سۋ تاسقىنى: س ق و- داعى بولشايا مالىشكا اۋىلىنىڭ تۇرعىندارى قاۋىپسىز جەرگە شىعارىلا باستادى
پەتروپاۆل. KAZINFORM - پەتروپاۆلدا ەسىل وزەنىنىڭ سۋ دەڭگەيى 1181 س م- گە كەلىپ توقتادى. وڭىردە ءالى دە قاۋىپتى جاعداي ساقتالعان.
سولتۇستىك قازاقستان وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بۇگىن تاڭەرتەڭنەن ءتارتىپ ساقشىلارى جەرگىلىكتى اتقارۋشى ورگاندارمەن بىرلەسىپ، قىزىلجار اۋدانى بولشايا مالىشكا اۋىلىنان تۇرعىنداردى قاۋىپسىز جەرگە شىعارا باستادى.
قازىرگى ۋاقىتتا اۋىلدىڭ 20 دان استام تۇرعىنى جاتاقحاناعا ورنالاستىرىلدى، تاعى 50 گە جۋىق ادام ۋاقىتشا تۋىستارىنا كوشتى.
جاعداي باقىلاۋدا. اۋىلدا اۋداندىق پوليتسيا ءبولىمىنىڭ قىزمەتكەرلەرى، سونداي-اق ۆەدومستۆو باستىعى ايدىن قابدۇلدينوۆ باستاعان پ د اپپاراتى جۇمىس ىستەپ جاتىر. پوليتسەيلەر قوعامدىق ءتارتىپتى ساقتاۋدى قامتاماسىز ەتىپ، جەرگىلىكتى بيلىككە جاردەمدەسىپ، حالىققا جان-جاقتى كومەك كورسەتىپ جاتىر.
پوليتسيا قىزمەتكەرلەرى ءۇي-ءۇيدى ارالاپ، تۇرعىندارعا سۋ دەڭگەيىنىڭ كوتەرىلۋىنە بايلانىستى، ۇيلەرىن ۋاقىتشا قالدىرۋ قاجەتتىگىن ءتۇسىندىردى. ءتارتىپ ساقشىلارى مۇلىكتى قاۋىپسىز جەرگە شىعارىپ، تۇرعىنداردىڭ وتىنىشتەرىن ورىنداپ، تۇرمىستىق ماسەلەلەردى شەشۋگە جاردەمدەسىپ جاتىر.
سونداي-اق اۋىل ماڭىنا سۋ كىرمەۋ ءۇشىن ۇيىلگەن ۇيىندىلەر بەكىتىلىپ جاتىر.
تاسقىنمەن كۇرەسكە ۇلتتىق ۇلان اسكەري قىزمەتشىلەرى دە جۇمىلدىرىلعان. ولار 200 مىڭنان استام قۇم-بالشىق تولتىرىلعان قاپشىق دايىندادى.
اۆتور
اقەركە داۋرەنبەك قىزى
