س ق و- دا «ءبىر اۋىل - ءبىر ءونىم» باعدارلاماسى بويىنشا ءتورت جەڭىمپاز انىقتالدى
پەتروپاۆل. KAZINFORM - سولتۇستىك قازاقستان وبلىسىندا «ءبىر اۋىل - ءبىر ءونىم» باعدارلاماسىنىڭ وڭىرلىك برەند كوميتەتىنىڭ وتىرىسى ءوتتى. ناتيجەسىندە ءتورت كاسىپكەر جەڭىمپاز دەپ تانىلدى. ەندى ولار ءتۇرلى قولداۋعا يە بولماق.
س ق و كاسىپكەرلەر پالاتاسى باسپا ءسوز قىزمەتىنىڭ مالىمەتىنشە، بيىل «ءبىر اۋىل - ءبىر ءونىم» باعدارلاماسىنا قاتىسۋعا وڭىردەن 24 ءوتىنىش تۇسكەن.
«قاتىسۋعا ءوتىنىش بەرگەن كاسىپكەرلەر ءوز ونىمدەرىن 29-تامىزدا پەتروپاۆلدا وتكەن كورمە-جارمەڭكەدە كوپشىلىك نازارىنا ۇسىندى. كورمە قورىتىندىسى بويىنشا كونكۋرستىڭ كەلەسى كەزەڭىنە 10 فيناليست ءوتتى، ولار كەيىن ءوز جوبالارىن وڭىرلىك برەند- كوميتەت الدىندا قورعادى. ناتيجەسىندە وننىڭ ۇشەۋى كەلمەي، اقتىق كەزەڭگە وتكەن 7 كاسىپكەر ءوز ونىمدەرىن ۇسىندى»، - دەدى س ق و كاسىپكەرلەر پالاتاسىنىڭ ديرەكتورى ەسجان ورازالين.
قازىلار القاسى قۇرت، ارا شارۋاشىلىعى ونىمدەرى، كىر سابىن، جۇننەن جاسالعان بۇيىمدار، ەشكى سۇتىنەن جاسالعان ونىمدەر، توساپ پەن دجەم، كونديتەر ونىمدەرىن ءپىسىرۋ جانە كونسەرۆىلەۋ سياقتى تاۋارلاردىڭ اراسىنان ۇزدىكتەردى انىقتادى.
برەند-كوميتەتتىڭ شەشىمىمەن كىر سابىن جاسايتىن «بەرەكە» ج ك، قۇرت جاسايتىن «دوسحودجايەۆ» ج ك، توساپ- دجەم قايناتاتىن «ارۋجان» جك جانە ەشكى سۇتىنەن ءتۇرلى ءونىم دايىندايتىن «تاماشا» ج ش س جەڭىمپاز اتاندى.
«جەڭىمپازداردى تاڭداۋ كەزىندە ءبىرىنشى كەزەكتە كاسىپكەرلەردىڭ ءونىم نەمەسە تاۋار وندىرىسىندە تەك جەرگىلىكتى شيكىزات پەن قول ەڭبەگىن پايدالانۋىنا باسا نازار اۋدارىلدى. سونداي- اق، كاسىپتىڭ الەۋەتى، ونىڭ قاپتاماسى، تاۋاردىڭ ايماقتىق ەرەكشەلىكتەرى جانە ونىڭ ىشكى جانە سىرتقى نارىقتارعا شىعۋ مۇمكىندىگى بار- جوعى باعالاندى. سونداي- اق ءوندىرۋشىنىڭ دايىندىعى - ونىڭ ءوز تۇتىنۋشىلارىنىڭ، تاجىريبەسى مەن جۇمىسشىلارىنىڭ بولۋى جانە ت. ب. ەسكەرىلدى»، - دەيدى ەسجان ورازالين.
باعدارلامانىڭ نەگىزگى ماقساتى - جەرگىلىكتى ءونىمنىڭ ساپاسىن ارتتىرۋ، جەرگىلىكتى برەندتەردى قۇرۋ، ماركەتينگ جانە نارىقتاعى ءونىمنىڭ قۇندىلىعىن ارتتىرۋ.
ەندى جوبا جەڭىمپازدارىنا ماركەتولوگتار ءوز ءونىم-تاۋارلارىن ودان ءارى جەتىلدىرىپ، برەندتەۋ، سەرتيفيكاتتاۋ جانە ەكسپورتقا شىعارۋ بويىنشا كومەك كورسەتەدى.
بۇعان دەيىن س ق و- دا وتاندىق ءونىمدى وڭدەۋ جانە قىتايعا ەكسپورتتاۋ بويىنشا ەڭ ءىرى ورتالىق قۇرىلىپ جاتقانىن جازعان ەدىك.
