سۋ تاسقىنىنان زارداپ شەككەن 17 مىڭنان استام وتباسىنىڭ باسپانا ماسەلەسى شەشىلدى - پرەزيدەنت
استانا. KAZINFORM - كوكتەمگى سۋ تاسقىنىنان زارداپ شەككەن 17 مىڭنان استام وتباسىنىڭ باسپانا ماسەلەسى شەشىمىن تاپتى. بۇل تۋرالى اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مەملەكەت باسشىسى قاسىم-جومارت توقايەۆ ايتتى.
«الەۋمەتتىك جاعىنان از قامتىلعان ازاماتتاردىڭ تۇرعىن ۇيگە قولجەتىمدىلىگىن ارتتىرۋ ءۇشىن اۋقىمدى جۇمىس جۇرگىزىلۋدە. وسى ماقساتتا «وتان»، «ناۋرىز» جانە «اسىل مەكەن» جەڭىلدەتىلگەن يپوتەكالىق باعدارلامالارى اشىلدى. سونداي-اق كوكتەمگى سۋ تاسقىنىنان زارداپ شەككەن 17 مىڭنان استام وتباسىنىڭ باسپانا ماسەلەسى شەشىمىن تاپتى»، - دەدى پرەزيدەنت.
مەملەكەت باسشىسى اگروونەركاسىپ كەشەنىنە جان-جاقتى قولداۋ كورسەتىلىپ جاتقانىن باسا ايتتى.
«نەگىزگى ماقساتىمىز - اۋىل شارۋاشىلىعىنىڭ دامۋىنا سەرپىن بەرۋ. بۇگىندە جاھاندىق ازىق-تۇلىك قاۋىپسىزدىگى يندەكسىندەگى ەلىمىزدىڭ كورسەتكىشتەرى جاقسارىپ كەلەدى. 2022 -جىلى وسى رەيتينگتە 32- ورىنعا شىقتىق. قازاقستان ت م د ەلدەرى ىشىندە كوش باستاپ تۇر. ءبىراق جايباراقات وتىرۋعا بولمايدى. اۋىل شارۋاشىلىعى باسەكەگە قابىلەتتى وزىق سالا بولۋى كەرەك. اگروونەركاسىپ كەشەنى ەكونوميكاداعى باستى قوزعاۋشى كۇشتىڭ بىرىنە اينالۋعا ءتيىس. بيزنەس تە، مەملەكەت تە وسىعان مۇددەلى. بۇل، ەڭ الدىمەن، ازىق-تۇلىك قاۋىپسىزدىگىن قامتاماسىز ەتۋ تۇرعىسىنان ماڭىزدى. اۋىلداعى اعايىننىڭ تۇرمىسى دا وسى سالاعا تىكەلەي بايلانىستى»، - دەدى قاسىم-جومارت توقايەۆ.
ديقاندارعا جەڭىلدەتىلگەن نەسيەگە بولىنەتىن قارجى كولەمى 1,5 تريلليون تەڭگەگە جەتكىزىلەدى.
«اگروونەركاسىپ كەشەنىن قارجىلاندىرۋ اقساپ تۇرعان سالانىڭ ءبىرى ەدى. بيىل مەملەكەت بۇل ماسەلەنى شەشىپ، بولىنەتىن قارجى كولەمىن ايتارلىقتاي ارتتىردى. ءبىز پايىزدىق مولشەرلەمەمەن سۋبسيديالاۋ ارقىلى نەسيەلەۋدىڭ كۇردەلى ءارى كولەڭكەلى جۇيەسىنەن باس تارتتىق. ديقاندار ەندى كوكتەمگى ەگىن ەگۋ جانە جيىن- تەرىن جۇمىستارىنا 5 پايىز مولشەرلەمەمەن تىكەلەي جەڭىلدەتىلگەن نەسيە الادى. مۇنداي نەسيەلەۋ كولەمى العاش رەت جارتى تريلليون تەڭگەدەن استى، الداعى ۋاقىتتا بۇل كورسەتكىش ءبىر جارىم تريلليون تەڭگەگە دەيىن جەتكىزىلەدى»، - دەدى قاسىم-جومارت توقايەۆ.
پرەزيدەنتتىڭ دەرەگىنشە، ءداندى داقىلدار ءتۇسىمى بيىل گەكتارىنا 16 سەنتنەردى قۇرادى.
«بۇل كوپجىلدىق ورتاشا كورسەتكىشتەردەن الدەقايدا جوعارى. كەيبىر القاپتان گەكتارىنا 40 سەنتنەردەن نەمەسە ودان دا كوپ ءونىم جينالدى. بيداي ساپاسى مەن بالاۋىزىنىڭ دەڭگەيى (32 پايىز) جوعارى. بۇعان زاماناۋي اگروتەحنولوگيالاردى، جوعارى ساپالى تۇقىمدى، تىڭايتقىش پەن پەستيتسيدتەردى پايدالانۋ، سونداي-اق اۋىلشارۋاشىلىق تەحنيكالارىن جاڭارتۋ ارقىلى قول جەتكىزدى»، - دەدى مەملەكەت باسشىسى.
