ساۋد ارابياسىنىڭ سۇڭقارلار كلۋبى قازاقستاندا سيرەك كەزدەسەتىن قۇستاردى تابيعاتقا قايتاردى
استانا. KAZINFORM - ساۋد ارابياسىنىڭ سۇڭقارلار كلۋبى قازاقستاننىڭ «التىن ەمەل» مەملەكەتتىك ۇلتتىق تابيعي پاركىندە يتەلگىلەردى تابيعي ورتاسىنا قايتارۋ ءىس-شاراسىن وتكىزدى.
«Haddad» حالىقارالىق باعدارلاماسى اياسىندا جۇزەگە اسقان بۇل باستاما جويىلىپ بارا جاتقان سۇڭقار تۇقىمداس قۇستاردى ءوز مەكەنىنە قايتا ورنالاستىرۋدى جانە ولاردىڭ تابيعي ءوسىم دەڭگەيىن ارتتىرۋدى كوزدەيدى، دەپ حابارلايدى UNA.
مامانداردىڭ ايتۋىنشا، «التىن ەمەل» ۇلتتىق پاركى كەزدەيسوق تاڭدالعان جوق. بۇل ايماق يتەلگىلەردىڭ ۇيا سالۋ كەزەڭىنە وتە قولايلى، اشىق لاندشافتى جانە قورەك قورلاردىڭ مولدىعىمەن ەرەكشەلەنەدى.
ءىس-شارا بارىسىندا ساۋد ارابياسى سۇڭقارلار كلۋبى ءتوراعاسىنىڭ ورىنباسارى احمەد ءال-حابابي بۇل جوبانىڭ ەكولوگيالىق تەپە-تەڭدىكتى ساقتاۋداعى ماڭىزىنا توقتالدى.
- بۇگىندە يتەلگىلەر جويىلىپ كەتۋ قاۋپى بار جابايى تىرشىلىك يەلەرىنىڭ قاتارىنا جاتادى. وسىعان بايلانىستى ساۋد ارابياسىنىڭ سۇڭقارلار كلۋبى «Haddad» باعدارلاماسىن ىسكە قوستى. ءبىزدىڭ ماقساتىمىز - سۇڭقارلاردىڭ تابيعاتتاعى تۇراقتىلىعىن قولداۋ. باعدارلامانىڭ ىشكى باعىتى اياسىندا ءبىز شەتەلدىك سەرىكتەس مەملەكەتتەر اۋماعىندا يتەلگى مەن لاشىن سانىن كوبەيتەمىز، ال حالىقارالىق باعىتتا قازاقستان سياقتى ەلدەردە يتەلگى مەن ساپساندى ءوز تابيعي مەكەنىنە قايتا جەرسىندىرەمىز، - دەيدى سۇڭقارلار كلۋبىنىڭ ءتوراعاسى.
قازاقستاندىق تاراپ بۇل باستامانى جوعارى باعالاپ، ەكى ەل اراسىنداعى ەكولوگيالىق ىنتىماقتاستىقتىڭ ماڭىزدى قادامى ەكەنىن اتاپ ءوتتى. قانات بوزىمبايەۆ ساۋد ارابياسىنا تابيعاتتى قورعاۋعا قوسقان ۇلەسى ءۇشىن العىس ايتتى.
- «التىن ەمەل» قورىعىنىڭ اسپانىنا قايتادان جان ءبىتىرىپ، يتەلگىلەردى ۇشىرعاندارىڭىز ءۇشىن العىسىمىز شەكسىز. بۇل - سيرەك كەزدەسەتىن قۇستاردى جويىلىپ كەتۋدەن ساقتاپ قالۋعا باعىتتالعان جومارتتىق پەن قامقورلىقتىڭ بەلگىسى. بۇل قادام كەلەشەك ۇرپاق ءۇشىن باعا جەتپەس سىي بولماق، - دەيدى ول.
ءوز كەزەگىندە «التىن ەمەل» مەملەكەتتىك ۇلتتىق تابيعي پاركىنىڭ باسشىسى قۋات بايتۇربايەۆ تا العىسىن ايتىپ، قۇستاردىڭ الداعى ۋاقىتتا تۇراقتى باقىلاۋدا بولاتىنىن جەتكىزدى.
- ءبىز ساۋد ارابياسىنىڭ سۇڭقارلار كلۋبىمەن بىرلەسە وتىرىپ، بۇل قۇستاردىڭ قاۋىپسىزدىگىن قامتاماسىز ەتەمىز. رەزەرۆات اۋماعىندا يتەلگىلەردىڭ كوبەيۋ پروتسەسىن ءجىتى قاداعالاپ وتىراتىن بولامىز. بۇل يگى باستامانىڭ ءبىزدىڭ قورىقتا جۇزەگە اسقانىن ماقتان تۇتامىز، - دەيدى قۋات بايتۇربايەۆ.
ايتا كەتەيىك، سالتاناتتى شاراعا ساۋد ارابياسىنىڭ قازاقستانداعى ەلشىلىگى، ۇلتتىق جابايى تابيعاتتى دامىتۋ ورتالىعى، سونداي-اق قازاقستان رەسپۋبليكاسى ەكولوگيا جانە تابيعي رەسۋرستار مينيسترلىگى مەن زوولوگيا ينستيتۋتىنىڭ ماماندارى قاتىستى.
بۇعان دەيىن تۇركىستان وبلىسىندا سۇڭقار تەكتەس قۇستاردىڭ سانى ازايىپ كەتكەنىن حابارلاعان بولاتىنبىز.
