پرەزيدەنت ۆيكتور ورباندى «دوستىق» وردەنىمەن ماراپاتتادى

مەملەكەت باسشىسى قاسىم-جومارت توقايەۆ ماجارستان پرەمەر-ءمينيسترى ۆيكتور ورباندى 1- دارەجەلى «دوستىق» وردەنىمەن ماراپاتتادى، دەپ حابارلايدى Kazinform اگەنتتىگى.

«ءسىز قازاقستاندا كورنەكتى ساياسي كوشباسشى، ۋاقىت سىنىنان وتكەن، الەمدىك ارەنادا ۇلكەن قۇرمەتكە لايىق دوس رەتىندە تانىمالسىز. وسىعان بايلانىستى ءسىزدىڭ قازاق-ماجار قارىم-قاتىناسىن دامىتۋعا ۇدايى قوسىپ كەلە جاتقان ۇلەسىڭىزدى جانە كورنەكتى باسقارۋشىلىق قابىلەتىڭىزدى جوعارى باعالايتىنىمىزدى ايتقىم كەلەدى. كوپ جاعدايدا ءسىزدىڭ قالتقىسىز كۇش سالۋىڭىزدىڭ، مىزعىماس جەكە ۇستانىمىڭىزدىڭ ارقاسىندا ەكى اراداعى ارىپتەستىكتىڭ كەلەشەگىنە ۇلكەن وپتيميزممەن، تىڭ تالپىنىسپەن قارايمىز»، - دەدى قاسىم-جومارت توقايەۆ اقوردادا.

پرەزيدەنت ماجارستان پرەمەر-ءمينيسترىنىڭ قوس حالىقتىڭ ىنتىماعى جولىندا سىڭىرگەن ەڭبەگىنە ەرەكشە توقتالدى.

«ءسىزدى ءى دارەجەلى «دوستىق» وردەنىمەن ماراپاتتاۋ جونىندە شەشىم قابىلدادىم. بۇل - تەرەڭ قۇرمەت پەن ىزەتتىڭ، تاتۋ حالىقتارىمىزدىڭ بىرلىگىنىڭ، قارىم-قاتىناسىمىزدى نىعايتۋعا دەگەن بەرىك ىنتانىڭ، ءوزارا قۇرمەتكە قۇرىلعان سەنىمنىڭ سيمۆولى»، - دەدى مەملەكەت باسشىسى.

بۇعان دەيىن اقوردادا ماجارستان پرەمەر-ءمينيسترىن قارسى الۋ سالتاناتى وتكەنىن جازعان ەدىك.

قاسىم-جومارت توقايەۆ ۆيكتور وربانمەن كەزدەسۋ كەزىندە ەكى ەلدىڭ باۋىرلاستىق بايلانىسى تۋرالى ايتتى.

ەسكە سالساق، كەشە كەشكە ۆيكتور ورباندى استانا اۋەجايىندا ۆيتسە-پرەمەر سەرىك جۇمانعارين كۇتىپ العان بولاتىن.

قازاقستان باسشىلىعىمەن كەلىسسوز بارىسىندا قازاقستان مەن ماجارستان اراسىنداعى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى تەرەڭدەتۋ ماسەلەلەرى تالقىلاندى.