سۋ تاسقىنى: 12 رەسپۋبليكالىق جولدا كولىكتەر قوزعالىسى شەكتەلدى
استانا. KAZINFORM - تاسقىن سۋدىڭ سالدارىنان حالىقارالىق جانە رەسپۋبليكالىق اۆتوجولداردى سۋ باسۋدا. سۋ باسقان جولدار تۋرالى «قازاۆتوجول» ۇلتتىق كومپانياسىنىڭ باسپا ءسوز حاتشىسى ساكەن دىلداحمەت ايتىپ بەردى.
«2024 -جىلعى 18-ساۋىردەگى ساعات 14:00 جاعداي بويىنشا حالىقارالىق جانە رەسپۋبليكالىق ماڭىزى بار اۆتوموبيل جولدارىندا اۋا-رايىنىڭ جىلىنۋى مەن قاردىڭ تەز ەرۋى سالدارىنان 3 وبلىستاعى (اقمولا، قوستاناي، س ق و) 8 جول ءجۇرۋ ۋچاسكەسىن 6725 مەتر سۋ باستى. سونىمەن قاتار 5 وبلىستاعى (اقمولا، اقتوبە، اتىراۋ، قوستاناي، س ق و) رەسپۋبليكالىق ماڭىزى بار 12 اۆتوموبيل جولىندا (ۇزىندىعى 720 شاقىرىم) كولىكتىڭ بارلىق ءتۇرىنىڭ قوزعالىسىنا شەكتەۋ قويىلدى»، - دەدى ساكەن دىلداحمەت ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
«قازاۆتوجول» ۇلتتىق كومپانياسىنىڭ مالىمەتىنشە، قازىرگى ۋاقىتتا رەسپۋبليكالىق جولداردا 1945 ادام جانە 794 بىرلىك تەحنيكا سۋ تاسقىنىنىڭ الدىن الۋ جۇمىستارىن اتقارۋدا.
