ساعاتىنا جىلدامدىعى 600 شاقىرىمدىق پويىز جۇرت نازارىن اۋداردى - شەتەلدەگى قازاق باسپا ءسوزى
استانا. KAZINFORM - Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
وزبەكستان حالقىنىڭ سانى جىلمەن سالىستىرعاندا 2 پايىزعا وسكەن - ءوزا
وزبەكستان رەسپۋبليكاسىنىڭ مەملەكەتتىك ستاتيستيكا كوميتەتىنىڭ مالىمەتىنشە، 2025 -جىل 1-شىلدەدەگى جاعداي بويىنشا ەلدىڭ تۇراقتى حالقىنىڭ سانى 37859698 ادام بولدى.
جىل باسىندا بۇل كورسەتكىش 37,5 ميلليون بولعان. دەمەك، التى اي ىشىندە حالىق سانى شامامەن 360 مىڭ ادامعا ارتقان، دەپ جازادى «ءوزا» اقپارات اگەنتتىگى.
حابارلامادا ايتىلۋىنشا، گەندەرلىك قۇرىلىم بويىنشا: ايەلدەر - 18,8 ميلليون، ەرلەر - 19,1 ميلليون.
تۇرعىلىقتى جەرىنە قاراي: قالالىق تۇرعىندار - 19,3 ميلليون، اۋىل تۇرعىندارى - 18,6 ميلليون ادام.
ايتا كەتەيىك، 2024 -جىلدىڭ وسى كەزەڭىمەن سالىستىرعاندا 2 پايىزعا جوعارى. مۇنداي ءوسىم ەلدە تابيعي دەموگرافيالىق ءوسىم مەن كوشى- قون ۇدەرىستەرىنىڭ تۇراقتى تۇردە جالعاسىپ جاتقانىن كورسەتەدى.
ساعاتتىق جىلدامدىعى 600 شاقىرىمدىق پويىز جۇرت نازارىن اۋداردى- CNR
بەيجىڭدە 12-دۇنيەجۇزىلىك جوعارى جىلدامدىقتى تەمىرجول كونفەرەنسياسى ءوتىپ جاتىر جانە 600 ك م/ساع جىلدامدىقتاعى اسقىن وتكىزگىش ەلەكترلىك جوعارى جىلدامدىقتى پويىزى دا وسى كونفەرەنتسيادا تۇڭعىش رەت كورسەتىلدى. بۇل تۋرالى قىتايدىڭ «ورتالىق حالىق راديوسى» حابارلادى.
اتالعان باسىلىمنىڭ مالىمەتىنشە، بۇل جوعارى جىلدامدىقتى پويىزبەن جول اراسىندا كونتاكتىسىز جۇمىس ىستەۋگە قول جەتكىزىلەدى. كولىك تومەن جىلدامدىقپەن جۇرگەندە، ول رەزەڭكە دوڭگەلەكتەرمەن جۇرەدى. 150 ك م/ساع جىلدامدىققا جەتكەننەن كەيىن رەزەڭكە دوڭگەلەكتەر تارتىلادى.
قاراپايىم رەلستى كولىكتەرمەن سالىستىرعاندا بۇل ماگنيتتى قالقىما پويىزداردىڭ جوعارىعا كۇشتى ورمەلەۋ قابىلەتى بار، بۇرىلۋ راديۋسى شاعىن، جوعارى قوزعالىس جىلدامدىعى، تومەن شۋىل، جوعارى قاۋىپسىزدىك جانە مەحانيكالىق توزۋ، جوندەۋ جانە تەحنيكالىق قىزمەت كورسەتۋ شىعىندارىنىڭ تومەندىگى سياقتى ارتىقشىلىقتارى بار.
قازاقستاندىق 13 كاسىپكەر چيڭداۋدا ءبىلىمىن تولىقتىردى - «حالىق گازەتى»
29-ماۋسىم مەن 4-شىلدە ارالىعىندا قىتاي- شاڭحاي ىنتىماقتاستىق ۇيىمىنىڭ ەكونوميكا جانە ساۋدا ينستيتۋتىندا «قىتاي- قازاقستان اۋىلشارۋاشىلىق كاسىپورنى جەرگىلىكتى ەكونوميكالىق جانە ساۋدا ىنتىماقتاستىعىنىڭ وقىتۋ كۋرسى (ەكىنشى كەزەڭ)» ءساتتى ءوتتى. بۇل كۋرسقا قازاقستاننان 13 كاسىپكەر قاتىستى، دەپ حابارلايدى «حالىق گازەتى» باسىلىمى.
