سۋ تاسقىنى: ايماقتارداعى ەپيدەميولوگيالىق احۋال قانداي
استانا. KAZINFORM - توتەنشە جاعداي رەجيمى جاريالانعان بارلىق وڭىردە قۇتقارۋشىلارمەن قاتار مەديتسينالىق قىزمەتكەرلەر دە تاۋلىك بويى كەزەكشىلىكتە جۇرگەنى بەلگىلى.
زارداپ شەككەن ايماقتاردىڭ ەۆاكۋاتسيالانعان تۇرعىندارى دارىگەرلەردىڭ تۇراقتى باقىلاۋىندا.
ورتالىق كوممۋنيكاتسيالار قىزمەتىندە وتكەن بريفينگتە ق ر دەنساۋلىق ساقتاۋ مينيسترلىگىنىڭ رەسمي وكىلى ايگەرىم ورازاليەۆا مەديتسينالىق كومەككە مۇقتاج ادامدار مامانداندىرىلعان پەدياتريالىق كومەكپەن قامتاماسىز ەتىلۋدە. اسىرەسە، اۋداندىق اۋرۋحانالاردىڭ مەديتسينالىق قىزمەتكەرلەرى ۇلكەن ۇلەس قوسىپ جاتىر.
«اتىراۋ وبلىسىنان ەۆاكۋاتسيالانعان تۇرعىندارعا باعا جەتپەس كومەك كورسەتەتىن دەنساۋلىق ساقتاۋ باسقارماسىنىڭ ۇيلەستىرۋىمەن ماڭعىستاۋ وبلىسىنىڭ مەديتسينا قىزمەتكەرلەرىنىڭ جۇمىسىن اتاپ وتكىم كەلەدى. 3 مىڭعا جۋىق مەديتسينا قىزمەتكەرى مەن 300 گە جۋىق جەدەل مەديتسينالىق جاردەم بريگاداسى اپات ايماقتارىندا ءجۇر. دارىگەرلەر جۇكتى ايەلدەردىڭ، سوزىلمالى اۋرۋلارى بار بالالار مەن قارتتاردىڭ دەنساۋلىعىنا ەرەكشە نازار اۋدارادى. جۇكتى ايەلدەر ءبىرىنشى كەزەكتە سۋ باسۋ ورىندارىنان ەۆاكۋاتسيالاندى، بوسانعان ايەلدەر اۋرۋحاناعا جاتقىزىلدى جانە دارىگەرلەردىڭ باقىلاۋىندا بولادى»، - دەدى ول.
سونداي- اق دەنساۋلىق ساقتاۋ مينيسترلىگى سۋ تاسقىنى بولىپ جاتقان ايماقتارداعى ەپيدەميولوگيالىق جاعداي باقىلاۋدا ەكەنىن ايتتى.
«سۋ تاسقىنى كەزەڭىنە ءتان ينفەكتسيالار بويىنشا جاعداي تۇراقتى دەڭگەيدە قالىپ وتىر. بارلىق نىساندا جۇقپالى اۋرۋلاردىڭ الدىن الۋ ماقساتىندا سەس ورگاندارىمەن اۋىز سۋمەن جابدىقتاۋدى باقىلاۋ كۇشەيتىلگەنىن ەرەكشە اتاپ وتەمىن. سانيتاريالىق- حيميالىق جانە ميكروبيولوگيالىق كورسەتكىشتەرگە اۋىز سۋ سىنامالارىن ىرىكتەۋ جانە زەرتتەۋ تۇراقتى نەگىزدە جۇرگىزىلەدى. سۋدىڭ ساپاسى مەن قاۋىپسىزدىگىن زەرتحانالىق باقىلاۋ ناتيجەلەرى بۇگىنگى كۇنى جۇقپالى اۋرۋلاردىڭ پايدا بولۋ قاۋپى جوق ەكەنىن كورسەتەدى. سۋ تاسقىنى كەزىندە پروفيلاكتيكالىق جانە ەپيدەمياعا قارسى ءىس- شارالاردى جۇرگىزۋ جانە سۋ باسقان ۋچاسكەلەردە اسا قاۋىپتى جانە جۇقپالى اۋرۋلاردىڭ تارالۋىنا جول بەرمەۋ ماسەلەلەرى بويىنشا ۇيىمداستىرۋ- ادىستەمەلىك كومەك كورسەتۋ ءۇشىن وڭىرلەرگە ۇلتتىق قوعامدىق دەنساۋلىق ساقتاۋ ورتالىعىنىڭ ماماندارى جىبەرىلدى»،-دەدى ايگەرىم ورازاليەۆا.
