سۋ تاسقىنى: باتىس قازاقستاندا ولگەن مال سانى 1 مىڭنان استى

ورال. KAZINFORM - باتىس قازاقستان وبلىسىندا سۋ تاسقىنىنا بايلانىستى قاۋىپسىز جەرگە شىعارىلعان جانە ولگەن مال سانى ناقتىلانىپ جاتىر.

ب ق و اكىمدىگىنەن تۇسكەن مالىمەتكە قاراعاندا، وڭىردە 26-ناۋرىزدان باستاپ ءبورلى اۋدانىندا اقسۋ، كەڭتۇبەك، قاراعاندى، پۋگاچەۆ، قاراتوبەدە قورجىن، شالعىن، تەرەكتىدە اڭقاتى، سىرىمدا جىمپيتى، بۇلدىرتى، ولەڭتى اۋىلدارىن سۋ باستى.

قۇتقارۋ جۇمىستارى بارىسىندا 983 باس ءىرى قارا (تەرەكتى - 76، سىرىم - 447، ءبورلى - 460)، 1814 ۇساق مال (تەرەكتى - 128، سىرىم - 731، ءبورلى - 955) جانە ءبورلى اۋدانىندا 31 باس جىلقى قاۋىپسىز جەرگە ايدالدى.

اۋدانداردا قۇرىلعان ارنايى كوميسسيا ولگەن مال سانىن ەسەپتەۋ ۇستىندە.

«الدىن الا مالىمەت بويىنشا 91 باس ءىرى قارا، 35 باس جىلقى، 899 باس ۇساق مال (سونىڭ ىشىندە سىرىم اۋدانىندا 43 ءىرى قارا، 141 قوي-ەشكى، 10 جىلقى، تەرەكتىدە 21 ۇساق مال، 1 جىلقى، بورلىدە 42 ءىرى قارا، 679 ۇساق مال، 2 جىلقى، بارلىعى 1025 باس مال) جانە قاراتوبە اۋدانىندا 112 ءۇي قۇسى شىعىنعا ۇشىراعان. ولگەن مال سانىن ناقتىلاۋ جۇمىستارى جالعاسۋدا. وبلىستا سونداي-اق 8 مال مولاسى (قاراتوبە - 1، سىرىم - 6، تەرەكتى - 1) جانە 14 تۇينەمەدەن ولگەن مال قورىمى (سىرىم - 13، تاسقالا - 1) سۋعا كەتتى»، دەپ حابارلادى ۆەدومستۆودان.

ەسكە سالا كەتەيىك، بۇدان بۇرىن ب ق و-نىڭ كازتالوۆ اۋدانىندا وزەن تاسىپ، 22 اۋىلدى سۋ باسۋى مۇمكىن ەكەندىگىن جازعان بولاتىنبىز.

سونداي-اق ورالدا كارديولوگيالىق ورتالىقتا ەمدەلىپ جاتقان ناۋقاستار كوشىرىلدى.

اۆتور

عايساعالي سەيتاق