پرەزيدەنت ۇلكەن قۇرىلىس قوزعالىسىنا «حالىقتىق قۇرىلىس» دەگەن اتاۋ بەرۋدى ۇسىندى
استانا. KAZINFORM - قازاقستان حالقىنا جولداۋىن جاريالاۋ كەزىندە پرەزيدەنت قاسىم-جومارت توقايەۆ ەلىمىزدە قارقىندى قۇرىلىس جۇرگىزىپ، الەۋمەتتىك نىساندار سالۋ جونىندە مالىمدەدى.
- ۇلتتىق قوردىڭ رەسۋرسىن جيناقتاۋ جانە ونى پايدالانۋ اراسىندا تەڭگەرىم ساقتالۋعا ءتيىس. قاراجاتتى تەك قوعامعا بارىنشا پايدالى دۇنيەگە عانا جاراتۋ كەرەك. ەڭ باستىسى، جۇمسالعان اقشانىڭ ەكونوميكالىق جانە الەۋمەتتىك قايتارىمى بولۋى قاجەت. ويتكەنى بولىنەتىن مەملەكەت قاراجاتىنىڭ نەگىزگى ماقساتى - حالىقتىڭ ءال-اۋقاتىن كوتەرۋ، - دەدى ول.
پرەزيدەنتتىڭ سوزىنشە، ءتيىستى جوبالاردى جۇزەگە اسىرۋعا ماتەريالدىق-تەحنيكالىق جاعدايى جاقسى جانە مول تاجىريبەسى بار جەرگىلىكتى جەردەگى شاعىن جانە ورتا بيزنەس وكىلدەرىن تارتقان ءجون. بۇكىل قۇرىلىستىڭ بارىسى قاتاڭ باقىلاۋعا الىنادى.
- ءبىرىنشى كەزەكتە ايماقتاردا 70-كە جۋىق دەنساۋلىق ساقتاۋ نىسانى سالىنادى. پەرزەنتحانالار، اۋرۋحانالار، جەدەل مەديسينالىق كومەك كورسەتۋ ستانسيالارى، بالالارعا ارنالعان وڭالتۋ ورتالىقتارى مەن ەرەكشە بالالاردىڭ سۇرانىسىنا ساي سپورتزالدار بوي كوتەرەدى. سونداي-اق 50-گە جۋىق ءبىلىم بەرۋ، سپورت جانە مادەنيەت مەكەمەلەرىنىڭ قۇرىلىسى باستالادى. وسىنداي اسا قاجەتتى، ساپالى نىسانداردىڭ قۇرىلىسىن جەدەل تۇردە باستاپ، كوپ ۇزاماي ىسكە قوسۋىمىز كەرەك، - دەدى مەملەكەت باسشىسى.
بۇدان بولەك، تۇرعىن ءۇي-كوممۋنالدىق شارۋاشىلىعى سالاسىنا قوماقتى قارجى بولىنەدى. كوپتەگەن ەلدى مەكەندەرگە گاز جانە تازا اۋىز سۋ تارتىلادى.
- ۇكىمەت جىل سوڭىنا دەيىن ناقتى جوبالاردىڭ باستاپقى ءتىزىمىن ازىرلەيدى. بۇل ءتىزىم بارلىق ايماقتى قامتۋى كەرەك. ءبىز حالقىمىزدىڭ ارتىپ وتىرعان زور ۇمىتىنە لايىق بولۋىمىز قاجەت. بۇل جوسپارىمىز ەل يگىلىگىن ارتتىرۋعا ارنالىپ وتىر، باسقا استارلى ويىمىز جوق. سوندىقتان وسى ۇلكەن قۇرىلىس قوزعالىسىنا «حالىقتىق قۇرىلىس» دەگەن اتاۋ بەرسەك، قارسىلىق بولماس دەپ سەنەمىن. «حالىقتىق قۇرىلىس» باعدارلاماسى ازاماتتاردىڭ ءال-اۋقاتىن ارتتىراتىن، كاسىپكەرلىكتىڭ وركەندەۋىنە، دامۋىنا، ۇلتتىق ەكونوميكانى جانداندىرۋعا زور ىقپال ەتەتىن ءتول تاريحىمىزداعى ەڭ ۇلكەن ينفراقۇرىلىمدىق جوبا بولماق. اتالعان باستاما ءجۇز مىڭداعان ادامدى جۇمىسپەن قامتيدى، ونىڭ يگىلىگىن تۇتاس حالقىمىز، اسىرەسە، وسكەلەڭ ۇرپاق كورەدى دەپ كامىل سەنەمىن، - دەدى پرەزيدەنت.
پرەزيدەنت ۇلتتىق قوردىڭ ەڭ باستى ميسسياسىن اتادى
ۇلتتىق قوردىڭ ەڭ باستى ماقساتى، ميسسياسى - ەل بايلىعىن ۇقىپتى ۇستاۋ جانە ودان ءارى ارتتىرۋ، سونداي-اق، ونى قازىرگى جانە كەلەشەك ۇرپاقتىڭ يگىلىگىنە جاراتۋ. بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا ايتتى.
پرەزيدەنتتىڭ ايتۋىنشا، ۇلتتىق قور كوپتەگەن جىل بويى وسى نەگىزگى مىندەتتى لايىقتى ورىنداپ كەلەدى، ياعني قارجىلىق تۇراقتىلىقتى قامتاماسىز ەتۋگە زور ۇلەس قوسىپ وتىر.
- جاس ۇرپاقتىڭ يگىلىگىن ويلاساق، بۇل باعىتتا قازىردەن باستاپ ناقتى ءارى باتىل قادامدار جاساۋىمىز كەرەك. وزەكتى ماسەلەلەردى كەيىنگە قالدىرۋعا بولمايدى. ءار ماسەلە ءوز شەشىمىن تابۋعا ءتيىس. باستى تالاپ - وسى، - دەدى مەملەكەت باسشىسى.
ول كەيىنگى بۋىنعا وركەنيەتتى، وزىق، جاڭارعان مەملەكەتتى امانات ەتۋ كەرەگىن ايتتى.
- كەلەر ۇرپاق الدىنداعى تاريحي جاۋاپكەرشىلىگىمىز ولاردىڭ ەسەپشوتىندا قارجى قالدىرۋمەن عانا شەكتەلمەيتىنىنە سەنەمىن. ءبىز ۇرپاعىمىزعا تەحنولوگياسى دامىعان، ەكونوميكاسى قۋاتتى ءارى باسەكەگە قابىلەتتى، ينفراقۇرىلىمى زاماناۋي، ءومىر ءسۇرۋ ساپاسى جوعارى، ءار ازاماتتىڭ ءوزىن تانىتىپ، الەۋەتىن جۇزەگە اسىرۋىنا مۇمكىندىك بەرەتىن جاڭا دەڭگەيدەگى ەل قالدىرۋىمىز كەرەك. بۇل — ءبىزدىڭ باستى مىندەتىمىز، ءتىپتى تاريحي اۋقىمداعى ميسسيامىز دەسەك تە بولادى، — دەدى قاسىم-جومارت توقايەۆ.
بۇل — ادام كاپيتالىن دامىتۋعا، ازاماتتاردىڭ تۇرمىس ساپاسىن جاقسارتۋعا، ياعني ەل بولاشاعىنا سالىناتىن ۇزاق مەرزىمگە ارنالعان ينۆەستيتسيا ەكەنى دە ايتىلدى.
ايتا كەتەيىك، بيىلعى جولداۋ «جاڭا تاريحي كەزەڭدەگى قازاقستاننىڭ وزەكتى مىندەتتەرى» دەپ اتالادى.
