ساۋالناما: قىتاي جاھاندىق قولداۋدا ا ق ش-تى باسىپ وزدى

استانا. KAZINFORM - امەريكالىق Morning Consult كوممەرتسيالىق زەرتتەۋ كومپانياسىنىڭ دەرەكتەرىنە سايكەس، قىتايدىڭ الەمدىك دەڭگەيدەگى بەدەلى وڭ كورسەتكىشكە اۋىسسا، ا ق ش-تىڭ بەدەلى العاش رەت تەرىس مانگە ءتۇستى.

ساراپشىلار مۇنى ا ق ش- تىڭ قازىرگى اكىمشىلىگىنىڭ تاريفتىك ساياساتىنىڭ سالدارى دەپ باعالاپ وتىر. بۇل تۋرالى Lianhe Zaobao باسىلىمى حابارلادى.

امەريكالىق Axios جاڭالىقتار سايتىنىڭ حابارلاۋىنشا، بيىل مامىر ايىنىڭ سوڭىنا دەيىنگى مالىمەتتەر بويىنشا قىتايدىڭ جاھاندىق تازا بەدەل يندەكسى 8.8+ گە جەتكەن، ال ا ق ش- تىكى 1.5 بولدى. 2024 -جىلدىڭ قاڭتارىندا ا ق ش- تىڭ بۇل كورسەتكىشى 20 + دان جوعارى بولعان، ال قىتايدىڭ كورسەتكىشى تەرىس ماندە تۇرعان ەدى.

Morning Consult بۇل زەرتتەۋدى بيىل 1 -قاڭتار مەن 30 -ءساۋىر ارالىعىندا جۇرگىزىپ، 41 ەلدە 4900-دەن استام ەرەسەك ادامنان ساۋالناما العان. ايتا كەتۋ كەرەك، ا ق ش پەن قىتايدىڭ ءوز ىشىندەگى رەسپوندەنتتەردىڭ پىكىرى ەسەپكە الىنباعان.

زەرتتەۋ ناتيجەلەرى بويىنشا، 41 ەلدىڭ ىشىندە 38 مەملەكەتتە ا ق ش- قا دەگەن وڭ كوزقاراس تومەندەگەن، ال 34 ەلدە قىتايعا دەگەن وڭ كوزقاراس ارتقان. ا ق ش- قا دەگەن پىكىردىڭ جاقسارۋى تەك رەسەيدە تىركەلگەن، بۇل كورسەتكىش دونالد ترامپتىڭ 2025 -جىلعى قاڭتاردا پرەزيدەنتتىككە قايتا ورالۋىنان كەيىن وزگەرگەن.

زەرتتەۋ بارىسىندا 16 مەملەكەت «قىتايشىل» ۇستانىمعا اۋىسقان. وسىلايشا، قىتايدى قولدايتىن ەلدەر سانى 29-عا جەتكەن. ولاردىڭ قاتارىندا نورۆەگيا، نيدەرلاند، يسپانيا، كانادا جانە گەرمانيا سياقتى مەملەكەتتەر بار. بۇعان قوسا، بۇرىننان قىتايدى قولدايتىن كەيبىر ەلدەردە بۇل باعىتتاعى ۇستانىم ءتىپتى كۇشەيە تۇسكەن.

قازىرگى تاڭدا «ا ق ش- تى قولدايتىن» ەلدەر سانى نەبارى 13 بولىپ وتىر، ولاردىڭ قاتارىندا اۋستراليا، ءۇندىستان، جاپونيا جانە وڭتۇستىك كورەيا بار. دەگەنمەن ەسەپتە بۇل ەلدەردىڭ شامامەن ۇشتەن بىرىندە ا ق ش- قا دەگەن كوزقاراستىڭ تۇراقسىز ەكەنى اتاپ وتىلگەن.

ساراپشىلاردىڭ پىكىرىنشە، ا ق ش بەدەلىنىڭ كۇرت تومەندەۋىنىڭ نەگىزگى سەبەبى - ترامپ اكىمشىلىگىنىڭ ەنگىزگەن كەدەندىك باج سالىعى ساياساتى.

ەسكە سالا كەتەيىك، 2 -ساۋىردە ترامپ ءبىرقاتار ەلگە قارسى كەدەندىك تاريفتەر ەنگىزەتىنىن جاريالاعان بولاتىن. كەيىننەن، الداعى 90 كۇندە جاڭا باج سالىعىن ەنگىزۋدى توقتاتا تۇرۋ تۋرالى شەشىم قابىلدانىپ، بازالىق تاريف مولشەرىن %10 دەڭگەيىندە ساقتاۋ تۋرالى مالىمدەگەن.

مامىر ايىنىڭ باسىندا شۆەيتساريانىڭ جەنيەۆا قالاسىندا ا ق ش پەن قىتاي اراسىندا وتكەن كەلىسسوزدەر بارىسىندا قوس تاراپ 90 كۇندىك ءوزارا تاريفتىك جەڭىلدىككە كەلىستى. ا ق ش تاراپىنان ەنگىزىلگەن كەدەندىك الىمدار %30- عا دەيىن قىسقارتىلسا، قىتاي دا ا ق ش- قا قارسى بۇرىن ەنگىزىلگەن %125- دىق سالىقتى %10- عا دەيىن تومەندەتۋگە كەلىستى.

بۇعان دەيىن ا ق ش قىتايدىڭ كەيبىر تاۋارلارىنا باج سالىعىن 31- تامىزعا دەيىن توقتاتقانىن جازعان بولاتىنبىز.

اۆتور

دانا نۇرباقىت