سۋ تاسقىنىنان جاپا شەككەن 66,4 مىڭ ادام كرەديتىن ءۇش اي تولەمەيتىن بولدى
استانا. KAZINFORM - قارجى نارىعىن رەتتەۋ جانە دامىتۋ اگەنتتىگى سۋ تاسقىنىنان زارداپ شەككەن حالىقتىڭ كرەديتىن تولەۋ مەرزىمىن شەگەردى.
كرەديت بويىنشا تولەم مەرزىمىن كەيىنگە قالدىرۋ مۇمكىندىگى جەرگىلىكتى اتقارۋشى ورگانداردىڭ تىزىمدەرىنە سايكەس سۋ تاسقىنىنان زارداپ شەككەندەرگە جاتقىزىلعان ازاماتتارعا، شاعىن جانە ورتا بيزنەس سۋبەكتىلەرىنە بەرىلەدى.
سونداي-اق، بانكتەر مەن م ق ۇ ازاماتتاردىڭ كرەديتتەردى قايتا قۇرىلىمداۋعا وتىنىشتەردى دەربەس تۇردە قاشىقتان بەرۋىنە ارنالعان ونلاين-سەرۆيستەردى ىسكە اسىردى.
تولەم مەرزىمىن كەيىنگە قالدىرۋ تولەمدى 3 اي مەرزىمىنە (1-ساۋىردەن باستاپ 30 -ماۋسىمعا دەيىن) توقتاتا تۇرۋ ارقىلى ۇسىنىلادى، بۇل ۋاقىتتا ايىپپۇل مەن ءوسىمپۇل ەسەپتەلمەيدى.
بۇگىنگى كۇنى تولەم مەرزىمىن كەيىنگە قالدىرۋ 49,6 ميلليارد تەڭگە سوماسىنا كرەديتى بار زارداپ شەككەن 66,4 مىڭ ازاماتقا بەرىلدى.
بيزنەس سۋبەكتىلەرىنە قاتىستى بانكتەر مەن مقۇ سۋ تاسقىنىنىڭ قارىز الۋشىنىڭ قارجىلىق جانە شارۋاشىلىق قىزمەتىنە اسەرىنە جەكە تالداۋ جۇرگىزەدى.
بۇگىنگى كۇنى كرەديتتىك ۇيىمدارعا زارداپ شەككەن 581 بيزنەس سۋبەكتىسىنە قاتىستى مالىمەت بەرىلدى.
ونىڭ ىشىندە 1,8 ميلليارد تەڭگە سوماسىنا كرەديت بويىنشا جيىنتىق بەرەشەگى بار 68 قارىز الۋشىنىڭ تولەم مەرزىمى كەيىنگە قالدى.
قالعان زارداپ شەككەن بيزنەس سۋبەكتىلەرى بويىنشا تولەم مەرزىمىن كەيىنگە قالدىرۋ تۋرالى شەشىم بەلگىلەنگەن تارتىپپەن قابىلدانادى.
اگەنتتىك بانكتەردىڭ جانە م ق ۇ-نىڭ سۋ تاسقىنىنان زارداپ شەككەن حالىق پەن بيزنەستىڭ كرەديتتەرى بويىنشا تولەم مەرزىمىن كەيىنگە قالدىرۋ مونيتورينگىن جالعاستىرادى.
