پرەزيدەنت سوڭعى كەزدە دىنگە قاتىستى كونە سوزدەرىمىزدىڭ ورنىنا اراب سوزدەرى ءجيى قولدانىلاتىن ايتتى

پرەزيدەنت ءتىلىمىزدىڭ باسقا ىرگەلەس ەلدەردىڭ تىلدەرىمەن سالىستىرعاندا الدەقايدا تازا ەكەنىن ايتتى.

— مىسالى، بۇرىن وتە سيرەك پايدالانعان نەمەسە مۇلدە پايدالانباعان «تۇجىرىمداما، قاعيدات، جوسپار، سىياقى، شاكىرتاقى، ەڭبەك ءوتىلى، كەشەندى، امبەباپ، جۇيەلى، تىڭايتقىش، جانارماي، كوگالداندىرۋ، بوسقىن، قىرعي-قاباق سوعىس، قوقان-لوقى، لاڭكەستىك، ەسىرتكى، بىتىمگەرلىك كۇشتەر، مامىلەگەر، عارىش، زىمىران، جاھان، عالامتور، تىكۇشاق، جاساندى سانا، پايىز، سىنىپ» سياقتى سوزدەر تىلىمىزدە كەڭ قولدانىس تاپتى. بۇل — جاقسى دۇنيە، — دەدى قاسىم-جومارت توقايەۆ.

مەملەكەت باسشىسى قاجەتتىلىگى ەكىتالاي جاساندى سوزدەردى دە ءتىزىپ ءوتتى.

— ءبىراق ءار جاقسى قۇبىلىستىڭ شەگى بولۋى كەرەك. مىسالى، «كۇيساندىق (پيانينو)، قىلتيما (بالكون)، سۋبۇرقاق (فونتان)، سەبەزگى (دۋش)، قىرىققابات (كاپۋستا)، ءۇنقاعاز (گازەت)، جەدەلساتى (ليفت)، جەلكوز (فورتوچكا) » جانە تاعى باسقا جاساندى سوزدەردىڭ قاجەتتىلىگى ەكىتالاي سياقتى. سوڭعى كەزدە دىنگە قاتىستى كونە سوزدەرىمىزدىڭ ورنىن اراب سوزدەرىن ءجيى قولدانۋ ءسان بولىپ كەتتى. مۇنىڭ دا قاجەتتىلىگىنە كۇمان بار، - دەدى ول.

پرەزيدەنت وسىنىڭ ءبارى - وتە وزەكتى ماسەلەلەر ەكەنىن، سوندىقتان كاسىبي عالىمدار وزدەرىنىڭ سالماقتى پىكىرلەرىن ورتاعا سالۋى قاجەتتىگىن جەتكىزدى.

— ءتىل عىلىمىنا قاتىستى امبەباپ، بارىنە قولجەتىمدى سيفرلىق جۇيە ازىرلەۋ ماڭىزدى. بۇل مىندەتتى مەملەكەتتىك دەڭگەيدە ساپالى ورىنداۋ ءۇشىن قۇرامىنا كاسىبي ءتىل ماماندارى، عالىمدار، ساراپشىلار مەن جالپى قوعام وكىلدەرى كىرەتىن ارنايى جۇمىس توبىن قۇرعان ءجون دەپ سانايمىن. جۇمىس توبىنىڭ قىزمەتىن ۇيلەستىرۋ پرەزيدەنت اكىمشىلىگىنە جۇكتەلەدى، — دەدى توقايەۆ.