س ءى م يزرايل مەن يران تۋرالى: قازاقستاندىقتارعا بار، بارما دەپ ايتا المايمىز

استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ يزرايل مەن يران مەملەكەتتەرىندە جۇرگەن قازاقستاندىقتاردىڭ قاۋىپسىزدىگى تۋرالى پىكىر ءبىلدىردى.

«جاعداي وڭاي ەمەس. بۇل ءبىر تۇندە بولعان جاعداي ەمەس. ونىڭ الدىندا بۇل الدىن الا ايتىلدى، ەسكەرتىلدى. ەگەر ءبىزدىڭ ازاماتتار سول وڭىردە جۇرسە، ءوز قاۋىپسىزدىگىن ويلاۋى كەرەك»، - دەدى رەسمي وكىل.

ونىڭ سوزىنشە، قوس ەلدەگى ەلشىلىكتەر 24 ساعات بويى جۇمىس ىستەپ تۇر.

«ەلشىلىكتەردىڭ تەلەفون نومىرلەرى ينتەرنەتتە كورسەتىلگەن. ازاماتتار سول نومىرلەر بويىنشا حابارلاسا الادى. قازىرگى تاڭدا يراندا دا، يزرايلدە دە بارلىق اۋەجاي مەن شەكارا اشىق. جۇمىس ىستەپ جاتىر. سوندىقتان (قازاقستاندىقتارعا) ول جاققا بارىڭدار-بارماڭدار دەگەن كەڭەس بەر المايسىز. ءار ادام شەشىمدى ءوزى قابىلداۋى كەرەك. مىسالى، كەشەدەن بەرى ادامدار «مىسىرعا پۋتيەۆكا الىپ قويدىق. ول جاققا بارىپ، دەمالساق بولا ما؟» دەپ سۇراق قويىپ جاتىر. ءبىز كەپىلدىك بەرە المايمىز. ەرتەڭ نە بولاتىنىن ەشكىم بىلمەيدى. ءبىراق ءبىزدىڭ ازاماتتار يراندا، يزرايل دە بار. جاعداي قاتتى كۇردەلەنىپ جاتسا، مەملەكەت بارىنە كومەكتەسەدى. ازىرشە، ءبارى دۇرىس»، - دەدى ايبەك سمادياروۆ.