پرەزيدەنت: ەگىننىڭ بىتىك بولۋى - مولشىلىق پەن توقشىلىقتىڭ كەپىلى
استانا. KAZINFORM - كۇزگى جيىن-تەرىمدە ەلىمىز بويىنشا 24,5 ميلليون توننا داقىل جينالدى. بۇل تۋرالى اۋىل شارۋاشىلىعى ەڭبەككەرلەرىنىڭ Ⅲ فورۋمىندا مەملەكەت باسشىسى قاسىم-جومارت توقايەۆ ايتتى.
- ەڭ الدىمەن، كاسىبي مەرەكە بارشاڭىزعا قۇتتى بولسىن دەگىم كەلەدى. بۇل — ءمان-ماڭىزى ەرەكشە وقيعا. سەبەبى اۋىل شارۋاشىلىعى — ەل ەكونوميكاسى ءۇشىن ستراتەگيالىق ماڭىزى ايرىقشا سالا. بۇگىندە جىل سايىنعى داستۇرگە ساي مەملەكەتىمىزدىڭ اگرارلىق احۋالىن تالقىلاۋ ءۇشىن ارنايى جينالىپ وتىرمىز. القالى جيىنعا ەلىمىزدىڭ ءار ايماعىنان كەلگەن بىلىكتى ماماندار، ديقاندار، شارۋالار، ءبىر سوزبەن، ەڭبەك ادامدارى قاتىسىپ وتىر. سوندىقتان بۇل فورۋمدى جالپى ۇلتتىق اۋقىمداعى ناعىز ەلدىك باسقوسۋ دەسەك تە قاتە بولماس، - دەدى پرەزيدەنت.
مەملەكەت باسشىسىنىڭ اتاپ وتۋىنشە، بۇگىنگى فورۋمدا سۋ رەسۋرستارىن ۇنەمدەۋ، جايىلىمدىق جەرلەردى ءتيىمدى پايدالانۋ، اۋىل ەڭبەككەرلەرىنىڭ الەۋمەتتىك جاعدايىن جاقسارتۋ جانە باسقا دا وزەكتى ماسەلەلەرگە قاتىستى ماڭىزدى پىكىرلەر، ۇتىمدى ۇسىنىستار ايتىلدى. ۇكىمەت جانە قۇزىرلى مينيسترلىك وسى ماسەلەنىڭ ءبارىن مىندەتتى تۇردە نازارعا الۋى كەرەك.
- بارشاڭىزعا ءمالىم، بۇگىندە اۋىل شارۋاشىلىعى ماماندارى اۋىل الەۋەتىن ارتتىرۋىنا، تۇتاس مەملەكەتىمىزدىڭ ءوسىپ- وركەندەۋىنە مول ۇلەس قوسۋدا. سىزدەر اتا كاسىپتى ابىرويمەن اتقارىپ، ۇلتىمىزدىڭ يگىلىگىن ەسەلەپ جۇرسىزدەر. اۋا رايى قولايسىز بولعانىنا قاراماستان، بيىل دا ەل قامباسى استىققا تولدى. كۇزگى جيىن-تەرىمدە ەلىمىز بويىنشا 24,5 ميلليون توننا داقىل جينالدى. ەگىننىڭ بىتىك بولۋى — مولشىلىق پەن توقشىلىقتىڭ كەپىلى. بۇل ەلىمىزدەگى شاڭىراقتار ىرىسقا كەنەلىپ، داستارقانىمىز بەرەكەلى بولادى دەگەن ءسوز. مەن بۇگىن ديقاندار قاۋىمىنا جانە وسى سالادا ەڭبەك ەتىپ جۇرگەن بارشا ازاماتقا العىس ايتامىن، - دەدى قاسىم- جومارت توقايەۆ.