پرەزيدەنت تەمىرتاۋداعى جاڭارتىلعان ترامۆاي جۇيەسىمەن تانىستى

مەملەكەت باسشىسى ترامۆايمەن رەسپۋبليكا داڭعىلىنان «ينجەنەر» ايالداماسىنا دەيىن ءجۇرىپ ءوتىپ، اتقارىلعان ءىستىڭ ساپاسىن جانە جاڭارتىلعان كولىك ينفراقۇرىلىمىنىڭ پايدالانۋعا تولىعىمەن ءازىر ەكەنىن كوردى.

Qarmet كومپانياسى ترامۆايدى قالا حالقىنىڭ يگىلىگىنە ەكى جىل بۇرىن بەرگەن بولاتىن. سودان بەرى اتالعان قوعامدىق كولىك قاتىناسى 1 ميلليوننان اسا جولاۋشىنى تاسىمالداعان.

قالادا ترامۆايعا ارنالعان 30 شاقىرىم شويىن جول قالپىنا كەلتىرىلىپ، اۋىستىرىلدى. جاڭادان زاماناۋي 8 ۆاگون ساتىپ الىندى. بۇل ترامۆايدىڭ كەستەگە سايكەس تۇراقتى جۇرۋىنە مۇمكىندىك بەردى.

رەلستى كولىكتە جولاۋشىلارعا ىڭعايلى بولۋى ءۇشىن ەلەكتروندى تولەم جۇيەسى ورناتىلعان، ال Qarmet كاسىپورنىنىڭ جۇمىسكەرلەرى مەن ارداگەرلەرى تەگىن جۇرەدى.

پرەزيدەنت «Qarmet» ا ق باسشىلىعىمەن اڭگىمەلەسۋ بارىسىندا مەتاللۋرگتەر قالاسىنداعى ترامۆاي قاتىناسىن قالپىنا كەلتىرۋدىڭ ماڭىزىن اتاپ ءوتتى.

- شىن مانىندە، تەمىرتاۋ ءۇشىن ترامۆاي - زامانالاردى بايلانىستىراتىن دانەكەر ىسپەتتەس. تۇرعىنداردىڭ ترامۆاي قاتىناسىن قالپىنا كەلتىرۋ تۋرالى تالابىن ورىنداعانىڭىز دۇرىس بولىپتى. كومبيناتقا العاش كەلگەنىڭىزدە تەمىرتاۋ قالاسىن اباتتاندىرۋمەن مىندەتتى تۇردە اينالىسۋ قاجەت دەپ ايتقان ەدىم. ويتكەنى قالا كۇتىم كورمەي، توزىپ كەتتى. ءالى دە اتقارىلاتىن جۇمىس كوپ، دەگەنمەن باستاماسى جاقسى. تەمىرتاۋ تۇرعىندارى تابيعي گازبەن قامتاماسىز ەتىلدى. بايقاۋىمشا، حالىقتىڭ كوڭىل-كۇيى كوتەرىڭكى. ويتكەنى ادامدار اينالاداعى وڭ وزگەرىستەردى بايقاپ، العىستارىن بىلدىرۋدە. ەڭبەك ۇجىمىنىڭ دا كوڭىل-كۇيى ايتارلىقتاي جاقسارعانى بايقالادى. ەڭ باستىسى، جاعىمدى ۇدەرىس بار. ءبىز كومبيناتتى مىندەتتى تۇردە پروگرەسس پەن تابىستىڭ سيمۆولىنا اينالدىرامىز، ءتىپتى ونى وركەندەتەمىز، - دەدى قاسىم-جومارت توقايەۆ.

ايتا كەتەلىك توقايەۆ جۇمىس ساپارىمەن قاراعاندى وبلىسىنا بارعان ەدى.