اتالعان ب ا ق-تىڭ دەرەگىنشە، كۋرسانتتار چيڭداۋ - ش ى ۇ ءىنجۋ- مارجان حالىقارالىق ەكسپو ورتالىعىنا، ش ى ۇ- نىڭ «ءبىر تەرەزەدە» قىزمەت كورسەتۋ پلاتفورماسىنا جانە جەرگىلىكتى كاسىپورىندارعا بارىپ، مال شارۋاشىلىعى تەحنولوگياسىنىڭ دامۋى مەن قىتايدىڭ اقىلدى اۋىلشارۋاشىلىق تەحنولوگياسىن قولدانۋداعى جەتىستىكتەرىمەن تانىسقان.
سونىمەن قاتار، وتكەن جۇمادا ينستيتۋتتا قىتايلىق جانە قازاقستاندىق كاسىپكەرلەر اراسىندا ىسكەرلىك كەزدەسۋ ءوتتى.
قىتايلىق باسىلىمنىڭ كەلتىرگەن دەرەگىنە سۇيەنسەك، ش ى ۇ ەكونوميكا جانە ساۋدا ينستيتۋتى 2022 -جىلى قۇرىلعاننان بەرى 175 وقۋ كۋرسىن وتكىزدى. كۋرستا ش ى ۇ جانە «ءبىر بەلدەۋ، ءبىر جول» بويىنداعى ەلدەردەن شامامەن 12000 كۋرسانت ءبىلىم العان.
سونداي-اق «حالىق گازەتى» باسىلىمىندا «ءبىرىنشى جارتىجىلدىقتا قىتايدىڭ اۆتوموبيل ءوندىرىسى مەن ساتۋ كولەمى العاش رەت 15 ميلليوننان استى» دەگەن تاقىرىپتاعى اقپارات جارىق كوردى.
اتالعان ب ا ق-تىڭ دەرەگىنشە، قىتايدىڭ اۆتوموبيل ونەركاسىبى قاۋىمداستىعىنىڭ 10-شىلدە كۇنى جاريالاعان دەرەكتەرىنە سايكەس، 2025 -جىلدىڭ ءبىرىنشى جارتىجىلدىعىندا قىتايدىڭ اۆتوموبيل ءوندىرىسى مەن ساتىلىمىنىڭ كولەمى العاش رەت 15 ميلليون اۆتوموبيلدەن اسقان. بۇل وتكەن جىلدىڭ سايكەس كەزەڭىمەن سالىستىرعاندا ەكى تاڭبالى وسىمگە قول جەتكىزدى. اۆتوموبيل ونەركاسىبى قارقىندى دامۋدى جالعاستىرىپ كەلەدى.
ءبىرىنشى جارتىجىلدىقتا قىتايدىڭ اۆتوموبيل ءوندىرىسى مەن ساتۋ كولەمى سايكەسىنشە 15,621 ميلليون جانە 15,653 ميلليون بولدى. ولاردىڭ ىشىندە جاڭا ەنەرگەتيكالىق كولىكتەردىڭ ءوندىرىسى مەن ساتىلىمى سايكەسىنشە 6,968 ميلليون جانە 6,937 ميلليون بولدى. كورسەتكىش وتكەن جىلدىڭ وسى كەزەڭىمەن سالىستىرعاندا سايكەسىنشە 41,4 پايىز جانە 40,3 پايىزعا ءوستى. ال جاڭا ەنەرگەتيكالىق كولىكتەر جاڭا كولىكتەرىنىڭ جالپى ساتىلىمى 44,3 پايىزعا جەتتى.
يران باتىس ازياداعى تاريحي رەكوردى بار باۋىر ترانسپلانتاتسياسى بويىنشا كوشباسشى -ParsToday
تەھراننىڭ يمام حومەيني اۋرۋحاناسى باۋىر ترانسپلانتاتسياسى بويىنشا 2000-وپەراتسياسىن جاساي وتىرىپ، يراننىڭ باتىس ازيا ايماعىندا مۇشەلەردى ترانسپلانتاتسيالاۋ بويىنشا جەتەكشى ورتالىقتاردىڭ ءبىرى رەتىندە تانىتتى، دەپ جازدى ParsToday اقپارات اگەنتتىگى.
ParsToday اقپارات اگەنتتىگىنىڭ مالىمەتىنشە، يمام حومەيني اتىنداعى اۋرۋحانانىڭ باۋىر ترانسپلانتاتسياسى ءبولىمىنىڭ مەڭگەرۋشىسى، دوكتور ءالي دجافارياننىڭ ايتۋىنشا، يران تۇركيامەن بىرگە باتىس ازياداعى باۋىر ترانسپلانتاتسياسى سالاسىنداعى العاشقى ەلدەردىڭ ءبىرى جانە جاسالعان ترانسپلانتاتسيا ناتيجەلەرى الەمدىك ستاندارتتارعا سايكەس كەلەدى. تەگەرانداعى يمام حومەيني اۋرۋحاناسى ايىنا 15-20 باۋىر ترانسپلانتاتسياسىن جاساپ، باسقا ەلدەرگە قاراعاندا تومەن باعامەن جوعارى ساپالى قىزمەت كورسەتەدى. بۇل ۇلكەن جەتىستىك 2001 -جىلدان بەرى وسى يراندىق ورتالىقتىڭ مەديتسينالىق توبىنىڭ تىنىمسىز تالپىنىستارىنىڭ جەمىسى.
