سۋ تاسقىنى سالدارى ەگىن ەگۋ ناۋقانى مەرزىمىنە اسەر ەتپەيدى - ساراپشى
استانا. KAZINFORM - س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى ەگىنشىلىك جانە وسىمدىك شارۋاشىلىعى كافەدراسىنىڭ قاۋىمداستىرىلعان پروفەسسورى ادىلبەك نوعايەۆ ەگىن ەگۋ ناۋقانىنىڭ مەرزىمىنە سۋ تاسقىنى قانشالىقتى اسەر ەتەتىنىن ايتتى.
«بيىل ەلىمىزدە سۋ تاسقىنى جاعدايى وتە قيىن بولدى. سۋ باسقان ايماقتا سولتۇستىك قازاقستان، اقمولا، قوستاناي، اقتوبە وبلىستارى سياقتى استىق سەبەتىن وڭىرلەر بولدى. بۇل رەتتە، اتالعان وڭىرلەردەگى ءبىراز اۋىل شارۋاشىعى تاۋارىن وندىرۋشىلەر مەن فەرمەرلەردە ەگىس جۇمىستارىن ءتيىستى مەرزىمدە وتكىزۋگە قاتىستى سۇراقتار تۋىندادى. ايتا كەتۋ كەرەك، جالپى سۋ تاسقىنى الداعى ەگىن ەگۋ ناۋقانىنا ايتارلىقتاي اسەر ەتپەيدى. ويتكەنى، سۋ تاسقىنىنان زارداپ شەككەن اۋدانداردا سۋ باسقان اۋىل شارۋاشىلىعى القاپتارىنىڭ اۋدانى سونشالىقتى كوپ ەمەس»، - دەدى ءا. نوعايەۆ Kazinform تىلشىسىنە بەرگەن سۇحباتىندا.
ونىڭ ايتۋىنشا، سۋ تاسقىنى سالدارىنان ەگىس ناۋقانىنا كەدەرگى كەلتىرەتىن جىرالار پايدا بولدى. ءبىراق وسىنداي جىرالار كوپ بولماعاندىقتان، ەگىن ەگۋ جۇمىستارىنا ايتارلىقتاي اسەر ەتە قويمايدى.
«سونىمەن قاتار، زارداپ شەككەن وبلىستاردىڭ كەيبىر اۋداندارىندا رەسپۋبليكالىق، وبلىستىق جانە جەرگىلىكتى ماڭىزى بار جولداردى سۋ شايىپ كەتۋىنە بايلانىستى جىرالار پايدا بولدى. ولار كەيبىر ەگىس القاپتارىنا باراتىن جولدا توسقاۋىل بولۋى مۇمكىن. دەگەنمەن، ونداي جەرلەر سونشالىقتى كوپ ەمەس. سوندىقتان، استىق ەگەتىن وڭىرلەردە سۋ باسقان ەگىستىكتەر از اۋماقتى الىپ جاتقانىن ەسكەرسەك، سۋ تاسقىنى اسەر ەتە قويمايدى»، - دەدى ءا. نوعايەۆ.
