سۋ تاسقىنى: ساياجاي تۇرعىندارى دا باسپانامەن قامتاماسىز ەتىلەدى
استانا. KAZINFORM - سۋ تاسقىنىنان ۇيلەرى بۇزىلعان ادامدارعا باسپانانى ءوز بەتىنشە تاڭداۋ مۇمكىندىگى بولادى. بۇل تۋرالى ق ر ونەركاسىپ جانە قۇرىلىس مينيسترلىگىنىڭ رەسمي وكىلى مەرۋەرت يبرايەۆا ايتتى.
«تۇرعىن ءۇي ماسەلەلەرىن جەدەل شەشۋ ءۇشىن ق ر ونەركاسىپ جانە قۇرىلىس مينيسترلىگى ناقتى تەتىكتەرىن ازىرلەدى. بىرىنشىدەن، سۋ تاسقىنىنان زاقىمدانعان شەككەن ۇيلەردى جوندەۋ ەسكەرىلگەن. تەحنيكالىق بايقاۋ قورىتىندىسى نەگىزىندە جوندەۋگە اكىمدىك مەردىگەرلەرى تارتىلادى نەمەسە ءۇي يەلەرى وتەماقى ەسەبىنەن ۇيلەرىن وزدەرى جوندەۋگە دە مۇمكىندىك الادى. ال، ەگەر ءۇيدى قالپىنا كەلتىرۋ مۇمكىن بولماسا، بۇل ماسەلەنى شەشۋدىڭ ەكى جولى قاراستىرىلعان. ياعني، جاڭا تۇرعىن ءۇي سالۋ، سونداي-اق جىلجىمايتىن مۇلىك نارىعىندا دايىن تۇرعىن ءۇيدى ساتىپ الۋ قاراستىرىلعان. سونىمەن قاتار، ازاماتتاردىڭ باسپانانى ءوز بەتىنشە تاڭداۋعا مۇمكىندىگى بولادى. بۇل جەردە بەكىتىلگەن ستاندارتتى جوبادان اسپايتىن شىعىنداردىڭ ليميتى بار ەكەنىن اتاپ وتكەن ءجون»، - دەدى م. يبرايەۆا ورتالىق كوممۋنيكاتسيالار قىزمەتىندەگى بريفينگىدە.
ونىڭ ايتۋىنشا، سۋ تاسقىنى ورىن العان ايماقتارداعى تۇرعىنداردىڭ جالعىز باسپاناسى رەتىندەگى ساياجايلار دا نازاردان تىس قالمايدى. ساياجاي تۇرعىندارى دا باسپانامەن قامتاماسىز ەتىلەدى.
«تۇرعىن ءۇي قۇرىلىسى اكىمدىكتەر بەكىتكەن تيپتىك جوبالاردى پايدالانا وتىرىپ جۇزەگە اسىرىلادى. تۇرعىن ءۇي قۇجاتتارى بولماعان جاعدايدا، مەنشىك قۇقىعىن «قازاقستان عارىش ساپارى» ۇلتتىق كومپانياسى، «ازاماتتارعا ارنالعان ۇكىمەت» مەملەكەتتىك كورپوراتسياسى، الەۋمەتتىك قورعاۋ، ىشكى ىستەر جانە دەنساۋلىق ساقتاۋ ورگاندارى راستايدى»، - دەدى رەسمي وكىل.
جاڭا تۇرعىن ءۇي سالۋ ءۇشىن ق ر ونەركاسىپ جانە قۇرىلىس مينيسترلىگى ءۇش كليماتتىق شاعىن اۋدان بويىنشا مىناداي پارامەترلەرمەن مەملەكەتتىك ساراپتامانىڭ وڭ قورىتىندىسىن العان تيپتىك جوبالاردى ازىرلەدى:
- اۋدانى 80 شارشى مەتر ءبىر وتباسىلىق تۇرعىن ءۇي. قۇرىلىستىڭ مەرزىمى - 1,5 اي.
- اۋدانى 160 شارشى مەتر ەكى پاتەرلى تۇرعىن ءۇي. قۇرىلىستىڭ مەرزىمى - 2,5 اي.
جوبالار اكىمدىكتەرگە ءارى قاراي ىسكە اسىرۋ ءۇشىن جىبەرىلىپ، جەرگىلىكتى جەردە قايتا پايدالانۋ ءۇشىن مەملەكەتتىك ساراپتاما پورتالىندا ورنالاستىرىلدى.
«جەرگىلىكتى اكىمدىكتەر جەر تەلىمدەرىن انىقتاپ، دايىندىق جۇمىستارىن اتقارىپ جاتىر، ياعني تيپتىك جوبالاردى اۋماقپەن بايلانىستىرۋ جۇمىستارىن، ساراپتاما جۇرگىزۋدى باستايدى. مەملەكەت باسشىسىنىڭ تاپسىرماسىنا سايكەس، مينيسترلىكتىڭ باسشىلىعىمەن 3 جەدەل توپ قۇرىلدى. ونىڭ قۇرامىنا سالالىق مەملەكەتتىك ورگانداردىڭ ۆيتسە-مينيسترلەرى كىردى»، - دەدى مەرۋەرت يبرايەۆا.
اۆتور
رۋسلان عابباسوۆ
