرەكشەلىكتەر تىزىمىنە ەنگىزىلگەن تاۋارلاردىڭ %92 ىن قۇرايدى، - دەلىنگەن ساۋدا مينيسترلىگىنىڭ مالىمدەمەسىندە.
قوسىمشا باجدار بەلگىلى ءبىر تاۋار توپتارىنا قاتىستى ەنگىزىلەتىن بولادى. بۇل ساناتتاعى تاۋارلاردىڭ ەكسپورت كولەمى بىلتىر 95,2 ميلليون ا ق ش دوللارىن قۇرادى. ولاردىڭ ىشىندە - فوسفور (2024-جىلى ەكسپورت كولەمى 15,9 ميلليون ا ق ش دوللارى)، فەرروسيليتسي (12,7 ميلليون ا ق ش دوللارى)، لينزالار (4,1 ميلليون ا ق ش دوللارى)، ءبيداي كلەيكوۆيناسى (4 ميلليون ا ق ش دوللارى)، امموني نيتراتى (2,4 ميلليون ا ق ش دوللارى).
قابىلدانعان تاريفتىك شارالار قازاقستاننىڭ ا ق ش- قا جالپى ەكسپورتىنىڭ تەك %4,8 ىنا عانا اسەر ەتەدى. ۇكىمەت قازاقستانعا قاتىستى قوسىمشا باجداردى قولدانباۋ مۇمكىندىگىن تالقىلاۋ ءۇشىن ا ق ش تاراپىمەن كونسۋلتاتسيالار جۇرگىزۋگە نيەتتى.
- قازاقستان رەسپۋبليكاسى 10 جىل بويى دۇنيەجۇزىلىك ساۋدا ۇيىمىنىڭ (د س ۇ) مۇشەسى بولىپ كەلەدى جانە سىرتقى ساۋدا ساياساتىن جۇزەگە اسىرۋدا ۇيىمنىڭ پرينتسيپتەرىن قاتاڭ ۇستانادى. ا ق ش- پەن ەكىجاقتى ىنتىماقتاستىق اياسىندا قازاقستان حالىقارالىق مىندەتتەمەلەرگە سايكەس ساۋدادا تەڭ جانە كەمسىتۋشىلىككە جول بەرمەيتىن جاعدايلاردى قامتاماسىز ەتەدى، - دەلىنگەن ۆەدومستۆادا.
ەسكە سالا كەتەيىك، بۇعان دەيىن ترامپ مەملەكەتتەرگە بارلىق سالانى قامتيتىن باج سالىعىن ەنگىزۋدى جوسپارلاپ وتىرعانىن جازعان ەدىك.
