سۋ تاسقىنى: اتىراۋ وبلىسىنىڭ قىزىلقوعا اۋدانىنداعى 8 وكرۋگكە ءالى دە قاۋىپ بار
اتىراۋ. KAZINFORM - ويىل وزەنىنىڭ ارناسىنان اسقان تاسقىن سۋ قىزىلقوعا اۋدانىنداعى 8 اۋىلدىق وكرۋگكە قاۋىپ ءتوندىرىپ تۇر.
قىزىلقوعا اۋدانى اكىمىنىڭ ورىنباسارى جاراس ەسەنعالييەۆتىڭ ايتۋىنشا، ميالى، جانكەلدين، ويىل، كوزدىعارا، تاسشاعىل، قاراكول، قىزىلقوعا، تايسويعان اۋىلدىق وكرۋگتەرىنە تاسقىن سۋدان تونەتىن قاۋىپ سەيىلمەگەن.
«قىزىلقوعا اۋدانىندا 31-ناۋرىزدا توتەنشە جاعداي جاريالاندى. قازىر ميالى اۋىلىندا قاۋىپ سەيىلدى. ءبىراق، ويىل وزەنىنىڭ بويىنداعى وكرۋگتەرگە قاۋىپ ءتونىپ تۇر. سۋ كىرگەن ەلدى مەكەندەر جوق. كوزدىعارا اۋىلدىق وكرۋگىندەگى قونىس تانۋ اۋىلىندا سايدا ورنالاسقان 4 تۇرعىن ءۇي سۋعا كەتتى. ونىڭ ءبىرى - بوس تۇرعان ءۇي. بۇل ۇيلەردەن 8 تۇرعىن مەن قوراداعى مال قاۋىپسىز ايماققا كوشىرىلدى. قازىر بۇل وكرۋگتە 6 ارنايى تەحنيكا جۇمىس ىستەپ جاتىر. وكرۋگكە تاسشاعىل اۋىلدىق وكرۋگىنەن 2 تەحنيكا كومەككە جىبەرىلدى. بۇل وكرۋگكە قاراستى قوسقۇلاق جانە بۇيرەك ەلدى مەكەندەرىنىڭ تۇرعىندارى مەن مالى ءقاۋىپسىز ايماقتا»، - دەدى جاراس ەسەنعاليەۆ.
اكىم ورىنباسارىنىڭ ايتۋىنا قاراعانجدا، ويىل اۋىلدىق وكرۋگىنە قاراستى بالابەيىت قىستاعى تاسقىن سۋدىڭ قورشاۋىندا قالعان. قۇتقارۋ جاساعى 2 قايىقپەن قىستاقتاعى 11 ادام مەن 173 مالدى قاۋىپسىز اۋماققا شىعارعان.
«اۋداندا توتەنشە جاعداي جاريالانعان سوڭ 31-ناۋرىزدا ميالى اۋىلىنىڭ 654 تۇرعىنى 3 ەۆاكۋاتسيالىق پۋنككە كوشىرىلدى. كەشە بۇل اۋىلعا تونگەن قاۋىپ سەيىلدى. بۇگىن تۇرعىندار ۇيلەرىنە ورالدى. ال، تايسويعان اۋىلدىق وكرۋگىنىڭ 139 تۇرعىنى اتىراۋ قالاسى مەن ميالى اۋىلىنداعى تۋىستارىنىڭ ۇيلنە تاسىمالداندى. بۇگىن كوزدىعارا اۋىلدىق وكرۋگىنىڭ تۇرعىندارى جاڭاشارۋا ورتا مەكتەبىنىنە ەۆاكۋاتسيالانىپ جاتىر»، - دەپ ءمالىم ەتتى جاراس ەسەنعاليەۆ.
سونداي- اق، ويىل وزەنىنىڭ بويىنداعى وزگە ەلدى مەكەندەردىڭ تۇرعىندارىن اۋىلدىق وكرۋگتەرگە كوشىرۋ باستالعان.
«اۋىلداردىڭ ىرگەسىندەگى بوگەتتى بيىكتەتۋ، قاپقا قۇم تولتىرۋ جۇمىسىنا مەكەمەلەردىڭ 1000 عا جۋىق، پوليتسيادان 73، توتەنشە جاعدايلار دەپارتامەنتىنەن 145 قىزمەتكەر، اۋىلداردان 2 مىڭنان استام ەرىكتى، 83 تەحنيكا تارتىلدى. قۇم تولتىرىلعان 55 مىڭ قاپ بوگەتتىڭ وسال تۇستارىنا قويىلدى»، - دەدى اۋدان اكىمىنىڭ ورىنباسارى.
