س ق و- داعى اراق-شاراپتان باس تارتقان اۋىلدا سوڭعى 6 جىلدا بىردە-ءبىر قىلمىس تىركەلمەگەن
پەتروپاۆل. KAZINFORM - سولتۇستىك قازاقستان وبلىسىنىڭ ەسىل اۋدانىنداعى قاراعاي اۋىلى سپيرتتىك ىشىمدىكتەن باس تارتقان ەلدى مەكەندەردىڭ قاتارىندا. ناتيجەسىندە مۇندا ۇرلىق، ءتۇرلى جانجالدار ساپ تىيىلعان.
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بۇلاق اۋىلدىق وكرۋگىنىڭ قۇرامىنداعى قاراعاي اۋىلى 10 جىلدان بەرى اراق-شاراپ اتاۋلىنى مۇلدەم ۇمىتقان. ۋچاسكەلىك پوليتسيا ينسپەكتورى قانات ءجانعاريننىڭ بۇل وكرۋگتە ءتارتىپتى قاداعالاپ جۇرگەنىنە 6 جىلعا جۋىق.
«اۋىل شاعىن 27 ءۇي بار، حالىق سانى - 88 ادام. مەن قىزمەت اتقارىپ جۇرگەن ۋاقىتتان بەرى بۇل ەلدى مەكەندە بىردە-ءبىر قىلمىس تىركەلمەدى. وتباسى- تۇرمىستىق سالادا، قوعامدىق ورىندارداعى قۇقىق بۇزۋشىلىقتار مۇلدەم جوق. اۋىل تۇرعىندارى مال وسىرۋمەن اينالىسادى. سوندىقتان مالدى بوس، قاراۋسىز جىبەرۋ ماسەلەسى بولدى. اۋىل تۇرعىندارىنىڭ جينالىسىندا ونى شەشتىك. سوڭعى ءۇش جىلدا مۇنداي ءبىر دە ءبىر دەرەك تىركەلمەدى»،-دەيدى قانات جانعارين.
قازىرگى ۋاقىتتا ۋچاسكەلىك ينسپەكتور جۇمىسىنىڭ نەگىزگى باعىتى-ينتەرنەت الاياقتىقتىڭ الدىن الۋ. مۇنداي فاكتىلەر ەلدى مەكەندە تىركەلمەگەن، ءبىراق پوليتسەي قىلمىسكەرلەردىڭ ءتۇرلى ايلا-تاسىلدەرى تۋرالى تۇرعىنداردى اقپاراتتاندىرىپ، ۇنەمى كەزدەسىپ تۇرادى، WhatsApp جەلىسىندەگى اۋىل چاتىنا الدىن الۋ سيپاتىنداعى جادىنامالاردى جىبەرىپ تۇرادى. جەرگىلىكتى تۇرعىندار دا ءتارتىپ ساقشىسىنىڭ جۇمىسىنا ريزا. سپيرتتىك ىشىمدىكتەردەن باس تارتۋدىڭ ارقاسىندا اۋىلدا بەرەكە-بىرلىك ورناعان.
