سۋ قويماسىن سالۋ قىمبات، ءبىراق حالىقتىڭ قاۋىپسىزدىگى ءۇشىن كەرەك - مينيستر
استانا. KAZINFORM – ق ر توتەنشە جاعدايلار ءمينيسترى شىڭعىس ءارىنوۆ ۇكىمەت وتىرىسىندا سۋ تاسقىنى قاۋپىن ءبىرجولا شەشۋگە بولاتىن ۇسىنىمداردى ايتتى.
«كوكساراي سۋ رەتتەگىشىنىڭ قۇرىلىسى سىرداريا وزەنىندەگى 400 دەن استام ەلدى مەكەندى سۋ باسۋ قاۋپىن ءبىرجولا جويۋعا مۇمكىندىك بەردى. بيىل ەسىل وزەنىندە اقمولا جانە سولتۇستىك قازاقستان وبلىستارىنىڭ ەلدى مەكەندەرىن سۋ باسۋ قاۋپىن بولدىرمايتىن ەسىل سۋ رەتتەگىشىن سالۋ جوسپارلانۋدا»، - دەدى مينيستر ۇكىمەتتىڭ بۇگىنگى وتىرىسىندا.
مينيستر رەسپۋبليكا بويىنشا 40 سۋ قويماسىن سالۋ قاجەت ەكەنىن ايتۋدا.
«ءيا، بۇل اكىمدىكتەر ءۇشىن قىمبات بولادى، ءبىراق بۇل حالىقتىڭ قاۋىپسىزدىگىن ارتتىرۋعا جانە ولاردىڭ مۇلكىن جوعالتۋدان تۋىندايتىن الەۋمەتتىك شيەلەنىستى ازايتۋعا مۇمكىندىك بەرەدى. وعان قوسا، جاز مەزگىلىندە اۋىل شارۋاشىلىعى القاپتارىن سۋارۋ ماسەلەلەرىن شەشەدى»، - دەپ ءتۇسىندىردى سپيكەر.
الەمدىك پراكتيكا كورسەتىپ وتىرعانداي، جويۋ شارالارىنا بولىنەتىن قاراجات سوماسى توتەنشە جاعدايلاردى ەسكەرتۋ ءۇشىن الدىن الا پايدالانۋعا بولاتىن قاراجاتتان جۇزدەگەن ەسە كوپ.
«ۇكىمەتتىڭ قاڭتارداعى وتىرىسىندا ءتيىستى باعدارلامالىق قۇجاتتاردا سۋ تاسقىنىنا قارسى شارالاردى جوسپارلاۋ بويىنشا جەرگىلىكتى اتقارۋشى ورگاندارعا تاپسىرما بەرىلدى. ءوز كەزەگىندە ءبىز ۇيلەستىرۋشى مينيسترلىك رەتىندە حالىقتى قورعاۋ جاۋاپكەرشىلىگىنەن قاشپايمىز. ءبىزدىڭ تاراپىمىزدان توتەنشە جاعدايلار تۋىنداعاندا بارلىق قاجەتتى كومەك كورسەتىلەدى»، - دەپ ۋادە بەردى مينيستر.
بۇعان دەيىن شىڭعىس ءارىنوۆ ۇكىمەت وتىرىسىندا سۋ تاسقىنى جاعدايىنا قانداي تەحنيكالار ازىرلەنگەنىن جانە قانداي جوسپار قۇرىلعانىن باياندادى.
