سۋ تاسقىنى وتانداستارىمىزدىڭ اۋىزبىرشىلىگى مەن ازاماتتىق جاۋاپكەرشىلىگىن ايقىن كورسەتتى - الەكساندر ۋرماشوۆ
استانا. KAZINFORM - سۋ تاسقىنى وتانداستارىمىزدىڭ اۋىزبىرشىلىگى مەن ازاماتتىق جاۋاپكەرشىلىگىن ايقىن كورسەتتى. مۇنداي پىكىردى قاراعاندى وبلىسىنداعى «اسسامبلەيا جاستارى» ۇيىمى وكىلدىگىنىڭ ءتوراعاسى الەكساندر ۋرماشوۆ ءبىلدىردى.
«قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى 33-سەسسياسى ەلدە جانە الەمدە بولىپ جاتقان جاعدايلاردىڭ اياسىندا ماڭىزدى ساياسي وقيعاعا اينالدى. ىسكەرلىك ستيل مەن ونلاين فورماتتا وتكىزىلگەن سەسسيا ەلدىڭ ىشكى جانە سىرتقى ساياساتىنىڭ كوپتەگەن وزەكتى ماسەلەلەرىنە تولىق ءارى ناقتى جاۋاپ بەردى. سەسسيادا بۇكىل قوعامدى - قۇتقارۋشىلار مەن ەرىكتىلەردى، مەملەكەتتىك قىزمەتشىلەر مەن بيزنەس وكىلدەرىن، ازاماتتىق بەلسەندىلەرى مەن ەلىمىزدىڭ بارلىق ءوڭىرى جاستارىنىڭ بىرىكتىرۋ ماسەلەسىنە باسا نازار اۋدارىلدى»، - دەدى ول سەسسيا وتىرىسىنان كەيىن اگەنتتىك تىلشىسىنە بەرگەن سۇحباتىندا.
سونىمەن قاتار ول سۋ تاسقىنمەن كۇرەسكە قوعام بەلسەندىلەرى زور ۇلەس قوسقانىن، ەرىكتىلەر زارداپ شەككەندەرگە كومەك كورسەتىپ، گۋمانيتارلىق كومەك جيناۋ ىسىنە ۇيىمداستىرىپ جاتقانىن باسا ايتتى.
«بۇل وتانداستارىمىزدىڭ اۋىزبىرشىلىگى مەن ازاماتتىق جاۋاپكەرشىلىگىن ايقىن كورسەتتى. ەڭ باستىسى پرەزيدەنت زارداپ شەككەندەردىڭ بارلىعىنا كەلتىرىلگەن زالال وتەلىپ، بۇل قيىندىقپەن ەشكىم جالعىز قالمايتىندىعىنا سەندىرىپ وتىر. ول ءۇشىن ەلىمىزدە بيۋدجەت شىعىستارى قىسقارتىلىپ، قاراجاتتى ۇنەمدەۋدىڭ قاتاڭ رەجيمى ەنگىزىلەدى. ەل تۇرعىندارىنىڭ قالىپتى ومىرگە مۇمكىندىگىنشە تەزىرەك ورالۋى ءۇشىن مەملەكەت ءبارىن جاسايتىن بولادى»، - دەدى الەكساندر ۋرماشوۆ.
اۆتور
مارلان جيەمباي
