سۋ تاسقىنى: قاي ەلدەردەن گۋمانيتارلىق كومەك جەتكىزىلدى

استانا. KAZINFORM - باتىس قازاقستان وبلىسى اكىمىنىڭ باسپا ءسوز قىزمەتىنىڭ باسشىسى ەرحان تاتكەن وڭىرگە تاسقىنمەن كۇرەسۋ ءۇشىن بارعان اسكەريلەر بىرتىندەپ وزگە ايماقتارعا اتتانىپ جاتقانىن ايتتى.

«وڭىردە جاعداي تۇراقتالىپ كەلەدى. بۇگىن تاڭداعى مالىمەت بويىنشا، جايىق وزەنىندەگى سۋ دەڭگەيى 859 سانتيمەتر بولىپ، 4 سانتيمەتر ءتۇستى. مامانداردىڭ ايتۋىنشا سۋ دەڭگەيى بىرتىندەپ تۇسە بەرەدى.

تاسقىن باستالعاننان بەرى 13980 ادام ەۆاكۋاتسيالاندى، ونىڭ 5782 ءسى - بالالار. بۇگىنگى تاڭدا وبلىس اۋماعىنداعى 12 ەۆاكۋاتسيالىق پۋنكتى 2487 ادام پانالاپ وتىر. ولارعا قاجەتتى زاتتار مەن ازىق-تۇلىكتەر ۋاقىتىلى جەتكىزىلۋدە. تۇرعىندارعا تۇراقتى نەگىزدە مەديتسينالىق باقىلاۋ جۇرگىزىلىپ جاتىر»، - دەدى ەرحان تاتكەن ورتالىق كوممۋنيكاتسيالار ورتالىعىندا وتكەن بريفينگىدە.

سونداي-اق، ول بۇگىنگە دەيىن تاسقىننان زارداپ شەككەن 1541 ادامعا 561 ميلليون تەڭگەدەن استام قارجى تولەنگەنىن ايتتى.

«ەلدىڭ باسقا وبلىستارىنان جانە قىرعىزستان، تاجىكستان، داعىستان سياقتى ەلدەردەن 337 ميلليون تەڭگەنىڭ گۋمانيتارلىق كومەگى كورسەتىلدى.

وڭىردەگى سۋ تاسقىنىنا قارسى شارالارعا 11 مىڭعا جۋىق ادام، 2 مىڭنان استام تەحنيكا جۇمىلدىرىلدى. كەشە ولاردىڭ ىشىنەن 300 گە جۋىق اسكەري وڭىردەگى ميسسياسىن اياقتاپ، ورالدان اتىراۋعا جول تارتتى. ەرتەڭ دە كۇشتىك قۇرىلىمداردىڭ ءبىرقاتار قىزمەتكەرى باسقا وڭىرلەرگە اتتانادى.

قازىر جاعداي ءالى دە باقىلاۋدا. اقجايىق، ءبورلى، بايتەرەك، تەرەكتى اۋداندارى مەن ورال قالاسىندا كەزەكشىلىك جۇرگىزىلىپ جاتىر.

جايىق وزەنىنىڭ بويىندا 142 شاقىرىم دامبى تۇرعىزىلعان»، - دەدى باسپا ءسوز حاتشىسى.