سۋ تاسقىنى: وڭىرلەردە 20 مىڭنان استام ۆولونتەر جۇمىس ىستەپ جاتىر
استانا. KAZINFORM - ۇلتتىق ۆولونتەرلەر جەلىسى جەدەل شتابىنىڭ جۇمىسى اياسىندا ەلىمىزدەگى 20 ايماقتىڭ ءارقايسىسىندا وڭىرلىك ۆولونتەرلەر فرونت-كەڭسەسى بازاسىندا call center قۇرىلدى. بۇل تۋرالى مادەنيەت جانە اقپارات مينيسترلىگى مالىمدەدى.
زارداپ شەككەندەرگە كومەك كورسەتىپ، ۆولونتەرلەردى ءبولۋدى ۇيلەستىرۋ ءۇشىن ءبىرىڭعاي بايلانىس ءنومىرى 77087064242+ جۇمىس ىستەپ تۇر.
اقتوبە وبلىسى
وڭىردە 4 مىڭعا جۋىق ۆولونتەرلىق توپتىڭ قاتىسۋىمەن سۋ تاسقىنىنا قارسى بەلسەندى ءىس-شارالار جالعاسىپ جاتىر.
بۇگىندە ولار سۋ باسقان ۇيلەردەن 2 مىڭنان استام تۇرعىندى قاجەتتى كەرەك-جاراقپەن بىرگە ەۆاكۋاتسيالاۋعا كومەك كورسەتتى، ەرىكتى تاكسي جۇرگىزۋشىلەرى تۇرعىنداردى ەۆاكۋاتسيالىق پۋنكتتەرگە تەگىن تاسىمالدادى. سۋ تاسقىنىنان زارداپ شەككەندەرگە كومەك جيناۋ ءجۇرىپ جاتىر. سوڭعى تاۋلىكتە ەرىكتىلەر 6000 ادامعا ىستىق تاماق تاراتتى.
جۇمىس ءالى دە جالعاسىپ جاتىر.
اقمولا وبلىسى
سۋ تاسقىنىنا قارسى ءىس-شارالارعا 200 دەن استام ۆولونتەر قاتىسىپ، زارداپ شەككەن 500 دەن استام ازاماتقا كومەك كورسەتىلدى. سۋ باسقان اۋماقتاردىڭ تۇرعىندارىن ەۆاكۋاتسيالاۋ، ت ج د، باسقا دا قۇتقارۋشى قىزمەتكەرلەرگە ىستىق شاي مەن تاماق ۇيىمداستىرىلدى. كوكشەتاۋ قالاسىندا كوكتەمگى سۋ تاسقىنىنان زارداپ شەككەندەرگە كومەك كورسەتۋ ءۇشىن، قاجەتتى زاتتاردى قابىلداۋ پۋنكتتەرى اشىلدى.
باتىس قازاقستان وبلىسى
300 گە جۋىق ۆولونتەر ت ج د قىزمەتكەرلەرىمەن بىرلەسىپ، سۋ تاسقىنىنا قارسى ءىس-شارالارعا قاتىسىپ، ەۆاكۋاتسيالانعان تۇرعىندارعا جاتىن ورىندارىمەن جانە ازىق-تۇلىكپەن قامتاماسىز ەتىپ جاتىر.
قوستاناي وبلىسى
ەلدى مەكەندەردە 600 ادامعا ىستىق تاماق ۇيىمداستىرىلدى. جوعارى وقۋ ورىندارى مەن كوللەدج ستۋدەنتتەرىن قوسا ەسەپتەگەندە 200 ۆولونتەر تۇرعىن ۇيلەردەن سۋ شىعارىپ، تۇرعىنداردى ءقاۋىپتى جەرلەردەن ەۆاكۋاتسيالىق پۋنكتتەرگە جەتكىزىپ، ازىق-تۇلىك ونىمدەرىن تاسىمالداۋ جۇمىستارىن جاسادى.
جالپى، ەلدەگى ايماقتاردا زارداپ شەككەندەرگە كومەك جيناۋ پۋنكتتەرىنە 20000 ۆولونتەر جۇمىلدىرىلدى. سوڭعى اقپارات بويىنشا 12701 ادام، ونىڭ ىشىندە 4728 بالا ەۆاكۋاتسيالاندى. ۋاقىتشا قونىستانۋ پۋنكتتەرىندە 6461 ادام، ونىڭ ىشىندە 2570 بالا بار. توتەنشە جاعداي باستالعاننان بەرى 4,2 ميلليون م³-تان استام ەرىگەن سۋ سورىلدى.
