پرەزيدەنت: باسشىلاردىڭ ۇستالعانى - مەملەكەتتىك كومپانيالاردا جەمقورلىق بەلەڭ العانىن كورسەتەتىن اسا كۇردەلى جاعداي
استانا. KAZINFORM - مەملەكەت باسشىسى قاسىم-جومارت توقايەۆ قاۋىپسىزدىك كەڭەسىنىڭ شۇعىل وتىرىسىندا «سامۇرىق قازىنا» ۇلتتىق ءال-اۋقات قورى مەن «قازاقستان تەمىر جولى» ۇ ك» ا ق باسشىلارىنىڭ ۇستالۋىنا بايلانىستى مالىمدەمە جاسادى. بۇل تۋرالى اقوردا حابارلادى.
- كەشە ەلىمىزدىڭ بۇقارالىق اقپارات قۇرالدارى «سامۇرىق-قازىنا» قورى مەن «قازاقستان تەمىر جولى» كومپانياسى باسشىلارىنىڭ ۇستالعانى تۋرالى مالىمەت تاراتتى. اشىعىن ايتقاندا، بۇل - مەملەكەتتىك كومپانيالاردا جەمقورلىق بەلەڭ العانىن كورسەتەتىن اسا كۇردەلى جاعداي. جالپى، زاڭ بويىنشا تەرگەۋ ماسەلەلەرىن جاريالاۋعا نەمەسە اشىپ كورسەتۋگە بولمايدى. ونىڭ ۇستىنە تەرگەۋ جۇمىسى دا ەندى باستالدى، - دەدى مەملەكەت باسشىسى.
پرەزيدەنت قازىردىڭ وزىندە مىنا نارسەنى انىق ايتۋعا بولاتىنىن اتاپ ءوتتى. بۇل - «زاڭ مەن ءتارتىپ» تۇجىرىمداماسىن جاريالاپ، ونى كونستيتۋتسيادا مەملەكەتتىك باسقارۋ مەن قوعام ءومىرىنىڭ باستى قاعيداتى رەتىندە بەكىتكەلى بەرى ءبىرتۇتاس جۇيەگە كىرەتىن مەملەكەتتىك كومپانيالاردا بولىپ تۇرعان سىبايلاس جەمقورلىققا قاتىستى العاشقى ءىرى ءىس.
- ەلىمىزدىڭ كونستيتۋتسياسى 15-ناۋرىزدا جالپى ۇلتتىق رەفەرەندۋم كەزىندە ءبىراۋىزدان قابىلداندى، 1-شىلدە كۇنى زاڭدى كۇشىنە ەندى. وسىلايشا، مەملەكەتىمىزدىڭ باس قۇجاتى ادىلەتتى تۇردە «حالىق كونستيتۋتسياسى» دەپ اتالدى. كونستيتۋتسيانىڭ ەرەجەلەرى مەن باپتارىن بۇزۋعا، حالقىمىزدىڭ وسى قاسيەتتى قۇجاتىن كەلەمەج جاساۋعا، كەمسىتۋشىلىك كورسەتۋگە ەشكىمنىڭ دە حاقى جوق، - دەدى قاسىم-جومارت توقايەۆ.
