سۋ تاسقىنى. اقمولانىڭ ستارىي كولۋتون اۋىلىندا كولىك قاتىناسى ءۇزىلدى
استانا. KAZINFORM - قۇتقارۋ جۇمىستارىنا جەكە قۇرامنىڭ 70 كە جۋىق ادامى، 20 ت ج م ارنايى تەحنيكاسى، ج ا و جانە ەرىكتىلەر جۇمىلدىرىلدى، دەپ حابارلايدى اقمولا وبلىسى ت ج د.
قازاقستان ت ج م قۇتقارۋشىلارى اقمولا وبلىسىنىڭ استراحان اۋدانىندا قالقۇتان وزەنىنىڭ تاسۋىنا بايلانىستى كولىك قاتىناسى ۇزىلگەن ستارىي كولۋتون اۋىلىندا جەدەل جۇمىستاردى جالعاستىرىپ جاتىر.
قۇتقارۋشىلاردىڭ ۇيلەسىمدى ارەكەتتەرىنىڭ ارقاسىندا وتكەن تاۋلىكتە 21 ادام، ونىڭ ىشىندە 1 جۇكتى ايەل موتورلى قايىقتاردىڭ كومەگىمەن تاسىمالداندى.
سۋ تاسقىنىنا قارسى جۇمىستاردىڭ بارىسىن ت ج ۆيتسە-ءمينيسترى راميل كامالوۆ تەكسەردى.
- جاعالاۋ سىزىعىن نىعايتۋ جانە ودان ءارى سۋ باسۋعا جول بەرمەۋ ءۇشىن ينەرتتى ماتەريالدارى بار 1000 نان استام قاپ توسەلدى، 300 تەكشە مەتر سۋ سورىلدى. 21 سيىر مەن 100 گە جۋىق قوشقار قاۋىپسىز جەرگە ايدالدى. قۇتقارۋ جۇمىستارىنا جەكە قۇرامنىڭ 70 كە جۋىق ادامى، 20 ت ج م ارنايى تەحنيكاسى، ج ا و جانە ەرىكتىلەر جۇمىلدىرىلدى. جاعداي ت ج م باقىلاۋىندا. قۇتقارۋ جانە نىعايتۋ ءىس-شارالارى تاۋلىك بويى جالعاسىپ جاتىر، - دەلىنگەن حابارلامادا.
اۆتور
اينۇر تۋماكبايەۆا