دوكتور دجافاريان باۋىر ترانسپلانتاتسياسىن الەمدەگى ەڭ كۇردەلى جانە ستراتەگيالىق ەمدەۋ ادىستەرىنىڭ ءبىرى دەپ باعالادى.
ونىڭ ايتۋىنشا، كوپتەگەن ەلدە ارنايى ينفراقۇرىلىمنىڭ بولماۋىنا بايلانىستى بۇل ەمدەۋ ءتۇرىن ورىنداۋ مۇمكىن ەمەس. باقىتىمىزعا وراي، يران باتىس ازيا ايماعىندا وتە ماڭىزدى ورىنعا يە.
سونداي-اق وسى اپتادا ParsToday-دە «يراندىق زەرتتەۋشى COVID-19 مەن قاتەرلى ىسىككە ارنالعان ءدال ءۇي تەستىن ويلاپ تاپتى» دەگەن تاقىرىپتاعى اقپارات جاريالاندى.
كەلتىرىلەگەن دەرەكتەرگە سۇيەنسەك، ۇيدەگى سىناقتار تۇماۋ مەن COVID-19 دياگنوستيكاسىنىڭ قاراپايىم جانە وڭاي شەشىمى، ءبىراق ولار وتە ءدال ەمەس. وسىعان بايلانىستى جانە بەيسەنبى كۇنگى ParsToday حابارىنا سايكەس، يراندىق زەرتتەۋشى كاميار بەحرۋزي ۇيدەگى جىلدام سىناقتاردى COVID سياقتى ۆيرۋستارعا 100 ەسە سەزىمتال ەتەتىن ارزان بيوسەنسورلىق تەحنولوگيا تۇرىندەگى جاڭا قۇرالدى ۇسىنعان.
بۇل دياگنوستيكالىق ءادىس سونىمەن قاتار قۋىق استى بەزىنىڭ قاتەرلى ىسىگى جانە سەپتيتسەميا سياقتى باسقا دا ءقاۋىپتى اۋرۋلاردىڭ جىلدام سكرينينگىن قامتاماسىز ەتە الاتىنى ايتىلعان.
تۇركيانىڭ سىرتقى ىستەر ءمينيسترى ورىس جانە قازاق ارىپتەستەرىمەن كەزدەستى- TRT
تۇركيانىڭ سىرتقى ىستەر ءمينيسترى حاكان فيدان برازيليانىڭ ريو-دە-جانەيرو قالاسىندا وتكەن BRICS سامميتى اياسىندا رەسەيدىڭ سىرتقى ىستەر ءمينيسترى سەرگەي لاۆروۆپەن كەزدەستى.
ديپلوماتيالىق دەرەككوزدەرگە قاراعاندا، فيدان مەن لاۆروۆ ەكىجاقتى ساياسي جانە ەكونوميكالىق ماسەلەلەردى، سونداي-اق ەنەرگەتيكا سالاسىنداعى ىنتىماقتاستىقتى تالقىلاعان.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
اتالعان ب ا ق-تىڭ مالىمەتىنشە، مينيسترلەر ايماقتاعى يزرايلدىڭ كۇشەيىپ كەلە جاتقان اگرەسسياسىنان تۋىندايتىن قاۋىپتەر، گازا سەكتورىنداعى سوڭعى وقيعالار، يراننىڭ يادرولىق ىستەرى جانە اۋعانستانداعى جاعداي سياقتى وڭىرلىك ماسەلەلەر بويىنشا پىكىر الماسقان.
سونداي-اق فيدان برازيليادا قازاقستاننىڭ پرەمەر-ءمينيسترىنىڭ ورىنباسارى جانە سىرتقى ىستەر ءمينيسترى مۇرات نۇرتىلەۋمەن كەزدەسكەن.
«TRT»-نىڭ دەرەگىنشە، ەكى كۇندىك BRICS سامميتى جەكسەنبى كۇنى باستالدى. ءىرى دامۋشى ەكونوميكالاردىڭ كوشباسشىلارى جاھاندىق قاۋىپسىزدىك، باسقارۋ رەفورماسى جانە ەلدەر اراسىنداعى ىنتىماقتاستىق ماسەلەلەرىن تالقىلاۋ ءۇشىن جينالدى.
ايتا كەتەيىك، تۇركيا BRICS-كە قوسىلۋعا ءوتىنىش بەردى جانە بيىلعى سامميتكە ارنايى شاقىرتۋ العان.
اۆتور
بەيسەن سۇلتان ۇلى
